ꍔꃚꌤꃅꅇꄜ
——2018ꈓ3ꆪ5ꑍꊯꌕꈭꇩꏤꑭꊂꏓꂱꁧꎁꃀꀉꒉꋍꃢꌠꈿꅉꇬ
ꇩꃷꑼꊝꅿ ꅿꇻꐃ
ꁧꎁꊈ：
ꀋꃋ，ꉢꇩꃷꑼꎁꃅ，ꃀꀉꒉꈿꅉꏭꋌꃀꉬꈎꍔꃚꌤꃅꐨꅇꄜ，ꎼꈎꌤꃅꌠꏭꇖꐨꉉ，ꆍꑴꌠꌌꍤꇖ，ꄷꀋꁧꇩꏤꑭꊂꍔꑠꊈꑼꊈꑌꉜꐨꄜꎼꇁꅊꇈ。
ꋍ、ꋌꃀꉬꈎꌤꃅꐨꉪꀱ
ꊰꑋꈭꇩꏤꑭꊂꏓꂱꁧꎁꃀꀉꒉꋍꃢꌠꈿꊂꅑꅸꇁꉬꈎꌠꆹ，ꉪꇩꏤꀻꎆꈴꎁꇬꎃꀋꐚꐯꎃꀋꐚꑠꉬꈎꉬ。 ꌼꇪꇨꌠꇩꈐꇩꉈꃅꒊꃅꇁꂾꄉ，ꐋꀨꑮꏣꀻꈯꄜꃅꄉꌠꄈꍏꑷꆏꇩꏤꑭꊂꊿꋅꈁꐥꌠꏓꂱꋯꑌꃅꏃꂠꌌꈐꊟꊋꊡꄉꀒꁨꆹ，ꏓꈴꇲꈴꃅ“ꉬꑵꋍꉻ”ꀑꐱꄐꉻꄹꎆ，ꋮꄮꃅ“ꇖꑵꐊꑷ”ꌠꄐꇐꄐꉻꄹꎆ， ꄺꀱꁉꃑꌠꌋꆀꐧꋦꉪꏦꐛꏀꈴꋈꄻꌠꐊꑷꃅꐛꊂꀊꏀꌠꀹꄻ。 ꄈꅿꃀꀉꒉꊯꈬꃢꌠꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꐩꋊꉆꈉꏤꄉꀐ，ꐊꑷꃅꊼꇅꌣꈚꌠꐧꋦꋈꄻꐛꌠꂫꋓꊋꐛ、ꃅꋊꀊꏀꋎꌠꍏꇩꐛꐨꐧꋦꉪꏦꇰꀋꃀꃅꊋꐛꌠꇑꅜꌠꉻꒉꌐꉻꌋꆀꃄꄻꐱꀨꏤꄻꄉꀐ， ꋋꆹꃶꐚꈻꇐꀉꒉꀊꂾꌠꌋꆀꐩꋊꈻꇐ꓂ꑳꀕꌠꐥꌠꉬ。 ꃅꄷꈁꐥꌠꌤꃅꅉꈁꐥꌠꀋꆏꃅꍔꍞꉪꐨ、ꃅꇴꄉꉻꉪꐨ、ꈯꄜꉪꐨ、ꉜꊱꉪꐨꀉꇨꆹ，ꃹꅼꃅꀻꎆꉪꉻꀊꏀꌠꃅꈴꌬꈴ，“ꊰꑋꉬ”ꄐꎖꌠꃅꊋꐛ，“ꊯꌕꉬ”ꄐꎖꌠꁣꀋꐥꃅꀕ，ꎆꏣꐧꋦꀻꎆꌠꊌꐨꐩꋊꐨꐥꌠꊌꅜ、ꐩꋊꐨꐥꃅꐛꐈ。
ꉬꈎꅑꅸꇁꌠ，ꎆꏣꊋꃤꐂꀊꏀꊐꇬꃹ。 ꇩꈐꒃꅐꈁꉬꁌꐨ54ꃪꂡꂷꇬꄉꉀꎆꌊ82.7ꃪꂡꂷꇬꑟ，ꃅꈎꈓꌠꐽꏡꃅ7.1％ꉀꎆ，ꋧꃅꎆꏣꇬꍆꐪ11.4％ꇬꄉꉀꐕꌊ15％ꀑꂪꑟ，ꋧꃅꎆꏣꉀꎆꌠꇬꅐꌞꐨ30％ꄩꐂ。 ꏱꎆꊌꐨ11.7ꃪꂡꂷꇬꄉꉀꎆꌊ17.3ꃪꂡꂷꇬꑟ。 ꀀꊿꌬꈧꁌꏤꃅꈎꈓꌠꐽꏡꃅ1.9％ꉀꄓ，ꑟꐨꊼꇅꀁꂥꌠꇬꎍ。 ꇓꈓꏦꎫꀊꏀꃅꃅꑘꊌꌠꊿ6600ꃪꑻꈋꉐꁦꎆ，ꊻꂷ13ꂡꎖꑻꐥꌠꇩꏤꀉꒉꂷꊼꇅꉾꃅꃅꑘꊌꌠꃅꇫꑟꀐ。
ꉬꈎꅑꅸꇁꌠ，ꎆꏣꐛꉻꀉꒉꀊꂾꃅꐛꐈ。 ꌬꈧꅐꌞꐨ54.9％ꇬꄉꉀꐕꌊ58.8％ꇬꑟ，ꁧꃤꃅꑘꍆꐪ45.3％ꇬꄉꉀꐕꌊ51.6％ꇬꑟ，ꎆꏣꉀꎆꇙꊋꀋꉬꀋꉆꌠꐛ。 ꇮꇐꀊꂥꌠꄺꂡꑘꃅꈎꈓꌠꐽꏡꃅ11.7％ꉀꎆ。 ꋚꂷꒃꅐꄐꊋ1.2ꃪꂡꏣꇬꑟ。 ꇓꈓꏦꎫꐛꈴꐨ52.6％ꇬꄉꉀꐕꌊ58.5％ꇬꑟ，ꂿꑘꆹꏮꊻꂷ8000ꎖꃪꑻꇓꈓꏦꎫꀀꊿꐛ。
ꉬꈎꅑꅸꇁꌠ，ꏀꀺꈺꇙꀻꎆꊌꐨꀉꑌ。 ꐧꋦꑭꊂꎥꃪꁧꀿꌠꃅꈎꈓꌠꐽꏡꃅ11％ꉀꎆ，ꄉꈁꐂꌊꋧꃅꉆꈉꑍꂷꂶꌠꇬꉆꎍ。 ꈆꑪꇮꇐꅐꌞꐨꆹ52.2％ꇬꄉꉀꐕꌊ57.5％ꇬꑟ。 ꊿꑌꃅꃴꐚꌠ、ꎿꅼꍤꎖ、ꆃꌅꅇꈴ、ꃏꏸꀉꒉꌠꑠꀉꒉꀊꂾꌠꏀꀺꊌꐨꀋꆏꃅꅐꇁ。 ꐳꈴꎸꈜꈄꏍ、ꄆꌅꃼꇇꑘꃆ、ꇘꊈꁵꄻ、ꐯꇯꈲꊌꎆꏣꑠꋧꃅꇬꂴꐊꐺ。 “ꐮꈴꈄꏍ＋”ꀊꐯꈭꃅꋍꑞꋍꉹꑘꇬꃹ。 ꉹꁌꑘꀺ、ꋍꏅꏀꀺꌠꍅꁍꀕꃅꀻꎆ，ꋍꑍꌠꐽꏡꃅꎆꏂꑘꀊꏀꃅꄐꄻꌠ5ꄙꎖꁯꇬꄉꉀꎆꌊ1ꃪ6ꄙꎖꁯꇬꑟ。 ꐳꃅꉀꄓꇁꌠꇙꊋꀊꏀꌠꆹ，ꇬꊎꎆꏣꉀꎆꐛꊂꎵꄻꀱ、ꃹꅼꃅꒃꅐꐥꐨꐤꄟꄺꀱꇰ，ꍏꇩꏀꀺꀻꎆꌠꌐꁧꀊꏀꐘꐛ。
ꉬꈎꅑꅸꇁꌠ，ꄺꀱꁉꃑꌠꑭꁘꀉꒉꀊꂾꃅꐕꎼꆹ。 ꄺꀱꌠꐊꑷꃅꊋꏂ、ꀉꑌꈚꃅꂵꅐ、ꀊꅼꃅꄹꎆ，ꀋꂿꑘꁁꏯꌋꆀꀋꉬꀋꉆꊬꌠꇬꄺꀱꌠꂵꅐꐨꐥꃅꀒꁨꎆꌠꊌꅜ，ꀋꉬꀋꉆꁁꏯꄺꀱꌠꀨꄜꇶꏦꀑꐱꃅꄻꄉ。 ꏲꑘꅧꊨꌅꈌꄝꃑ、ꄝꏲꐮꐊ、ꁧꃤꃅꌠꄻꃪꑠꄺꀱꌠꍔꃚꌅꊋꋌꄹꇙꌊꃹꅼꃅꄺꀱ，ꃷꎏꍄꑐꊋꃤꌋꆀꐧꋦꁦꄻꊋꃤꄇꇖꀕꃅꀉꇨ。 “ꋍꁕꋍꈜ”ꋈꄻꊌꐨꈲꁧꄇꇖꀕ，ꉇꉻꃼꇇꌋꆀꉇꎆꌬꐛꉻꄻꃪ、ꄉꈁꎍꐽꃅꋧꃅꇬꂴꉆꐺ。
ꉬꈎꅑꅸꇁꌠ，ꏓꂱꐥꐨꐪꊛꄉꄻꃪ。 ꎭꑆꇔꈢꇓꀖꌠꏤꇽꐨꐥꃅꁨꎆ，ꌢꎭꊻꂷ6800ꎖꃪꑻꊨꒊ。 ꀀꅉꆦꎭꄏꎞꀀꊿ830ꃪꑻꐥ，ꌢꎭꇫꅐꐨ10.2％ꇬꄉꀁꋌꊰꌊ3.1％ꇬꑟ。 ꀀꊿꊌꐨꃅꈎꈓꌠꐽꏡꃅ7.4％ꉀꎆ、ꎆꏣꁦꎆꐳꐨꄩꐂ，ꋧꃅꇣꄧꊻꂷꀉꑌꐯꀉꑌꌠꊌꐨꐧꀠꁥꌠꐛ。 ꋯꉈꈩꆫꌠꊿ8300ꃪꑻꃢꇬꄉꁦꎆꌊ1ꂡ3ꄙꎖꃪꑻꃢꇬꑟ。 ꂘꑘꌤꑘꐊꑷꃅꀻꎆ。 ꐧꋦꃀꌠꀨꎹꄜꏂꀧꌠꊿ9ꂡꎖꑻꇬꉱꑷ，ꅉꀨꆅꉁꄜꏂꀧꌠꊿ13.5ꂡꑻꇬꉱꑷ，ꋧꃅꇣꄧꐧꋦꏦꀧꈄꏍꀉꒉꐯꀉꒉꌠꎀꄉꀐ。 ꊾꂷꌠꄐꎖꄉꌠꐥꈎꆏꐽꏡꃅ76.7ꈓꊌ。 ꑲꁘꇣꆹꐛꅉꀀꑳꋈꄻꀱꌠ2600ꎖꃪꂷꐥ，ꂿꑘꁡꇤꑲꁘꇣꆹꄺꀱꌠ1700ꎖꃪꁯꐥ，ꊻꂷꂡꑻꐥꌠꇿꌌꎞꑳꏀꀀ。
ꉬꈎꅑꅸꇁꌠ，ꒆꉻꋦꈭꐛꐪꋍꁘꋍꁘꃅꀱꉾꇁ。 ꃅꌗ、ꒉ、ꊖꆊꍍꆀꄴꏮ“ꊰꏢ”ꌕꈨꌠꏤꄻꃄꌬꄷꀋꁧꊌꐨꈲꁧꇨꃅꊌꅜ。 ꌗꂓꇩꈐꒃꅐꈁꉬꁌꐨꊋꃹꐨ、ꒉꃹꐨꐯꇯ20％ꈋꉐꀁꋌꊰ，ꀋꉬꀋꉆꌠꍍꆀꎊꈬꋊꃑꃷꁨꐪꊛꄉꀁꋌꊰ，ꇓꈓꀋꂿꑘꌠꍍꆀꇨꌠꃅꑍꈮꁁꊨꒊ，ꌩꏪꃅꊂ1.63ꂡꂿꁦꎆ，ꂤꏂꅔꐛꌠꃄꅉꃅꊂꃅꈎꈓꌠꐽꏡꃅ2000ꐽꎏꉻꆏꀋꇈꊨꒊ，ꀊꃴꀻꎆꌠꊽꉌꇿꐨꇫꅐꇁ。
ꇫꈴꁧꊂꀊꉗꀋꐛꌠ2017ꈓꆹ，ꎆꏣꐧꋦꀻꎆꑞꅉꁻꌐꂿꃆꀋꉬꀋꉆꌠꐊꑷꃅꃅꇫꑟꄷꀋꁧꄐꄉꌠꏭꀋꋌꃅꉾ。 ꇩꈐꒃꅐꈁꉬꁌꐨ6.9％ꉀꎆ，ꀀꊿꊌꐨ7.3％ꉀꎆ，ꁦꎆꐳꐨꐯꇯꊼꇅꂴꈎꌠꏭꀋꋌ； ꇓꈓꏦꎫꃅꑘꊌꊿꀊꏀꃅ1351ꃪꑻꁦꎆ，ꃅꅍꀋꊌꐨꀉꑌꈎꅑꅸꇁꌠꇬꀁꑌꐯꀁꑌ； ꇮꑘꁦꎆꐳꐨꀱꄓꆹ，ꎆꏂꑘꍍ꒾21％ꉀꎆ； ꏱꎆꊌꐨ7.4％ꉀꎆ，ꁦꎆꐳꐨꀉꇖꌠꆽꈎꎼꇁꀐ； ꈏꃹꉇꅐꌠ14.2％ꉀꎆ，ꃶꐚꃅꌬꌠꉇꎆ1363ꂡꂰꑼꐥ、ꐩꋊꀊꂥꅉꀊꏀꌠꇬꑟ。 ꎆꏣꀻꎆꌠꆏꉀꎆꌠꌋꆀꊇꁧ、ꐛꉻ、ꈲꁧꐯꋽꐮꉾꌠꐛꊂꉾꃪꌠꇫꅐꇁ。 ꋋꆹꉬꈎꅑꅸꇁꌠꏱꁈꀉꒉꀊꂾꈧꌠꊌꐨꈲꁧꏓꊭꌠ，ꋍꑞꋋꁁꏯꀋꆏꃅꊋꇤ、ꀊꉗꃅꊋꏂꌠꊌꐨꉬ。
ꋌꃀꉬꈎꊌꅜꌠꋍꑞꋋꁁꏯ、ꀹꄻꐨꐥꌠꊌꐨ，ꏠꊐꀊꅼꃅ、ꊇꅉꃅꐛꐈꌠꆹ，ꉈꑴꋍꃢꋧꃅꀕꏮꇁꇬꉚ，ꇩꏤꑭꊂꊿꋅꈁꐥꌠꏓꂱꄚꄉꈐꄑꊋꄓꌋꆀꉌꊌꑊꒉꀐ。
ꉬꈎꅑꅸꇁꌠ，ꉪꊇꎔꎗꃅꐋꀨꑮꏣꀻꈯꄜꃅꄉꌠꄈꍏꑷꄐꇐꏤꁈꃅꈴꌬꈴ，ꀋꉬꀋꉆꌠꄚꊁꌤꋋꈨꃅꀐ。
（ꋍ）ꀋꎪꃅꎍꐽꃅꀒꁨꆹꌠꌤꃅꈁꉬꅉꃀꉉꈌꌭꈬ，ꊋꇤꄉꉻꒉꋊꐽꌠꏀꀺꌋꆀꄻꐛꒆ，ꎆꏣꏭꌬꌊꄉꄐꅉꐕꄉ、ꎍꐽꃅꉾꅉꉜꄉꆹꌠꃅꇬꅜ。 ꋋꈍꑋꈓ，ꋧꃅꎆꏣꀱꄓꇁꌠꊋꀋꑌ，ꇩꏹꎆꒉꎆꇁꃷꎏꄓꌦꊯꌦꃅ，ꀧꌋꃅꉪꏦꄇꇖꀕꃅꀑꄖꇁ。 ꉪꇩꏤꎆꏣꀻꎆꇬꐛꉻꃅꐙꌠꌤꃆꌋꆀꃹꅼꊐꌠꐮꄙꐨꑓꅐꎑꇁ，ꎆꏣꀁꋌꒉꌠꍅꊋꐪꊛꄉꁦꎆꇱ，ꑍꏯꈍꑍꏯꌊꊋꌠꀁꑌꃅꀋꊝ。 ꐛꐪꐛꊂꋋꈨꊝꇬ，ꉪꊇꄐꇐꏤꊋꄝꏦꀋꊰ，ꏟꈯꃅ“ꒉꀉꑌꃅꂋꊐ”ꌠꏭꃅꀉꇨꃅꌾꋊꌠꀋꃅꃅ，ꎆꏣꀻꎆꅉꀕꐛꄟꀊꏀꌠꄐꏁꌠꒃꇇꈐꊐꌠꇬꄉꄐꇬꎷ，ꋍꃱꃅꉀꎆꌠꎍꐽ、ꄺꀱꌠꊥꎆ、ꐛꉻꋊꄻ、ꏓꂱꐥꐨꈲ、ꐔꈔꉆꐨꄴꏮꌠꄐꏤ， ꀋꆏꃅꉻꒉꋊꄻꌠꏀꀺꌋꆀꄻꃪ，ꄹꈐꋊꄻꌠꉪꈜꌋꆀꃄꄟꏤꄉ，ꊋꀥꇱꄉꍜꐥꃅꋊꄻ、ꉜꄉꋊꄻ、ꊒꌸꃅꋊꄻ。 ꊨꄅꃅꊡꀱꇬꎆꏣꏭꌬꌊꄉꄐꅉꇬꎍ，ꃅꅍꁦꎆ、ꊌꐨꉀꎆ、ꋦꈭꄻꃪꑲꆏ，ꉌꊋꏓꄉꄺꀱꌠꊥꎆ、ꐛꉻꋊꄻ、ꇙꊋꇱꄻꄷ。 ꃄꄟꀋꃋꑌꈲꉈꑴꀊꅰꃅꀊꎴꃅꈲꌠꌊꌬ，ꊋꇤꄉꇲꁵꁁꏯꐛꉻꃅꐙꌠꄺꀱꌠꄹꎆ，ꄉꄐꃅꉬꇮꈉꐨꍔꒉ，ꇲꈉꇘꄟꐮꆽꏣꌠꀊꅰꃅꀊꂥꏠꊐꌠꃅꇫꑟꌠꄹꇙ。 ꎭꅧꃅꊋꇤꇈ，ꎆꏣꀁꋌꊰꌠꍅꊋꉪꊇꄙꄉꀐ、“ꇨꃅꀏꐛ”ꇁꌠꋒꐵꇧꎭꀐ，ꎆꏣꐳꐨꐧꀠꀊꂥꃅꉀꎆꌠꄝꏦꀋꊰꃅꄉꀐ，ꐛꉻꄻꃪꌠꊥꎆꀐ，ꎆꏣꀊꉗꃅꃪꏯꉜꄉꆹꌠꀑꐱꐛꐨꀋꆏꃅꄻꈬꌋꆀꀻꎆ。
ꏣꀋꑌꌠꏱꎆꏱꁈꌋꆀꎍꐽꌠꎆꃀꏱꁈꌫꄻꇬꎷ。 ꏱꎆꊌꐨꌬꐨꐮꄙꐨꊼꇅꀉꒉꌠꐛꐨꇂꃴꄉ，ꑓꏮ“ꒉꃑꉛꉘ”、ꊋꂫꀉꇨꌠꇬꉜꄉ，ꉪꇩꏤꂴꅑꄉꀉꒉꃅꇗꏸꊨꌫꁌꒊ。 ꏤꊭꁸꄉꐊꑷꃅꃼꇇꇗꏸꄺꀱꌊꁌꎆꇗꏸꐛꌠꄹꁊ，ꀰꏢꇗꏸ66ꈓꎴꌠꐩꋊꌐꆏꇧꎭꀐ， ꏓꌗꎼꇁꇬꇗꏸ2ꃪꂡꂷꐂꌠꊨꒊ，ꉈꑴꎆꏂꑘꀄꊭꌠꇗꏸꎴꈲꁵ、꒔ꑞ꒔ꑵꁌꎴꌠꑠꏡꁈꌫꄻꌠꇱꇬꆏ，ꐯꇯꃷꎏꀨꄜꃣꁧ3ꃪꎖꂡꂷꊨꑾꌙ。 ꊋꀥꇱꄉꃅꄷꍔꃚꎝꈣꏲꂠ，ꃅꄷꍔꃚꏓꊭꎝꈣꊐꃷꁨꀠꆦꌠꃄꌬ，ꇔꊰꃣꁧ1.2ꃪꂡꂷꀁꋌꊰ。 ꏱꎆꌬꐨꐛꉻꋊꄻ，ꉱꑘꎆꀨꀰꏢꐛꀕ，ꉹꁌꐥꐨꅉꀨꌋꆀꐘꃆꀋꉬꀋꉆꌠꏦꀧ。 ꏱꎆꌫꁏꇔꐨꋎꍅꌊ3％ꈍꈐꄉꇬꎷ。 ꎆꃀꏱꁈꎍꐽꎃꐚꌠꄝꏦꀋꊰ，ꀊꐯꄜꇐꎆ꒜M2ꉀꎆꐳꐨꀁꋌꉜꄉꊰꃅꐙ，ꉌꒊꎆꉛꌋꆀꐧꋦꎆꏓꄉꈁꄉꄐꃅꉀꎆ。 ꍜꐥꃅꊭꄎꎆꀁꋌꊰ、ꌐꁨꐘꃆꉈꑴꎆꉛꑠꍣꐨꐥꃅꐙꌠꏱꁈꌊꌬ，ꊋꀥꇱꄉꀋꉬꀋꉆꁆꏯꌋꆀꊋꁧꅉꇬꊋꁈꄏ，ꎆꏂꑘꀄꊭꌠꎆꉛꐳꐨꆹ꒔ꑞ꒔ꑵꎆꉛꐽꏡꐳꐨꂦꀋꋌ。 ꉇꎆꀟꄻꁌꐨꃷꎏꈴꃅꏓꐛꌠꉺꏦꄺꀱꐛꒆ，ꏓꂱꀙꉇꎆꐮꀠꁌꐨꀑꐱꃅꎍꐽꄉ，ꉇꎆꊭꊎꌠꀁꋌꊰꌠꇬꄉꏮꉀꆹ。 ꋭꋽꃅ“ꎆꀋꇎ”ꑠꎆꒉꎆꇁꃷꎏꐋꀋꌡꃅꇙꈧꌠꊜꄻ，ꎆꒉꎆꇁꃷꎏꐥꀹꋊꍬ，ꀋꉬꀋꉆꁁꏯꐔꈔꉆꐨꄴꏮꋊꑣ，ꉻꑫꃅꐙꌠꐔꈔꉆꐨꅐꀋꇁꌠꂫꑟꐏꄉꀐ，ꇩꏤꎆꏣꎆꒉꎆꇁꀋꁮꀋꑍꌠꀧꌋꃅꄉꀐ。
（ꑍ）ꏟꈯꃅꇲꁵꁁꏯꐛꉻꃅꐙꌠꄺꀱꌠꌌꀨꑟꃅꄉꇬꎷ，ꊋꇤꄉꇙꊋꀊꏀꌠꉘꉚꀉꇨꆹ，ꎆꏣꐛꉻꐳꃅꄻꃪꊐꐕ。 ꏟꈯꀕꃅꄺꀱꌠꉈꊪꄉꎆꏣꀻꎆꌋꆀꐛꉻꐮꆽꀋꏣꌠꊋꋠꅍꋊ꓂，ꊋꀉꒉꃅꇤꄉꏀꄓꅐꑘꀻꎆ，ꋊꃅꅐꑘꄺꀱꊐꐕ，ꇲꁵꉻꑫꊇꁧꌋꆀꑘꅐꐨꐕꀊꂥ。
ꏟꈯꃅ“ꌕꊨꋍꍅꋍꅋ”ꌠꄹꎆ。 ꉬꈎꅑꅸꇁꌠ，ꇓꃀꀕ、ꐽꀻꋤꇓꑠꊁꊰꅐꊋꇤꇧꎭꌠꅉꃀꀂꏽꄉ，ꇤꎸꅍ、ꊖꌋꑠꉹꑘꌌꀋꉬꀋꉆꌠꃅꄉꅐꊋꊨꌠꇬꊋꃤꁦꎆꃅꇱ，ꍏꑷꏱꎆꌐꐘꁥꁵꎆꃀ1000ꂡꃪꂷꄐꁆꌌꇫꊋꄏꄉ，ꌌꌤꃅꊿꁸꈴꁆꄻꌠꀂꏽꌬ。 ꇤꎸꅍꅐꊋ1.7ꂡꄓꈋꉐ、ꊖꌋꅐꊋ8ꂡꄓꎞꅐ，ꌤꃅꊿ110ꎖꃪꑻꁸꈴꁆꄻꄉꀐ。 ꇓꈓꉜꄉꏱꁈꌬꉹꁸꄉꄐꂘ，ꇓꈓꌕꊐꇖꊐꌠꇬꃷꇐꀀꑳꀋꃷꃅꇫꄉꌠꊨꌠꊌꐨꄇꇖꀕ，ꂅꈿꇓꈓꑲꁌꉀꄓꐨꋎꍅꄉꀐ。 ꏣꀋꑌꎍꐽꃅꆷꄿꊨ，ꎝꈣꄉꈁꋎꍅ，ꇴꍆꌅꈌꎆꏓꁦꎆꇱ，ꇮꑘꎆꏂꑘꁨꇐꎝꁭꐨꊛꄉꀁꋌꊰ，ꉻꒉꆷꄿꐛꐨꁌꄓꐨꄇꇖꀕꃅꋏꆸꀄꊭ、ꉻꄜꎍꐽꃅꐙꇁ。 ꏡꁈꀉꑌꑵꃅꏂꄉꀨꊰꊨꒊ，ꍔꃚꃅꐙꌠꎆꀨꐘꃆ30％ꊨꒊ，ꍏꑷꍔꃚꊐꌠꇬꄻꄉꌠꎆꏂꑘꃆꂮꐥꌠꁌꎴꐘꃆ60％ꈋꉐꊨꒊ，ꋍꊭꃅꐙꌠ“ꉬꀧꋍꎆ”ꁌꏮꍆꁧꊨꒊ，ꊋꌬ、ꎊꈴ、ꄆꑠꑠꀨꊰꊨꒊꌠꄹꇙ。 ꀋꂿꑘꌠꌌꑓꅐꎑꄉꀋꇎꀋꂪꅉꅋꑣꌠꊋꀥꇱ。
ꐳꃅꏀꆹꀻꎆꇙꊋꐪꊛꆹꏮ。 ꃹꅼꃅ“ꐮꈴꈄꏍ＋”ꃅꐨꃄꄻ，ꅓꏆꉪꋧꍞꏲꌠꃄꌬ，ꃷꁨꊫꌐꀉꒉꌠ、ꃅꄂꌗꏢ、ꎊꇐꏓꇱꈄꏍꀊꐯꈭꃅꌬꈧꌠꄹꇙ，ꏀꄓꅐꑘꍅꁍꀕꃅꀻꎆ，ꋊꃅꅐꑘꃹꅼꃅꄺꀱ。 “ꍏꇩꄺꂡ2025”ꃄꌬ，ꇮꑘꅉꃀꄻꀉꇨ、ꀑꁮꄐꊋꄺꂡ、ꀊꃴꄺꂡꑠꀉꒉꀊꂾꌠꋉꃆꄹꎆ，ꂴꅑꄺꂡꑘꐳꃅꀻꎆ。 ꀋꃋꋋꄮꁧꃤꃅꑘꄺꀱꁉꃑꃄꁈꏤꄻꅐꇁ，ꁧꃤꃅꃅꑘꐛꄟꀊꏀꌠꈁꏦꀊꏀꌠꅐꏀꊋꄓ，ꋍꑞꋍꉹꐮꉔꊐꐕꌠꇬꊥꎆꀐ。 ꃹꅼꃅꂿꑘꇲꁵꁁꏯꐛꉻꃅꐙꌠꄺꀱ，ꀊꏀꉹꌠꀰꏢꉻꄜꀉꑌꃅꅐꇁ，ꊪꏽꑘꄉꈁꄉꄐꃅꀰꏢꌠꍆꐨ30％ꇬꄉꉀꐕꌊ40％ꈋꉐꑟ。 ꏁꁈꌬꄉꐧꀠꀁꑌꃅꊌꌠꊿꊌꐨꁦꎆ，ꋊꃅꌬꈧꌠꉀꐕꊐꐕ、ꏀꄓꌬꈧꌠꐳꃅꅐꇁꌠꄹꇙ，ꈄꏍꇬꄉꈘꆽꃅꃷꌠꃷꁨꃅꈎꈓꌠꐽꏡꃅ30％ꉀꎆ，ꐧꋦꌬꈧꎊꇐꈘꆽꃅꃷꌠꈁꉬꃷꁨꃅꈎꈓꌠꐽꏡꃅ11.3％ꉀꎆ。 ꎆꊐꐛꉻꄻꃪ，ꉹꁌꎆꇱꌠꊋꊡ，ꍔꃚꎆꇱꆷꇙꂿꄐꋊꇤꅐꇁ，ꎆꀨꀊꅰꀉꑌꌠꄐꏁꌌꅉꃀꀉꇨ、ꊋꂫꊋꑌ、ꉹꁌꐥꐨꈲꌠꁁꏯꇬꇱ。 ꐳꈴꎸꈜꎞꎭꀰꏢꆏꈉ9000ꎖꉻꆏꇬꄉꁦꎆꌊ2ꃪ5ꄙꉻꆏꇬꑟ、ꋧꃅꇬꌕꁧꋊꑍꁧꍆ，ꐳꈴꄇꈜꆏꈉ9.6ꃪꉻꆏꇬꄉꁦꎆꌊ13.6ꃪꉻꆏꇬꑟ，ꀊꏀꃅꋈꄻꌠꂿꑘꁡꇤꄇꈜ127ꃪꉻꆏꐥ，ꉹꁌꌬꃏꏸꐛꅉ46ꂷꀊꏀꃅꋈꄻ，ꈲꒉꋉꃆꀉꒉꀊꂾꌠ122ꐘꇇꄀꄉꋈꄻ， ꀊꏀꈭꌠꂿꑘꁡꇤꄆꈄꏍꄺꀱꌠꄻꌐ，ꅉꆺꑭꊂꀉꒉꐯꀉꒉꌠꇙꊈꐳꏣꈄꏍꋈꄻꐛ。 ꉬꈎꅑꅸꇁꌠ，ꀊꏀꇙꊋꀻꎆꌊꐳꃅꀉꇨꇁ，ꎆꏣꉀꎆꌠꀋꉬꀋꉆꌠꎆꇱ、ꉇꅐꌠꈺꇙꌠꉘꇉꌠꇬꄉꌬꈧ、ꎆꇱ、ꉇꅐꌠꐯꇯꈺꇙꌠꇬꉘꇉꌠꇬꉜꄉꆹꏮꌠ，ꀋꉬꀋꉆꌠꅐꑘꑍꉹꌠꈺꇙꌠꉘꇉꌠꇬꄉꅐꑘꌕꉹꐯꇯꈺꇙꌠꉘꇉꌠꇬꉜꄉꆹꏮꌠꃅꇫꑟ。 ꋋꆏꉪꊇꀉꑌꈎꃅꉪꇫꑟꄎꃅꇫꑟꀋꄐꌠꀉꒉꀊꂾꌠꐛꉻꃅꐙꌠꐛꐈꌠꉬ。
ꇲꁵꁁꏯꐛꉻꃅꐙꌠꄺꀱꌠꄹꎆꇬ，ꀋꎪꃅꐊꊈꃷꎏꈴꃅꁆꇱꌠꇬꈭꋍꈜꇈꌠꋊꑣꇧꎭ，ꄹꏦꐨꐥꌠꃼꇇꀨꊰꄻꀁꋌꊰꌶ。 ꀊꉗꃅꇫꐥꌠꍤꄻꈌꁧꌠꉜꁨ、ꍞꏲꌠꉜꀋꁨ、ꁧꃤꃅꊋꁧꌠꌤꃆꏭꌐꄉ，ꉪꊇꆏꐪꊛꄉꃹꅼꃅ“ꄝꏲꃅ”ꃅꄉꄺꀱ，ꐳꃅꍔꃚꌅꊋꆹꏮ，ꉻꐭꏲꂠ、ꈛꎂꈌꄀꇇꏿꌠꊨꀁꑌ，ꉻꒉꋊꄻ、ꃷꎏꍞꏲꌋꆀꋍꏅꁧꃤꃅꌠꊋꀥꇱꌠꉜꁨ。 ꉬꈎꅑꅸꇁꌠ，ꇩꃷꑼꌤꏲꅉꏲꑘꍤꄻꈌꁧꌤꐘ44％ꊨꇧꎭ，ꏲꑘꍤꄻꈌꁧꌠꀋꉬꌠꉱꋃꃅꆏꇧꎭ，ꍏꑷꍔꃚꁁꏯꍤꄻꈌꁧꄉꌠꎆꏂꑘꎆꇱꐘꃆ90％ꀁꋌꊨ，ꏲꑘꍤꄻꈌꁧꇢꈴꁧꃤꃅꌤꐘ74％ꊨꒊ，ꃅꑘꇎꏦꈌꁧꌠꌋꆀꏚꍆꌠꀉꒉꃅꊨꒊ。 ꍏꑷꍔꃚꁌꏤꏤꄻꐘꃆ80％ꊨꒊ，ꃅꄷꍔꃚꁌꏤꏤꄻꐘꃆ50％ꈋꉐꀁꋌꊨ。 ꐊꑷꃅꇬꎭꁱꄀ、ꎆꀨꁱꄀꑠꃼꇇꌤꃆꄹꏦꄺꀱ，ꎆꏂꑘꀞꄻꄮꈉꌕꁧꋊꋍꁧꈋꉐꊨꀁꎴ。 ꌤꃅꄮꇬꌤꃅꌐꈭꐨꇬꍞꏲꌠꏀꀺꌋꆀꊋꀥꇱ，“ꑍꈁꏾꌋ、ꋍꄇꄜꋊ”ꌠꃄꌬ，ꈁꏾꃅꍤꄻꊿꌋꆀꍤꄻꊜꀠꌋꅐꇁ、ꐳꃅꍤꀞꄽꂫꐛꐪꌌꄇꄜꋊ，ꍞꏲꂿꄐꌋꆀꎃꊒꐨꉀꐕꀐ。 “ꐮꈴꏍꈄ＋ꏲꃆꁧꃤꃅ”ꌠꌌꌬ，ꋍꈚꋍꃢꃅꀞꄻꑠꏡꁈꃄꌬ。 ꃼꇇꀰꏢꋦꈭꄇꇖꀕꃅꄻꃪ，ꃷꎏꍄꑐꊋꃤꄇꇖꀕꃅꀉꇨꆹ，ꉹꁌꌤꀞꇬꄇꇖꀕꃅꈝꐮ。
（ꌕ）ꀋꎪꃅꏀꀺꌠꌌꀻꎆꌠꈻꏁꌠꌭꈬ，ꊋꏂꄉꐧꋦꁦꄻꊋꃤꄖꄑ，ꉻꄜꏀꀺꄐꊋꌋꆀꅐꐨꄇꇖꀕꃅꉀꐕ。 ꏀꀺꌠꌌꀻꎆꌠꅸꇙꌠꄐꇐꃄꌬ，ꏀꀺꒆꉻꄻꃪ，ꀨꄜꀉꑌꃅꋮꄮꐊꃅ、ꋍꑞꋍꁁꏯꃅꄹꎆꌠꏀꀺꐛꐪꏓꐛ。 ꈆꑪꎥꃪꏲꉻꌋꆀꌶꅉꀊꂥꊐꌠꈆꑪꎥꃪꑴꌅꌅꈌꍔꒉ，ꈆꑪꎥꃪꐘꃆꌋꆀꌫꎆꏲꂠꌠꄻꃪ，ꃹꅼꃅꈆꑪꇮꇐꊌꐨꌅꈌꈲꁧꏲꂠꌠꄺꀱ。 ꐊꑷꃅꏀꀺꄺꀱꋒꃯꌠꄹꎆ，ꀙꏢ、ꎮꉰꈆꑪꇮꇐꏀꀺꈯꄜꋈꄻꌠꊋꁈꄏ，ꇩꏤꑴꌅꏀꀺꌶꀠꐛꅉ14ꂷꀊꏀꃅꋈꄻꄉ，ꃄꁕꏀꀺꀊꂥꅉꈨꐛꇁꌠꈺꇙ。 ꎆꏂꑘꌌꀨꄜꃅꄉꇮꇐꏀꀺꉻꑫꋈꄻꌠꊋꀥꇱꄉ，ꇩꏹꋓꅔꊋꃤꐥꌠꏀꀺꉹꌠꎆꏂꑘꌋꆀꏀꀺꉹꌠꎥꃪꀖꁉꏲꉻꈨꅐꇁ。 ꃹꅼꃅꋍꏅꑘꀺ、ꉹꁌꏀꀺꌠꃅ，ꈲꈴꃅꐙꌠꊋꁈꄏꏱꁈꃄꌬ，ꃹꀿꉻꑫꄻꃪ。 ꋍꑞꋍꑵꃷꎏꀨꄜ9800ꎖꃪꁯꇬꑟ，ꋋꉬꈎ70％ꈋꉐꁦꎆ。 ꇩꈐꇿꋌꐥꌠꁧꀿꌐꈲꌅꈌꐥꌠꃷꁨꑍꁧꁦꎆ，ꇮꇐꃼꇇꃷꁨꋍꁊꀱꀐ。 ꉪꇩꏤꈆꑪꇮꇐꏀꀺꌠꆹꐊꀥꀨꄉꌠꇬꄉꏭꆦꌊꀉꑌꁁꏯꌠꇬꐯꇯꀥ、ꂴꐊꄉꀥꃅ，ꅉꆺꋋꂷꇬꃅꇫꉜꁨꌠꏀꀺꑘꀺꌄꆣꅉꈚꐛ。
（ꇖ）ꐊꑷꃅꃹꅼꃅꄺꀱꌠꌭꈬ，ꊋꇤꄉꏦꉻꉺꏦꆐꅑꌠꀜꋊ，ꀻꎆꇙꊋꀋꆏꃅꀉꇨꆹ。 ꇩꁨꀕꇐꇩꁨꎆꏂꑘꄺꀱꌠꀉꇨꃅꄹꎆ，ꇬꌦꄹꏦꄺꀱꌠꀑꐱꃅꃅꌐ，ꐅꄻꏓꀱ、ꏠꊐꍅꊨ、ꊇꁧꉀꐕꅐꐨꁦꎆꌠꁨꎆꐨꏣꀋꑌꌠꊌꅜ。 ꇩꁨꎆꏂꑘꊌꐨꈲꁧꄇꇖꀕꃅꉾꇁ，ꀋꉊꄻꈎꍍꊵ23.5％ꉀꎆ。 ꃹꅼꃅꊋꀦ、ꎸꈜ、ꋂꑘꑠꁁꏯꄺꀱ。 ꉻꁨꏦꀋꉬꌠꎆꏣꃷꎏꈏꃹꉆꎻꌠꄝꃑ。 ꀋꇙꁨꇐꋍꃱꃅꁱꄀꌠꄹꏦꄻꐛ。 ꁨꇐꌅꈌꀧꌋꃅꄹꏦꄻꃪ。 ꏱꎆꇗꏸꄺꀱꌠꁨꎆꐨꀉꒉꀊꂾꃅꊌꅜ，ꐊꑷꃅꏱꎆꄐꌗꌗꂫꇽꌠꌌꄇꄜꋊꌠꃄꌬ，ꐯꇯꈲꌠꇗꏸꌌꀨꄉꌠꍏꑷꌋꆀꃅꄷꊌꐨꁷꄻꐛꄟꏓꄻ，ꍏꑷꌋꆀꃅꄷꏱꎆꌤꆿꌅꈌꌋꆀꌬꐨꃅꎁꁷꄻꄺꀱꌠꃄꇬ，ꍏꑷꃅꄷꏭꎃꐚꃅꐙꌠꆹꏮꁵꄻꄉꈁꀉꒉꃅꁦꎆ、 ꌐꐘꆹꏮꁵꄻꐘꃆꌕꁧꋊꑍꁧꊨꇧꎭ。 ꇔꊰꍆꁧꏱꏢꌠꀑꐱꃅꄝꃑ，ꎆꊐꄜꏂꀧꄹꏦꄻꐛ，ꀉꒉꐧꀠꉹꌠꃼꇇꑘꑴꉴꁊꈲꎆꒉꎆꇁꌤꑘꀯꀞꌠꄹꇙ，ꃹꅼꃅꏱꁈꃅꐙꌠ、ꀖꁉꃅꐙꌠꎆꒉꎆꇁꏲꉻꄺꀱ，ꎆꒉꎆꇁꍞꏲꋮꄮꉺꏦꄻꀉꇨ。 ꄔꐽꃅꂘꑘꏓꇱꄺꀱꌠꄹꎆ，ꇓꈓꇓꉈꋭꑘꉙꂘꐮꆽꏣꃅꀻꎆꌠꊥꎆꉺꏦꄻꐛꒆ，ꌶꎖꌶꌺꎹꄹꏦꄺꀱ。 ꇓꈓꇓꉈꀀꊿꅉꀨꃀꌠꀨꎹ、ꆅꉁꄜꏂꀧꄹꏦꋍꃱꃅꐙꌠꄻꐛ，ꌤꏲꅉꌤꑘꌤꃅꅉꌋꆀꎆꏂꑘꃀꌠꀨꎹꄜꏂꀧꄹꏦꏓꐯꇯꌠꃅꇫꑟ。 ꇩꁨꎆꀨꄹꁆꁷꏮꌊꐧꋦꄜꏂꀧꎆꀨꇬꊋꀥꇱꌠꄐꉻꏤꁱꅐꇁ。 ꆅꉁ、ꆅꉁꀧ、ꉃꄻꁬꋌꏓꇙꄺꀱꌠꃄꌬ，ꐊꑷꃅꉻꀞꆅꉚꅉꏓꇱꄺꀱꌠꄹꌬ，ꀊꉗꃅꃄꌬꌠꁬꋌꁌꁦꎆꇱꏱꁈꇤꇧꎭꀐ，ꁬꋌꆅꉃꉁꈾꈌꁧꄹꏦꄺꀱꌠꂵꅐꐨꐥ。 ꂿꑘꁡꇤꀧꃅꃄꅉ“ꌕꌅꈌ”ꁷꄻꄺꀱꄹꎆ、ꌅꈌꊨꄅꌠꃅꊂ80％ꇬꐂ，ꀋꉬꀋꉆꌠꂿꑘꅐꇐꎴꊐꄹꏦꄺꀱ。 ꀨꄜꂿꄐꐛꅉꄹꏦꄻꐛꒆ，ꒆꉻꌧꑳꃅꐨꇿꋌꎖꑞꌋꆀꅑꃤꎹꄹꏦꄻꐛ，ꒊꃀꏲꌋꄹꏦ、ꎾꃝꏲꌋꄹꏦꃄꌬ，ꌜꊐꌠꈍꐯꋦꈭꌋꃅꏲꉻꎂꊒꏲꂠꄹꏦꄺꀱꃅꉚꌠꃅ。 ꋍꑞꋍꁁꏯꄺꀱꌠꃹꅼꈴꄉ，ꎆꏣꐧꋦꊛꄉꉾꃪꃅꀻꎆꌠꄹꇙꀐ。
（ꉬ）ꉇꉻꏭꁉꃑꌠꅉꀨꇩꁈꌭꈬ，ꊋꇤꄉꇷꃅꐯꇯꈲꌠꃅꇫꑟ，ꁉꃑꉹꌠꎆꏣꑟꐨꄇꇖꀕꃅꉀꐕ。 “ꋍꁕꋍꈜ”ꐯꇯꋈꄻꌠꄕꊪꌋꆀꄹꇙ，ꑸꍏꅉꃀꉁꈾꎆꊐꑴꉴꀞꄻꌠꄖꄑ，ꏦꍠꈝꃀꎆꀨꏓꄻ，ꐯꏑꐮꈴ、ꎆꏣꃼꇇꇷꃅꐘꃆꀉꒉꀊꂾꈨꀞꄻꄉꀐ。 ꎮꉰꑠꌜꏃꇬꄉꑴꌅꃼꇇꃅꉚꅉ11ꂷꄻꐛ，ꄺꀱꃅꉚꊌꐨꈨꌌꇩꏤꑭꊂꃅꄹꌬ。 ꉇꅐꇗꏸꈪꀵꉺꏦꄺꀱ、ꇗꏸꈪꁦꎆꃷꁨꉬꇮꃅꍏꑷꏱꎆꌌꁵ，ꋯꐂꄆꌅꃼꇇꏓꇱꃅꉚꅉ13ꂷꄻꐛ，ꇩꏹꃼꇇ“ꌍꑓꀉꄂ”ꇩꏤꑭꊂꃅꉱꑷ，ꎊꈬꈴꀸꇬꈴꌠꄮꈉꈮꁁꈋꉐꊨꀁꎴ，ꈏꃹꉇꅐꌠꀱꎍꐽꉾꇁꌠꃅꇫꑟ。 ꇩꉈꃼꇇꃅꊿꎆꇱꌠꍤꄻꈌꁧꄹꏦꆹꏮꌊꏢꑲꁁꏯꃷꁨꋏꄯꒉꏲꂠꌠꇬꇁ，ꏢꑲꐨꐥꌠꏡꁈꌕꁧꋊꑍꁧꃅꊨꑣ。 ꉇꄅꃼꇇꃅꊿꎆꇱꐛꉻꄻꃪ，ꇮꇐꀊꂥꅐꑘꍆꐪꋍꁧꉀꐕ。 ꀉꇨꃅꀑꁮꊋꃤꈻꎷ，ꍏꇩꌤꃅꇁꌠꉇꄅꇩꏤꌐꁨꌧꃀ40%ꉀꎆ。 ꉇꉻꎆꇱꌠꄐꏁꌌꁣꀋꐥꃅꀻꎆ。 ꇩꏹꅐꊋꇷꃅꌠꄹꎆ，ꐳꈴꎸꈜ、ꉿꄆꑠꉁꈾꋧꃅꇬꃹꆹ。 ꑴꌅꃼꇇꋯꏤ8ꂷꀊꏀꃅꏤꄻꌋꆀꊐꐕ。 ꃛꇤꐮꈴ、ꎸꇤꐮꈴ、ꎝꃆꊫꌐꐮꈴꌠꐯꊛꄉꃄꇬ，ꏓꂱꀙꎆꃀꇩꏹꎆꃀꎆꀨꎀꍹꐋꀋꌡꌠꎆꋊꌅꈌꎆꃀꊐꅍꇬꃹꆹ，ꏓꂱꀙꎆꃀꇩꏹꌬꈴꆹꌠꑭꁘꀋꉬꀋꉆꌠꐕꎼꆹ。 ꍏꇩꁉꃑꌠꍔꐯꄉ，ꊋꑌꏡꑌꃅꑴꑲꀻꎆꌠꊥꎆꀐ，ꋧꃅꏭꊜꋽꄮꀉꒉꀊꂾꌠꌌꇬꁳꀐ。
（ꃘ）ꃄꁕꋮꄮꃅꀻꎆꌠꌋꆀꀊꏀꉹꌠꇓꈓꏦꎫꐛꈴꄐꇐꃄꌬꌠꌭꈬ，ꊋꇤꄉꐮꆽꏣꃅꀻꎆꌠꄹꇙ，ꀊꏀꌠꉀꎆꊧꉀꎆꁕꐳꃅꉀꒆ。 ꏣꀋꑌꃅꏢꏸꏹꋮꐊꃅꀻꎆ、ꍤꏦꎆꏣꃄꁕꀻꎆꌠꄹꎆ，ꄚꃆꂮꐥꌠꄐꎖꏓꏤꃅꌫ，ꐘꃆꀋꉬꀋꉆꑠꈨꋈꄻ。 ꁮꐚꏭꀖꁉ、ꑌꌋꈤꏭꄖꄑꍄꑐ、ꈯꄔꏭꉀꄓ、ꁭꅐꏭꂴꅑꄉꀻꎆꌠꏭꊥꎆꌠꄺꀱꏀꀺꏡꁈꈨꏤꄻꎼꇁ。 ꀉꇨꃅꇝꂱꀉꆹꃅꄷ、ꊿꋅꃅꄷ、ꃅꋮꃅꄷ、ꌢꎭꃅꄷꄏꐓ，ꊋꀥꇱꄉꑭꊗꇇꀨꑟꏦꇇꀨꏾꉰꇇꀨꌠꌤꃅ。 ꊱꁨꃅꎿꃀꀧꌋꃅꌠꌋꆀꀖꁉꌠꄹꎆ。 ꇓꈓꀋꉬꀋꉆꈧꌠꄐꎖꌠꃅ，ꇓꈓꀉꒉꐧꀠꀄꊭꌠꌋꆀꇓꈓꏦꎫꀄꊭꌠꋮꄮꃅꀻꎆꌠꊥꎆ。 ꇓꈓꀉꑌꌠꑱꈿꏢꑲꐨꄝꃑ，ꀀꄻꊫꌐꄹꏦꐊꑷꃅꃄꌬ，ꇓꈓꏦꎫꅉꀨꋍꏅꁧꃤꃅꌠꆹꊻꂷꅉꀕꀀꌠꇬꉜꄉꉱꑷꆹ。 ꇓꈓꇓꉈꃄꁕꀻꎆꋮꄮꐨꄇꇖꀕꃅꀉꇨꆹ。
（ꏃ）ꏓꂱꈯꄜꃅꄉꌠꀻꎆꉪꇐꌭꈬ，ꊋꇤꄉꏓꂱꐥꐨꏦꀧꌋꆀꄻꃪ，ꏓꂱꉹꁌꊌꐨꀋꆏꃅꀉꇨꆹ。 ꎆꊋꊋꋠꌠꐛꐨꇂꃴꄉ，ꐪꊛꄉꀉꇨꃅꏓꂱꐥꐨꇬꎆꇱ。 ꐊꑷꃅꊒꌸꃅꌢꎭꄏꐓ、ꊒꌸꃅꎭꑆꇔꌠꄹꎆ，ꍏꑷꋍꃱꃅꄐꏤ、ꌜꈬꆸꃅꆽꎍ、ꏃꑤꃅꇫꑟꌠꒃꉇꌠꌤꃅꉺꏦꄻꐛꒆ，ꍏꑷꏱꎆꉬꈎꌠꌐꄉꌢꎭꊋꄏꎆꃀ2800ꎖꂡꂷꇱ。 ꏣꀋꑌꌠꃅꑘꊌꏱꁈꃄꌬ，ꉹꁌꀋꉬꀋꉆꌠꃅꑘꊌꌠꏦꀧꌠꊼꇅꉾꌠꊌ。 ꂘꑘꌌꂴꄉꀻꎆꌠꌭꈬ，ꏱꎆꃅꐙꌠꂘꑘꌫꎆꆹꇩꈐꒃꅐꈁꉬꁌꐨꍆꁧꇬꍆꌠꐪꊛꄉ4%ꄩꐂ。 ꂿꑘꁡꇤꋭꑘꂘꑘꊋꁧꌶꅉꌷꀞꇎꏦꄻꃪ，ꂿꑘꁡꇤꂘꃀꊌꐨꉀꐕ，ꈲꋌꄻꃪꄐꎖꈲꏣꁵꅷꂿꑘꁡꇤꌶꌺ3600ꎖꃪꑻꇬꑟ。 ꋧꃅꀨꏠꌠꒉꌶꅉꌋꆀꀨꏠꌠꌷꑫꋈꄻꌠꃄꇬ。 ꀋꉬꀋꉆꌠꌶꅉꀊꂥꊐꌠꌐꄉꂿꑘꁡꇤꌋꆀꌢꎭꃄꄸꌶꌺꎖꎷꃷꁨ1ꃪꑻꇬꄉꉀꎆꅷ10ꃪꑻꇬꑟ。 ꀉꇨꃅꋍꑞꋍꑵꌠꌶꅉꇬꑱꁯꌢꎭꌶꌺꏭꇇꀨ，ꊻꂷ4.3ꂡꑻꃢꈲꊌ。 ꑘꃅꈎꄜꊻꂷꐽꏡꃅꌌꉙꂘꋻꌠꈎꄜꉀꐕꅷ10.5ꈎꇬꑟ。 ꀀꊿꆅꉁꆄꄻꄜꏂꀧꇬꊾꂷꌠꐽꏡꃅꏱꎆꇇꀨꌠꎕꏦ240ꂷꇬꄉꉀꐕꅷ450ꂷꇬꑟ，ꆄꒉꈺꒉꄜꏂꀧꄹꏦꀑꐱꃅꄻꐛ、ꊻꂷ1700ꎖꃪꑹꃢꈲꊌꀐ，ꀉꁁꃅꄷꄉꆅꉚꑱꑼꇬꀀꌠꎆꃀꈛꎂꃅꌗꁵꌠꃅꇫꑟ，ꊐꁸꄉꆅꉚꌋꆀꆅꉚꅉꏓꄜꋈꄻꌠꐳꀥꇱꄉꄹꎆ。 ꐪꊛꄉꋭꋽꃅꎞꆏꊿꅉꀨ꒜ꌠꀨꎹꎆꉀꐕ。 ꀁꂥꏦꀧ、ꀨꎹꈲꏿꑠꎕꏦꉀꐕ，ꐧꋦꈭꋏꇇꀨꄹꏦꄻꐛꒆ，ꀁꂥꏦꀧꊿꌋꆀꎭꅼꇨꌠꉹꁌ6000ꃪꑻꀋꇈꐥꌠꅉꀨꐥꐨꏦꀧꄉ。 ꊿꊋꋠꌠꌋꆀꀉꇨꃅꄣꅐꌠ“ꀥꁵꎆꑍꐘ”ꄹꏦꄻꐛ，ꊿ2100ꎖꃪꑻꈲꊌ。 ꐊꑷꃅꀉꑳꑍꂷꉘꉆꌠꏱꁈꃄꌬ。 ꅉꂫꊐꌠꄉꉻꁱꀕꁧꃤꃅꌠꄻꀉꇨ，ꐳꃅꁱꀕꌤꑘꀻꎆ，ꁱꀕꅐꑘꃅꈎꈓꌠꐽꏡꃅ13％ꈋꉐꉀꎆ。 ꉹꁌꃅꇭꀧꄜꎟꌠꀊꐯꈭꃅꍔꃅ，ꈯꎟꃅꊿꇨꃅꊌꐨꉾꌠꊌꅜ。
（ꉆ）ꃰꊿꌋꆀꋌꐛꐮꄮꃅꀻꎆꌠꌭꈬ，ꊋꇤꄉꋦꈭꍍꆀꌠꏱꄻ，ꒆꉻꌧꑳꋈꄻꌠꊌꐨꄇꇖꀕꃅꐥ。 ꒉꎔꃪꎔꌠꆹꐎꁧꏂꁧꉬꌠꉪꇐꑌꄉ，ꋌꃀꐥꀋꋻꌠꉌꊋꌋꆀꇨꐨꌌꄉꒆꉻꋦꈭꀧꌋꃅꌠꊋꀥꇱ。 ꇵꊫꀉꇨꃅꋏꌊꃅꌗꍍꆀꌠꏱꄻ，ꀋꉬꀋꉆꌠꃅꄷꈑꋧꊈ（PM2.5）ꐽꏡꐊꐨ30％ꈋꉐꀁꋌꊰ。 ꊋꀥꇱꄉꁭꁘꊖꌋꏱꄻ，ꀋꉬꀋꉆꌠꉹꑘꊋꏏꍍꊨꌠꄹꎆ，ꊖꌋꄆꏸꊤ71％ꌠꆏꀁꂥꐯꀁꂥꃅꍍꋊꃑꌠꃅꇫꑟ。 ꊋꀦꐛꉻꄻꃪ，ꊖꌋꌬꈧꍆꐪꉐꊮꌺ8.1ꂷꀁꋌꊰ，ꁦꎴꊋꀦꌬꈧꍆꐪꉐꊮꌺ6.3ꂷꉀꎆ。 ꐞꋌꊇꁧꉀꐕ，ꌐꂷꀊꏂꄀꄉꌠꐕꍯꌋꆀꐕꍯꀉꆹꀉꁘꌠ2000ꎖꃪꇷꀜꋊꇧꎭ。 ꊋꀥꇱꄉꀋꉬꀋꉆꌠꈳꁕꎿꁕꀇꐒꍍꆀꌠꄴꄻ，ꐈꑭꂿꑘꁬꋌꌬꌠꃷꁨꁧꀋꎆ。 ꀉꒉꀊꂾꌠꒆꉻꀧꌋꃅꌠꌋꆀꄺꀱꐛꅉꐛꌠꋉꃆꄹꎆ，ꋠꃅꀱꌩꊪꁬꏿꒉꊩꐛꌠꍔꒉ，ꊋꀥꇱꄉꃅꈣꂤꏂꀞꐛ、ꇓꊈꂥꏂꀞꐛ、ꒈꇷꃪꇷꌠꏓꇱꄉꏱꄻ。 ꍏꑷꋦꈭꀧꌋꃅꍞꍤꌠꍔꃅ，ꅱꈯꃅꏦꐆꃣꈌꌌꍤꀞ，ꅑꃤꎹꄻꌠꌌꀉꇨꆹ。 ꏣꀋꑌꃅ《ꀠꆀꋯꏤ》ꁱꄉꌠꍝꌠꄹꇙ，ꉪꇩꏤꅉꆺꑭꊂꃅꌗꐛꐈꌠꊝꇬꂿꄐꀋꉬꀋꉆꌠꋊꇤꅐꇁꀐ。
（ꈬ）ꏦꃤꈴꄉꐊꑷꃅꍔꃚꌅꊋꃄꌬꌠꌭꈬ，ꊋꇤꄉꐧꋦꏱꄻꌠꊋꀥꇱꌋꆀꏀꀺ，ꐧꋦꐮꄮꎍꐽꌠꄝꏦꀋꊰ。 ꌌꇩꏤꑭꊂꏓꄊꎮꊈꉼꁳꏤꄻꋊꀱꍬꀱꌠꏦꃤ95ꋐꐥ，ꏤꄻꋊꀱꍬꀱꌠꏲꑘꏦꇗ195ꋐꐥ，ꌤꏲꅉꏤꋪꀉꑌꈨꌌꄺꀱꆏꇧꎭ。 ꌜ、ꏃ、ꑤꍔꃚꌤꏲꅉꃅꎁꌅꈌꃷꁨꋏꄯꒉꏤꄻꄉꄜꀦ。 ꇩꃷꑼꀉꒉꃅꍞꍤꌋꆀꌐꐘꍞꍤꌠꃅ，ꏣꀋꑌꃅꃄꄻ、ꃅꊌꐨꄞꅐꌠꌌꀮꄑꌋꆀꏱꁈꊡꀮ，ꀋꃅꀋꄻꌠꌌꅱꈯꃅꅑꃤꎹ。 ꇓꈓꇓꉈꅉꂫꊐꌠꏱꄻꌠꏀꀺ。 ꉎꅇꅱꄻꌠꌤꃅꄹꏦꄻꐛꒆ。 ꏦꃤꌌꇇꀨꌠꈍꈐꍔꒉ。 ꋬꂻꒃꅐꁁꏯꄺꀱꀻꎆꌠꊥꎆ，ꌤꅐꌠꈁꉬꃷꁨꌋꆀꀉꒉꀊꂾꌠꌤꅐꃷꁨꐪꊛꄉꀁꋌꒊ。 ꋠꇐꁬꋌꍞꏲꌠꄺꀱꐛꒆ，ꀉꇨꃅꃨꆰꐨꈁꐥꃅꏱꍅ。 ꊋꀥꇱꄉꃄꇙ、ꒉꉮꀉꒉꀊꂾꑠꉮꄵꉮꄙꉮꌸꈭꋏꌠꌤꃅ，ꊐꁸꄉꌄꇤ、ꐯꇯꋮꒉꄉꃅꌠꃛꊸꉺꏦꄻꐛꒆ，ꉮꌸꁮꑋꌠꑟꐨꀉꒉꐯꀉꒉꃅꊨꒊꀐ。 ꇩꏤꋦꈬꌠꊋꀥꇱ。 ꐧꋦꋬꂻꐥꀹꄴꏮꋎꍅꉻꑫꄻꐛꒆ，ꏦꃤꈴꄉꋍꑞꋍꑵꏦꐆꑽꃤꃅꌠꏭꇇꇩꍈ，ꊋꑌꏡꑌꃅꄉꉻꋬꂻꌠꀧꌋꃅꄉꀐ。
ꄈꍏꑷꐊꑷꃅꏦꇨꃅꄈꏱꄻꄐꁆꌠꃄꌬꇫꑟ，ꊋꀥꇱꄉꄈꃅꇏꐙꎴꌠꄺꑣꌋꆀꍹꈔꌠꏭꁎꉈꈽ。 ꃹꅼꃅꄈꅿꉹꁌꈛꏦꉙꂘꃄꄻꃅꈧꌠ、“ꌕꇨꌕꃅ”ꌠꌐꄝꉙꂘꌠ、“ꑍꌷꋍꄻ”ꌶꄻꉙꂘꌠꍔꃅ，ꎔꎗꃅꄈꍏꑷꉆꐘꏤꐪꉌꊈꃅꇫꑟ，ꌦꀳꏿꄉ“ꃅꇏꇖꑵ”ꌠꋊꍬ，ꏦꇨꃅꇩꃷꑼ“ꅇꏤꌕꐘ”ꌠꃄꌬ。 ꏦꇨꃅꍔꃚꃤꃅꐙꌠꑳꇤꀊꏀꌠꋈꄻꌠꌋꆀꏱꎆꇲꄻꊿꀑꐱꃷꁨꋎꍅ，“ꌕꉻ”ꌫꎆꀉꒉꃅꊨꒊ。 ꏲꑘꍞꊟꍤꄻꌋꆀꍤꌗꍞꊟꌠꊋꀥꇱ。 ꏟꈯꃅꃅꐨꏦꐆꇗꐆꌠꍤꀞꌋꆀꈎꍬ，ꀉꇨꃅꍹꈔꊿꍤꀞ，ꍹꈔꌠꏭꁎꉈꈽꌠꄩꍅꄉꃅꐙꄟꐥꀐꄷꀋꁧꄻꈫꈈꇈꀻꎆꀐ。
ꁧꎁꊈ！
ꋌꃀꉬꈎꌠꆹ，ꊿꋅ、ꑇꇐ、ꉇꄅꀀꌠꃺꑌꌤꃆꑠꌤꃅꌠꏀꀺꄹꎆ。 ꊿꋅꃅꄷꊋꁈꄏꄉꐳꃅꀻꎆ，ꊿꋅꋯꑌꀻꎆꌤꑘꐳꐯꐳꃅꀻꎆꌠꊌꅜ。 ꏣꀋꑌꃅꑇꇐꌋꆀꐧꋦꉪꏦꐧꋦꐯꋭꐯꄎꌠꄐꂘ。 ꎿꉈꃺꑌꌋꆀꀱꁍꇩꇁꌠꃺꑌꇩꏤꐛꏀꈴꋈꄻꅉꇬꑆꊋꐋꀋꌡꌠꅐꌞꀐ。
ꋌꃀꉬꈎꌠꆹ，ꄈꍏꑷ、ꍏꑷꏮꊈꏃꂠꌠꇂꃴꄉ，ꂽꇨꂽꄿꌠꐛꐨꀊꏀꌠꀹꄻꄉ。 ꃅꒊꃅꇁꀊꏀꌠꇂꃴꄉꂽꌤꑘꄐꇐꌐꏦꏤꄻ，ꇴꄠꂽꑭꊂꍔꍞꌤꃅꃀꈿ，ꃹꅼꃅꍔꍞꌌꂽꋈꄻ、ꄺꀱꄉꂽꇨꌠꐛ、ꈆꑪꇮꇐꌌꌫꄉꂽꐞꄿꌠꐛ、ꏦꃤꈴꄉꂽꏱꄻꌠꄹꎆ，ꏓꂱꂽꍔꍞꒆꉻꎵꄻꀱ、ꎀꍹꐛꄟꎵꄻꀱ、ꊋꃤꉻꑫꎵꄻꀱ、ꃅꇏꐛꑊꎵꄻꀱꌠꃅꇫꑟ。 ꇿꋌꐥꃅꎿꇬꌅꈌꀧꌋꃅ、ꇶꌾꌠꁏꎍꐽꌠꀧꌋꃅ、ꈔꐪꉮꌸꌠꈭꋏ、ꇩꏹꄮꐽꀧ、ꑸꄂꊅꇉꏃꎭ、ꊿꂂꉪꏦꇇꀨꑠꀉꒉꀊꂾꌠꂿꃆꃄꄻ。 ꋍꑞꋍꁆꏯꃅꐮꐊꐯꈽꄉꂽꑼꃷꁨ30ꃪꑻꊨꇧꎭꌠꂿꃆꀑꐱꃅꃅꇫꑟ。 ꂽꉂꂽꈾꐛꏀꈴꑞꅉꄇꇖꀕꃅꉀꐕ，ꂽꌋꆀꏓꂱꐊꋧꌠꃹꅼꃅꀻꎆ。 ꂽꍔꂽꂱꋯꑌꋒ。 ꏓꂱꂽꐛꑊꐛꏀꁏ，ꍏꇩꐛꐨꂽꇨꈴꈜꇬꄉꑭꁘꄔꈬꃅꐕꎼꆹꀐ。
ꋌꃀꉬꈎꌠꆹ，ꇤꉪꄠꌤꃅꌠꊌꐨꀊꏀꃅꁨꎆ。 “ꋍꇩꑍꏦ”ꃄꌬꌠꀋꆏꃅꀉꑌꌋꆀꀻꎆ，ꏦꃀꌋꆀꅉꀨꏦꃤꋦꒉꐨꇤꉪꄉꀒꁨꋍꁘꃅꄇꇖꀕꇁ，ꅔꈐꌋꆀꇤꉪꐮꈴꇷꃅꌠꃹꅼꃅꄹꎆ，ꇤꍗꉪꄇꋒꋌꏡꃅꄻꐮꈴ，ꑣꇤ、ꉪꂱꌄꆣꎍꐽꌠꏦꀋꊰ。 ꍏꇩꋍꂷꌠꏥꏦꌋꆀ“ꈬꑍꉜꐊ”ꌠꌭꈬ，ꎿꋮꑍꄷꎆꏣꁱꀕꐮꈴꇷꃅꌠꊋꀥꇱ，ꎿꋮꑍꄷꏲꌋꐩꋊꃅꐙꌠꐮꂿꄉꇕꄟꌠꃅꇫꑟ。 ꏟꈯꃅ“ꄠꃪꄂꋦ”ꁷꐞꊋꃤꏭꄘꑣꌋꆀꋎꍅ，ꊋꑌꏡꑌꃅꄠꎿꄮꐽꌠꀧꌋꃅꄉꀐ。
ꋌꃀꉬꈎꌠꆹ，ꍏꇩꐛꐨꇩꏤꀉꒉꌠꉇꉻꑌꑲꌠꐊꑷꃅꄹꎆ。 ꊋꐛꃅꇬꂾꃢꌠ“ꋍꁕꋍꈜ”ꇩꏹꇷꃅꀑꋾꉉꎥꃀ、ꑸꄠꎆꏣꇷꃅꎀꍹꏲꌋꑌꀋꐚꃀ、ꇩꏤꑍꊏꂷꉻꏑꁥꏲꌋꉴꍏꀑꋾꃀ、ꏂꏪꇩꏤꏲꌋꑤꂱꐮꂿꃀꑠꀉꒉꀊꂾꌠꃥꌋꉇꉻꑌꑲꌠꃀꈿꌠꃅ。 ꑮꏣꀻꍗꑮꏤꇩꏤꏲꌋꑠꇩꏤꀉꑌꂷꇬꅲꇫꆹ，ꏓꐊꇩꑭꊂꃤꀑꋾꃀ、ꃅꌗꐛꐈꃀ、ꋧꃅꎆꏣꉉꎥꈉ、ꄏꑸꇷꃅꏲꌋꑭꊂꃀꑠꀉꒉꀊꂾꌠꈿꈽꄉ，ꋍꑞꋍꁁꏯꉇꉻꑌꑲꌠꄐꉻꃹꅼꃅꍔꃅ。 ꃰꊿꊫꂫꐮꐊꐙꌠꏓꄻꌠꄕꊪꄉ，ꅉꆺꑭꊂꉻꑫꄺꀱꌠꏱꄻꌠꎁꃅꍏꇩꀑꁮꐨꀉꑌꃅꅐꌞ。 ꎆꏣꉇꉻꑌꑲ、ꃰꊿꁱꀕꐮꈴꌠꃅꐛꐨꀉꇨꃅꐥ。 ꏟꈯꃅꇩꏤꌅꀨꌋꆀꎿꃀꌅꈌꈲꁧꀧꌋꃅ。 ꍏꇩꆹꆽꎍꐨꆸꄜꌠꇩꏤꀉꒉꂷꃅꄉꇬ，ꇩꏹꌋꆀꃄꁕꊷꈌꌤꃆꀞꄻꀂꏽꇬꀋꉬꀋꉆꌠꊥꎆꐨꐥꌠꂿꄐꋊꇤꅐꇁꀐ，ꋧꃅꄮꐽꌋꆀꀻꎆꌠꎁꃅꑆꊋꀉꒉꀊꂾꀊꏀꌠꅐꌞ。
ꁧꎁꊈ！
ꋌꃀꉬꈎꌠꉪꀱꇬ，ꐮꄙꐨꐯꏍꐮꄅꎍ，ꋍꑞꋍꑵꃨꆰꐨꋓꎭꌠꐮꊂꈹꇁ，ꇩꈐꇩꉈꐛꐨꀉꑌꌠꆹꄺꀱꁉꃑꊂꅑꅸꇁꌠꊝꀋꋻꌠꉬ，ꉪꇩꏤꄺꀱꊌꐨꇯꍝꃅꈝꐮꃅꊌꌠꀋꉬ。 ꋋꆹꐋꀨꑮꏣꀻꈯꄜꃅꄉꌠꄈꍏꑷꏟꈯꃅꏃꂠꄉꊌꌠꉬ，ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꈆꑪꃅꄐꌐꄉꊌꌠꉬ，ꄈꑭꊂꂽꑭꊂꇩꏤꑭꊂꊿꋅꈁꐥꌠꏓꂱꋯꑌꃅꉈꈽꄉꊌꌠꉬ。 ꉢꇩꃷꑼꎁꃅ，ꇩꏤꑭꊂꊿꋅꈁꐥꌠꏓꂱꏭ，ꋯꁦꄈꀾꈁꐥꌠ、ꏓꂱꏓꉻꈁꐥꌠꌋꆀꋍꑞꋍꁁꏯꊿꂒꋦꌠꏭ，ꇬꀖꌌꀖꄉꈀꎭꀕ！ ꑣꇤꏲꑘꇣꋲꏱꅉꐎꃺꑌ、ꉪꂱꏲꑘꇣꋲꏱꅉꐎꃺꑌ、ꄠꃪꃺꑌꌋꆀꎿꉈꃺꑌꏭ，ꇬꀖꌌꀖꄉꈀꎭꀕ！ ꍏꇩꐛꏀꈴꋈꄻꌠꏭꉈꇬꌠꌋꆀꊋꄏꌠꍔꃚꈁꐥꌠ、ꇩꏹꎀꍹꌋꆀꇩꏤꈁꐥꌠꐋꀨꏭ，ꇬꀖꌌꀖꄉꈀꎭꀕ！
ꋬꂻꇬꃨꆰꌠꉪ，ꌒꇬꎭꌠꉪ。 ꉪꊇꏸꐚꃅꌧꐚꅜꇬ，ꉪꇩꏤꄡꇗꄷꀋꁧꀊꉗꃅꐧꋦꉪꏦꇫꇬꊬꌠꇬꎍꑴꌦ，ꄡꇗꋧꃅꑭꊂꀻꎆꇰꌠꇩꏤꀉꒉꐯꀉꒉꌠꉬꑴꌦ，ꀻꎆꌊꐮꆽꀋꏣꇎꀋꋒꌠꌤꃆꑓꅐꎑꈨꄡꇗꂥꀋꀘꑴꌦ。 ꎆꏣꁦꎆꈏꒆꇙꊋꇎꀋꋒꑴꌦ，ꏀꀺꊋꃤꇨꀋꋒꑴꌦ，ꀻꎆꊇꁧꌋꆀꅐꐨꀊꂥꀋꋒꑴꌦ，ꎆꏂꑘꈨꈜꀕꇈꐧꐭꎆꏂꑘꀰꏢꇬꊋꋠ，ꉹꁌꎆꇱꉀꎆꐨꀋꄿ，ꃄꄸꈨꇬꎆꏣꀁꋌꊰꍅꊋꊼꇅꀉꒉ，ꎆꒉꎆꇁꑠꁁꏯꃨꆰꉮꐴꉜꀋꁨꀋꉆ。 ꎭꑆꇔꈢꇓꀖꂿꃆꊋꋠꇨ，ꂿꑘꂿꑘꁡꇤꅉꃀꄡꇗꊋꁧ，ꇓꈓꇓꉈꃄꁕꀻꎆꌠꌋꆀꊌꐨꁷꄻꌠꐮꍣꐨꄡꇗꊼꇅꀉꒉ。 ꋬꂻꒃꅐꌤꃆꀉꒉꀊꂾꌠꋍꇅꋋꇅꄡꇗꇫꅐꇁ。 ꃅꌗꊇꁧ、ꋦꈭꁦꎴ、ꋠꇐꁬꋌꉮꀋꐥꌋꆀꀀꑳ、ꂘꑘ、ꆅꉃ、ꃅꑘꊌ、ꃀꌠꀨꎹꑠꁁꏯ，ꉹꁌꇫꉌꀋꃹꅉꀁꑌꃅꀋꐥꑴꌦ。 ꍔꃚꌅꊋꆹꏮꌠꑞꅉꀋꑟꑴꌦ。 ꍔꃚꌤꃅꌊꀋꇎ，ꄺꀱꏁꁈꌋꆀꏱꁈꈨꃅꑞꅉꇬꀋꑟ，ꇥꀯꈨꁧꃤꃅꉪꐨꌋꆀꏦꏲꉪꐨꀊꀋꇨ、ꌤꃅꃅꇏꃶꀋꐚ、ꀵꄜꉌꊈꀋꇎ，ꇶꏦꉪꏦ、ꇛꌺꉪꏦꑟꐨꐯꀋꌡꃅꐥꑴꌦ。 ꉹꁌꌋꆀꎆꏂꑘꆏꌤꀞꊋ、ꁌꃄꈌꄐꃅꎴꌠꏭꉜꐨꊼꇅꀉꑌ。 ꋍꈨꇬꃅꇏꀋꎃꌠꌋꆀꍹꈔꌤꃆꄡꇗꀉꑌꃅꅐꑴꌦ。 ꉪꊇꆏꀋꎪꃅꇩꏤꌋꆀꏓꂱꏭꀊꂥꃅꆽꎍꌠꉌꊈꑌꄉ，ꊋꋠꌠꀋꐒ、ꀋꎪꀋꑴꃅꀕ，ꊋꇤꏡꇤꄉꌤꃅꌊꉾꄉ，ꏓꂱꍔꃚꆹꈍꃅꑌꏓꂱꏭꇢꄡꏿꎻꌶ！
ꑍ、2018ꈓꎆꏣꐧꋦꀻꎆꉻꄜꇖꐨꌋꆀꏱꁈꌬꐨ
ꎼꈎꆹꐊꑷꃅꄈꅿꃀꀉꒉꊯꈬꃢꌠꉌꊈꃅꈴꌬꈴꌠꇫꇬꈒꌠꉬ，ꄺꀱꁉꃑ40ꈎꈭꏝꐛꌠꉬ，ꐊꑷꃅꊼꇅꌣꈚꌠꐧꋦꋈꄻꐛꌠꂫꋓꊋꐛ、“ꊯꌕꉬ”ꄐꎖꃄꌬꌠꂴꊪꊁꊛꌠꀋꉬꀋꉆꈓꉬ。 ꍔꃚꌤꃅꌊꉾꇬꆏ，ꐋꀨꑮꏣꀻꈯꄜꃅꄉꌠꄈꍏꑷꏟꈯꃅꏃꂠꌠꇂꃴꄉ，ꂷꇻꌦꆺꆀꉪꏦ、ꃀꊱꄏꉪꇐ、ꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠ、ꈆꑪꃅꀻꎆꌠꉜꐨ、ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌌꄐꇺꅍꃅꄉ， ꐊꑷꃅꃹꅼꃅꄈꅿꃀꀉꒉꊯꈬꃢꌠꌋꆀꊯꈬꈭꑍꃢꌠ、ꌕꃢꌠꐊꈴꃀꉌꊈꃄꌬ，ꄈꅿꅉꀨꌧꇗ、ꅉꀨꈛꏦ、ꅉꀨꄐꁈꃄꌬ，ꄈꁳꐊꑷꃅꏲꂠꎻꌠꌭꈬꌋꆀꊋꀥꇱꇬꎷ，ꀋꎪꃅꎍꐽꅉꇬꄉꁨꆹꌠꌤꃅꈁꉬꅉꃀꉉꈌꌭꈬ，ꀋꎪꃅꀻꎆꉪꉻꀊꏀꌠꌭꈬ， ꏟꈯꃅꉪꇩꏤꐧꋦꇬꐮꄙꐨꀋꉬꀋꉆꌠꐛꐈꌠꇬꆼꒆꄉ，ꊇꁧꀊꂥꃅꀻꎆꌠꇖꐨꇬꈴꄉ，ꏓꈴꇲꈴꃅ“ꉬꑵꋍꉻ”ꀑꐱꄐꉻꄹꎆꌋꆀꋮꄮꃅ“ꇖꑵꐊꑷ”ꄐꇐꄐꉻꄹꎆ，ꀋꎪꃅꇲꁵꁁꏯꐛꉻꃅꐙꌠꄺꀱꌠꌌꀨꑟꃅꄉ，ꏓꈴꇲꈴꃅꉀꎆꌠꎍꐽ、ꄺꀱꌠꊥꎆ、ꐛꉻꋊꄻ、 ꉹꁌꈲꁵ、ꃨꆰꄴꏮꌠꋍꑞꋍꐘꌤꃅꌠꄹꎆ，ꊋꇤꄉꄺꀱꁉꃑꌠꄹꎆ，ꉻꒉꋊꄻꌠꏀꀺꌋꆀꄻꐛꒆ，ꊇꁧꆴꄻ、ꅐꐨꆴꄻ、ꇙꊋꆴꄻꌠꄹꎆ，ꈜꀕꇈꀉꒉꀊꂾꃅꃨꆰꌠꄴꏮꋊꎵꉾ、ꊒꌸꃅꎭꑆꇔ、ꍍꆀꄴꏲꌠꈢꇓꀖꁆꏯꏟꈯꃅꁨꎆꌠꊌꅜ，ꂴꄐꄉꌠꄐꇺꌋꆀꌌꎍꐽ， ꊋꀥꇱꄉꉹꁌꐥꐨꄻꃪ，ꎆꏣꐧꋦꐪꊛꄉꉾꃪꃅꀻꎆꌠꊥꎆ。
ꏓꇱꄉꇩꈐꇩꉈꃅꒊꃅꇁꎥꃪꇬ，ꉪꇩꏤꀻꎆꌠꆹꊜꋽꄮꌋꆀꋓꎭꌠꋓꃅꐥꌠꊝ。 ꋧꃅꎆꏣꐪꊛꄉꀱꉾꇁꉆ，ꄚꎍꀋꐽꊨꀋꄅꌠꐊꊈꀉꑌꐯꀉꑌ，ꎆꏣꐥꄜꀋꉬꀋꉆꌠꏱꁈꋊꄻꌠꌋꆀꋍꉇꁘꐛꐨꌌꐛꐈꇁ，ꀧꌋꃅꉪꏦꁦꎆꇱ，ꃅꄷꍔꍞꃨꆰꐨꉀꐕ。 ꉪꇩꏤꎆꏣꆹꀻꎆꄟꆹꏮ、ꎆꏣꐛꉻꄻꃪ、ꉀꎆꇙꊋꏭꆦꌠꈢꇓꀖꄮꇬꎌꇰ，ꉈꑴꁧꀉꑌꃅꅂ、ꄹꇭꀉꑌꃅꐂꌶꑴꌦ，ꂴꉪꄉꉆꌠꌋꆀꂴꉪꇫꀋꑟꌠꃨꆰꐨꏯꊝꄻꅐꑴꌦ。 ꃄꄻꅉꄛꑣꎼꇁꇬ，ꍏꇩꃤꀻꎆꊌꐨꆹꋌꃀꇯꆐꇨꀖꊋꑣꌠꇬꄉꊌꅜꌠꉬ。 ꀋꃋꉪꇩꏤꐥꇐꇮꁈꅉꃀꀊꅰꃅꀉꇨ，ꅐꑘꉻꑫꐛꒆ、ꃷꎏꄉꈁꀉꒉꐯꀉꒉ、ꊿꊋꇁꀦꀉꑌ、ꑘꀺꏀꀺꌠꍄꑐ，ꏓꇱꂱꎆꅑꐨꄇꇖꀕ，ꊇꁧꀊꅰꃅꀊꂥꌠ、ꅐꐨꀊꅰꃅꐥꌠ、ꀊꅰꃅꀋꈐꀋꉈꌠ、ꀊꅰꃅꐪꊛꄉꀻꎆꉆꌠꃅꇫꑟꇬꄐꊋꐥꇎꏦꐥ。
ꎼꈎꀻꎆꌠꂴꄐꄉꌠꁻꌐꀋꉬꀋꉆꌠꆏ：ꇩꈐꒃꅐꈁꉬꁌꐨ6.5％ꀑꂪꁦꎆ； ꀀꊿꌬꈧꁌꏤ3％ꀑꂪꉀꄓ； ꇓꈓꏦꎫꀊꏀꃅꃅꑘꊌꌠ1100ꃪꑼꈋꉐꁦꎆ，ꇓꈓꏦꎫꍤꄻꇬꃅꑘꀋꊌꐨ5.5％ꈍꈐꇬꎍ，ꇓꈓꁱꄀꄉꌠꃅꑘꀋꊌꐨ4.5％ꈍꈐꇬꎍ； ꀀꊿꊌꐨꁦꎆꌠꌋꆀꎆꏣꉀꎆꌠꀑꐱꃅꐮꐊ； ꈏꃹꉇꅐꌠꎍꐽꅉꄉꉾꌠꇬꉜꄉꆹ，ꇩꏹꊌꐨꌬꐨꀑꐱꃅꐮꆽꏣ； ꌗꂓꇩꈐꒃꅐꈁꉬꁌꐨꊋꃸꄻꐨ3％ꈋꉐꀁꋌꊰ，ꍍꆀꎊꇐꀋꉬꀋꉆꌠꋊꃑꐨꐪꊛꄉꀁꋌꊰ； ꇲꁵꁁꏯꐛꉻꃅꐙꌠꄺꀱꌠꊇꅉꃅꁨꎆꌠꊌꅜ，ꉻꒉꆷꄿꍆꐨꀑꐱꃅꎍꐽꇬꎷ，ꋍꑞꋍꉹꃨꆰꐨꊱꁨꃅꇿꋌꐥꃅꄴꍅꄉ。
ꄚꂴꉉꌠꂴꄐꄉꌠꁻꌐꀋꉬꀋꉆꌠꆏ，ꐊꑷꃅꊼꇅꌣꈚꌠꐧꋦꋈꄻꐛꌠꂫꋓꊋꐛꌠꈉꐨꉪꇈ，ꉪꇩꏤꎆꏣꐳꃅꉀꎆꊬꌠꇬꄉꆹꏮꌊꊇꁧꀊꂥꃅꀻꎆꊬꌠꇬꑟꀐꌠꃶꐚꐨꇬꄉꄐ。 ꎆꏣꀑꐱꃆꂮꇬꌋꆀꃅꑘꁵꄻꄐꊋꇬꄉꉜꎼꇁꇬ，6.5％ꀑꂪꐳꃅꁦꎆꄉꊼꇅꇎꋒꃅꃅꑘꊌꌠꃅꇫꑟꉆ。 ꇓꈓꏦꎫꃅꑘꀋꊌꐨꍤꄻꌠꆏꂿꑘꊋꃅꊿꑠꇓꈓꇬꅉꀕꀀꊿꇬꉱꑷ，ꎼꈎꉘꃀꃢꌠꁻꌐꋋꏢꌌꂴꄐꄉꌠꁻꌐꃅꄉ，ꀊꅰꐊꑷꃅꃅꑘꊌꃆꂮꄛꑣ，ꀊꅰꉾꃅꀻꎆꐨꐯꇯꈲꊌꌠꇖꐨꄜꅐꇁ。
ꎼꈎꐪꊛꄉꉻꒉꋊꄻꌠꏀꀺꌋꆀꄻꐛꒆ，ꉻꒉꋊꄻꑟꐨꒃꌫꋒ，ꉻꒉꏱꁈꐪꊛꐨꎍꐽꐨꄝꏦꀋꊰꇬꎷ，ꊋꀥꇱꄉꏱꎆ、ꎆꃀ、ꅐꑘ、ꃄꁕꑠꏱꁈꋮꄮꐯꇯꌶ。
ꏣꀋꑌꌠꎆꏲꏱꁈꌬꐨꀋꐈ，ꊋꏓꄉꊌꐨꁦꎆꌶ。 ꎼꈎꌫꁏꇔꐨꆏ2.6％ꇬꈴꄉꄐꁆ，ꀋꉊꄻꈎꄐꌗꄉꌠꇬꉐꊮꌺ0.4ꂷꀁꋌꊰ； ꏱꎆꌫꁏꇔꌠꆏ2.38ꃪꂡꂷ，ꄚꈐꏭꍏꑷꏱꎆꌫꁏꇔꌠꆏ1.55ꃪꂡꂷ，ꃅꄷꏱꎆꌫꁏꇔꌠꆏ8300ꂡꂷ。 ꌫꁏꇔꐨꄻꀁꂥꃅꄉꌠꆹ，ꀋꉬꀋꉆꌠꆏꉪꇩꏤꎆꏣꎍꐽꅉꇬꄉꉾꌠꇬꉜꄉꆹ、ꏱꎆꁦꎆꃅꊌꇬꅉꃀꐥ，ꉈꑴꉻꒉꋊꄻꌠꎁꃅꏱꁈꈥꈉꀊꅰꀉꑌꃅꊏꄉ。 ꎼꈎꇩꏤꑭꊂꏱꎆꌬꐨꆏ21ꃪꂡꂷ，ꌬꐨꄉꈁꀒꁨꋍꁘꃅꀉꒉ。 ꍏꑷꃅꄷꏭꎃꐚꃅꐙꌠꆹꏮꁵꄻꌠ10.9％ꉀꎆ，ꃅꄷꈜꀕꇈꈯꄔꁮꐚꁁꏯꃅꄷꎆꊋꄻꀉꇨꆹꎻ。 ꏱꎆꌫꎆꐛꉻꄻꃪ，ꏱꎆꌫꎆꄉꉻꐨ、ꇿꑌꈲꐨꉀꐕ，ꊋꀉꒉꃅꇤꌊꈢꇓꀖꀉꒉꌕꐘꌠꏭꊋꄏ，ꀉꑌꌠꌌꏀꀺꄹꇙꌠ、“ꌕꂿꑘ”、ꉹꁌꐥꐨꑠꁁꏯꇬꉜꄉꎎ。 ꀋꃋꏱꎆꃆꂮꉾꇁꀐ，ꈁꐥꊐꌠꍔꃚꄡꇗꀋꎪꃅꏎꏸꄉꐥ，ꈪꑌꏎꏸꃅꐥ、ꂃꈩꆿꈩꌠꄡꃅ，ꏦꇨꃅꎃꐚꌬꐨꏡꍅ，ꁌꇐꈤꌠꎆꀊꅰꀉꑌꃅꌌꀻꎆꌠꇬꊋꀥꇱ、ꉹꁌꐥꐨꈉꊸꅉꇬꌬ。
ꎍꐽꌠꎆꃀꏱꁈꎃꐚꃅꐙꇬꎷ，ꏯꑆꄉꄐꌶ。 ꎆꃀꇲꁵꏓꇱꁉꈢꀃꈈꏲꋒꄻꋒ，ꀊꐯꄜꇐꎆꃀM2、ꉌꒊꎆꉛꌋꆀꐧꋦꎆꏓꄉꈁꄉꄐꃅꉀꎆꌠꏦꀧ，ꏮꇙꃅꐙꌠꄉꄐꃅꎍꐽꌠꀧꌋꃅ，ꈛꎂꃅꎆꏓꈜꀕꇈꇴꍆꌅꈌꎆꏓꌠꍆꐪꉀꐕ。 ꎆꃀꏱꁈꊪꈴꈝꃀꎵꄻꐮꈴ，ꍣꐨꐥꌠꊭꄎꎆ、ꍣꐨꐥꌠꉌꒊꎆꑠꏱꁈꌬꋒ，ꎆꀨꀊꅰꀉꑌꃅꄐꏁꌌꎆꏂꑘꀄꊭꌠ、“ꌕꂿꑘ”ꌋꆀꌢꎭꃅꄷꇬꇱꄻ，ꀊꅰꉾꃪꃅꐥꄜꎆꏣꁧꃤꃅ。
ꎼꈎꌤꃅꌠꃅꋒꂿꄷꇬꆏ，ꎔꎗꃅꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꎆꏣꉪꇐꃅꈴꌬꈴ，ꎍꐽꌠꇬꄉꁨꆹꌠꌤꃅꈁꉬꅉꃀꉉꈌꌭꈬ，ꎍꐽꌠꌋꆀꁨꆹꌠꌌꉻꄜꂷꃅꄉꒃꌫ，ꄚꐰꋋꈍꑋꍈꉜꁨꌶ。 ꋍꆏꊋꀉꒉꃅꇤꄉꊇꁧꀊꂥꃅꀻꎆꌠꄹꇙ。 ꀻꎆꌠꆹꉪꇩꏤꌤꃆꈁꐥꌠꂥꀘꌠꅉꃀꌋꆀꀋꉬꀋꉆꌠꉬ。 ꊋꋧꄉꀻꎆꐮꆽꀋꏣꇎꀋꋒꌠꌤꃆꂥꀘꇧꎭ，ꐛꏀꈴꌠꎆꏣꉻꑫꋈꄻꌠꇬꆼꒆꄉ，ꊇꁧꀨꄉ、ꅐꐨꂴꄉꌠꌭꈬ，ꎆꏣꐛꉻꄻꃪꊐꐕꌠꊥꎆꌶ。 ꎆꏣꈳꏦꁌꒉ，ꈜꎴꈛꑌꏓꐊ，ꎆꏣꏭꌬꌊꋭꋽꅉꇬꎍꌠꄉꀧ，ꎆꏣꎍꐽꃅꉀꎆꌠꌋꆀꊇꁧꅐꐨꉀꐕꌠꐮꊥꎆꄉꐯꇯꁨꎆꆹꌠꃅꇫꑟ。 ꑍꆏꄺꀱꁉꃑꌠꇬꊋꃤꀉꒉꃅꇱ。 ꄺꀱꁉꃑꌠꆏꀋꃋꋋꄮꍏꇩꊫꂫꇬꐰꏤꌠꏡꁈꀋꉬꀋꉆꏢꉬ，“ꋍꉐꈎꑍꊭ”ꉈꈽꁻꌐꃅꇫꑟꌠꏡꁈꀋꉬꀋꉆꏢꑌꉬ。 ꐩꋊꄓꈌꀊꏀꌠꇬꄉ，ꉪꇐꉈꑴꊼꇅꁌꄝ，ꄺꀱꉈꑴꊼꇅꃹꅼ，ꁉꃑꌠꉈꑴꊼꇅꍔꒉ。 ꋒꐯꋒꃅꏓꂱꂴꏀꀺꉌꊈꋊꇤ，ꃅꄷꈁꐥꌠꊋꊡꌊꃶꐚꐛꐨꇬꈴꄉ，ꃅꀬꄻꀬ，ꇨꌠꏭꊝꀬꃅꄉ，ꄺꀱꁉꃑꌠꀋꆏꃅꄹꌊꀒꁨꉜꄉꆹ。 ꌕꆏꐊꑷꃅꊼꇅꌣꈚꌠꐧꋦꋈꄻꐛꌠꈢꇓꀖꀉꒉꌕꐘꂫꋓꊋꐛꌠꒃꉇꋒ。 ꂱꄷꃅꌤꃅꉪꈜꌋꆀꑭꋧꃄꁈꄜꎼꇁ，ꄮꈉꑴꉻ、ꈴꈜꑴꁱ、ꂴꄉꊁꄉꐨꄻꎼꇁ，ꃨꆰꐨꉮꐴꂁꑌꌠꌌꇿꋌꐥꃅꋎꍅꌠꄉꀧ，ꎭꑆꇔꈢꇓꀖꂿꃆꐊꑷꃅꃅꌐꌠꄉꀧ，ꒆꉻꋦꈭꊇꁧꀑꐱꃅꄻꃪꌠꄉꀧꌶ。 ꉪꊇꈁꃅꌠꌤꆏ，ꐯꇯꏓꂱꎁꃅꃅꌠꉬ。 ꏓꂱꈯꄜꃅꄉꌠꀻꎆꉪꇐꌭꈬ，ꉪꇩꏤꇩꃆꇩꂮꅉꀨꇬꈴꄉ，ꊋꈁꑌꃅꇤꄉꃅ、ꊋꎖꄉꃤꀳ，ꉹꁌꇫꉈꇬꐯꉈꇬꌠꌤꋍꐘꋍꐘꃅꂥꀘꋒ，ꐧꋦꐽꊯꑗꉬꌠꌋꆀꃰꊿꐊꑷꃅꀻꎆꌠꊥꎆꄉ，ꏓꂱꐥꐨꁳꇩꏤꀻꎆꌠꐊꄉꋍꈓꀱꋍꈓꏭꀋꋌꃅꀊꅰꃅꉾꃪꇁꎻꌶ。
ꌕ、2018ꈓꍔꃚꌤꃅꌠꏭꇖꐨ
ꎼꈎꎆꏣꐧꋦꀻꎆꂿꃆꀉꇖꐯꀉꇖ。 ꏟꈯꀕꃅꌤꃅꁌꁨꌠꐩꋊꊜꋽꄮꒃꌫꄉ，ꏓꇱꇲꄻ、ꀋꉬꀋꉆꌠꄻꂴꄉ，ꏟꈯꃅꋍꑞꋍꐘꌤꃅꋒꌶ。
（ꋍ）ꃹꅼꃅꇲꁵꁁꏯꐛꉻꃅꐙꌠꄺꀱꌠꄹꎆ。 ꎆꏣꀻꎆꌠꊋꇱꅉꄻꐥꄜꎆꏣꀂꏽꄉꌠꌭꈬ，ꐪꊛꄉ“ꌕꊨꋍꍅꋍꅋ”ꒃꉇꋒ，ꊋꀉꒉꃅꇤꄉꏲꑘꅧꊨꇗꏸꊨꁌꊨ，ꀋꆏꃅꃼꇇꃅꋦꈭꄻꃪ，ꀒꁨꋍꁘꃅꃷꎏꀨꄜꍄꑐꊋꃤꋊꃑ，ꎆꏣꀻꎆꊇꁧꊐꐕ。
ꇙꊋꀊꏀꌠꀻꎆꀉꒉꇁꎻ。 ꏀꄓꅐꑘꁥꏓꌠꄻꀉꒉꄻꀉꇨ，ꃷꁨꊫꌐꀉꒉꌠꀻꎆꃅꐨꃄꌬ，ꀊꏀꋎꌠꊿꄻꀑꊋꎥꃪꁧꀿꌫꄻꌠꊋꀥꇱ，ꆅꉁ、ꃀꌠꀨꎹ、ꂘꑘ、ꁱꀕ、ꈯꎟꑠꀉꑌꁁꏯꇬ“ꐮꈴꈄꏍ+”ꌠꄹꎆ。 ꐳꃅꐛꏀꈴꁧꃤꃅꑘꀻꎆ。 ꀑꁮꅐꑘꀻꎆ，ꀑꁮꐥꐨꀹꎆ，ꀑꁮꐧꋦꋈꄻ。 ꇮꇐꀊꏀ、ꃅꑘꐛꄟꀊꏀ、ꈁꏦꀊꏀꌠꌫꄻꄉ，ꊋꀉꒉꃅꇤꄉꋊꃅꅐꑘꄺꑣꊐꐕ。 ꏀꄓꅐꑘꏓꌗꌠꊋꀥꇱ。 ꈄꏍꐳꐕꁌꊨꌠꊋꃤꀉꒉꃅꇱ，ꐳꏣꈄꏍꇓꈓꇓꉈꉱꑷꈴꌠꃅꇫꑟ，ꄉꉻꐤꅉꇬꁌꀋꁵꃅꈄꏍꃹꈩꉆꌠꈍꈐꍔꒉ，ꑶꈓꐳꏣ、ꎆꏂꑘꐳꏣꌋꆀꌐꌬꑟꌫꄻꁌꄇꇖꀕꃅꀁꋌꊰ，ꈴꃷꁨ“ꉈꈩꐺ”ꁌꇤꇧꎭ，ꇘꊈꈄꏍꈴꃷꁨꌫꁌꋋꈓꈐꃅꈍꃅꑌ30％ꀁꋌꊰ， ꉹꁌꌋꆀꎆꏂꑘꁳꃶꐚꃅꈲꊌꄉ，ꃷꂷꍏꇩ、ꈄꏍꇨꌠꇩꏤꋈꄻꌠꎁꃅꊋꇤꊋꇱ。
ꐳꃅꄺꂡꇩꏤꀉꇨꌠꋈꄻ。 ꏓꐛꄆꈜ、ꊇꇙꅇꈴꉬꋊꌠ、ꃏꏸꇙꃑꏸ、ꊋꀦꀊꏀꐕꍯ、ꌬꇐꀊꏀꑠꅐꑘꀻꎆꌠꄹꇙ，ꀉꒉꀊꂾꌠꀋꇎꀋꂪꌠꌫꉂꌫꈾꌐꐘꋉꃆꃄꄻ，ꀑꁮꊋꃤꄺꂡꌠꄹꎆ，ꇮꑘꐮꈴꈄꏍꐽꈉꀻꎆ，“ꍏꇩꄺꂡ2025”ꌶꀠꃄꁕꀹꄻ。 ꀊꐯꈭꃅꇮꑘꒃꅐꃅꎻꊫꄳꍅꊨ，ꀉꇨꃅꒃꅐꀕꇐꊇꁧꍞꏲ。 ꐊꑷꃅꊇꁧꉀꐕꃅꐨꃅ，ꇩꏹꂴꅑꑟꐨꌋꆀꎕꏦꊒꎕꏦꑟꌠꄹꎆ，ꑘꃅꌶꀠꉌꊈꌋꆀꇔꇷꉌꊈꍔꆙ，ꌧꇐꉹꌠ、ꇮꇐꄐꊋꉹꌠ、ꏀꀺꉹꌠꑘꃅꊿꀉꒉꁥꂘꄻ，ꍏꇩꄺꂡꌠꊇꁧꄺꀱꑠꃢꃅ。
ꐪꊛꄉꇿꋌꀋꐥꃅꇲꁵꌠꀜꋊꇧꎭ。 ꀋꎪꃅꃷꎏꈴꏦꏲꈴꌠꇇꁈꌬꄉ，ꏦꇨꃅꋦꈭꀧ、ꊇꁧ、ꋬꂻꑠꏦꇗꎕꏦꃄꌬ，ꅐꊋꁦꎆꇨꌠꋊꑣ、ꅐꊋꊁꊰꌠꀜꋊꇧꎭ。 ꎼꈎꆏꉈꑴꇤꎸꅍꅐꐨꄐꊋ3000ꃪꄓꀑꂪꍅꊨ，ꊖꌋꅐꐨꄐꊋ1.5ꂡꄓꀑꂪꎞꅐ，ꎕꏦꇬꀋꑟꌠꊖꌋꄆꏸꊤ30ꃪꐂꊅꈍꐯꀜꋊꈢꆏꇧꎭ。 “ꂾꈠꎆꏂꑘ”ꑱꐢꌗꏢꌠꌋꆀꐅꀱꇱꀱꌠꊋꃤꁦꎆꇱ，ꌤꃅꊿꁆꄻꌠꌋꆀꎝꈣꀞꄻꌠꃅꋒ。 ꇿꋌꀋꐥꃅꇲꁵꌠꊨꒊꊌꐨꇿꋌꀊꏀꃅꐥꌠꒃꉇꅐꇁꌶ。
ꃹꅼꃅ“ꄝꏲꃅ”ꌠꄺꀱ。 ꐊꑷꃅꇩꏤꑭꊂꋍꃱꃅꌠꃷꎏꃹꉆꀋꉾꁁꏯꃷꁨꋏꄯꒉꄹꏦꃄꌬ。 ꇩꏤꑭꊂꃅ“ꍔꍌꁷꐞ”ꄺꀱꌠꃄꄻ，ꀋꂿꑘꌠꆏꍌꊂꍔꊨꌠꉬ，ꋍꑞꋍꑵꍔꊨꉆꌠꆏꄾꌦꋩꃅꊨ、ꄻꐯꇯꉆꌠꆏꄾꌦꋩꃅꄻꐯꇯ，ꀒꁨꋍꁘꃅꎆꏂꑘꑭꄑꀞꄻꄮꈉꍅꊨ。 ꃷꇐꌐꂷꁱꄀꃅꑍꀉꒉꃅꊨꀁꑌ。 ꋉꃆꋈꄻꐘꃆꈌꁧꄮꈉꉈꑴꈮꁁꍅꊨ。 ꎆꏂꑘꎆꇱꐘꃆꉬꐮꄹꏦꄺꀱꉚꅉꄹꎆ。 ꐊꑷꃅ“ꑍꈁꏾꌋ、ꋍꄇꄜꋊ”ꍞꏲꌠꃄꄻ。 ꈍꃅꑌꃷꇐꀊꆠꃶꀋꐚꀉꁘꌠꁳꁭꁘꇁꄡꎽ，ꈍꃅꑌꏦꌬꊿꁳꋟꒃꍅꇖꄡꎽ。 ꃹꅼꃅ“ꐮꈴꈄꏍ＋ꏲꃆꁧꃤꃅ”ꌠꄹꎆꇈ，ꌤꐘꁳꀊꅰꀉꑌꃅꌌꈄꏍꇬꄉꀞꄻꎻ，ꀋꎪꃅꀞꅉꇬꄉꀞꄻꅐꌠꑌꄡꇗꄾꌦꋩꃅ“ꀃꈈꁮꇬꀉꄂꃹ”、“ꈍꃅꑌꋍꃢꀉꄂꀥ”ꌠꃅꇫꑟꌶ。 ꊋꀥꇱꄉꏲꃆꁧꃤꃅꎕꏦꐛꈴꌠꋈꄻ。 ꊋꀉꒉꃅꇤꄉꏓꇱꄉꏦꌬꉺꏦꄺꀱꌠꄹꎆ，ꊋꇤꄉꀉꑌꁁꏯꀉꑌꊐꃅꀱꄉꏦꌬꌠꌤꃆꂥꀘ。 ꐳꃅꍔꃚꈴꌗꉻꑫꐯꏑꐮꈴꎻ，ꈴꌗꄁꈘ꒺ꅔꄻꐮꈴ。 ꉹꁌꌋꆀꎆꏂꑘꌤꀞꌠꋍꑞꋍꑵꊩꀽꊫꄳꋊꎵ，ꏦꃤꏦꇗꁢꊧꀋꐥꌠꆏꈁꉬꃅꇤꇧꎭ。 ꃼꇇꀰꏢꋦꈭꄻꉾꃪꌠꆏꒃꅐꊋꃤꁌꄝ、ꋓꈿꊋꃤꉀꐕꌠꉬ，ꇊꑴꐆ、ꐒꅍꇔ、ꌒꈜꄻꄉ，ꃷꎏꀨꄜꎁꃅꍄꑐꊋꃤꇱ，ꏓꂱꉹꁌꎁꃅꃅꌒꄻꌒꌠꁦꎆꇱ。
ꀒꁨꋍꁘꃅꎆꏂꑘꇗꏸꃣꁧꊨꑾꌙ。 ꁌꎆꇗꏸꄹꏦꄺꀱꄻꐛꒆ，ꌕꊐꐆꑍꊐꃅꌠꃅꍜꇬꉜꄉꇗꏸꍆꐪꑞꅉꋊꄻ，ꀋꉬꀋꉆꌠꆏꄺꂡꑘ、ꈭꈜꎞꎭꑠꉹꑘꇬꇗꏸꍆꐪꀁꋌꊨ，ꄉꈁꀄꊭꌠꇗꏸꏮꊿꃅꈎꈓꌠꃷꄻꃷꁨꎕꏦꉀꐕ。 ꇗꏸꈮꁁꊨꄉꀵꌠꒇꏣꏱꁈꊌꌠꀄꊭꐭꌠꎆꏂꑘꈍꈐꀉꒉꃅꌌꁦꎆ。 ꎆꏂꑘꀊꏀꃅꃻꄻꌊꇁꌠꎖꅍꉁꈾꇗꏸꏮꂾꈎꇧꎭꌠꉎꑞꅉꀉꒉꃅꉀꐕ。 ꎆꏂꑘꋯꉈꄉꊌꌠꏓꇱꄂꏆꏱꁈꃄꌬ。 ꎊꈴꎆꏂꑘꊸꑳꌬꃅꇗꏸꎳꄻꒇꏣꁵꈍꈐꍔꐯ。 ꐪꊛꄉꎆꏂꑘꐅꄻꐯꇯꃄꅉꁌꎆꇗꏸ、ꏤꐪꇗꏸꑠꏤꄮꑟꒇꏣꁵꏱꁈꃄꌬ。 ꋋꈓꌠꉈꑴꎆꏂꑘꌋꆀꊾꄜꎁꃅꇗꏸ8000ꎖꂡꂷꊨꒊ，ꐥꄜꎆꏣꉹꏮꊐꐕꌠꊥꎆ，ꊋꇤꄉꃷꎏꄓꊋꌋꆀꐧꋦꁦꄻꊋꃤꄖꄑ。
ꎆꏂꑘꇗꏸꀋꉬꌠꃣꁧꀉꒉꃅꀁꋌꊨ。 ꀒꁨꋍꁘꃅꏲꑘꌤꑘꃅꐙꌠꁌꎴꌠꋊꍬ，ꍔꃚꃤꃅꐙꌠꎆꀨꈨꃻꎴꎕꏦꄻꀁꂥꃅꄉ。 ꐪꊛꄉꋍꊭꇬꎆꏂꑘ“ꉬꀧꋍꎆ”ꁌꏮꍆꁧꊨꀁꂥ。 ꄆꈄꏍꈭꊭꁌꎴꌠꌋꆀꌞꇱꄆꁌꏤꀁꋌꊨꇈ，ꎃꐚꇮꑘꃼꇇꑘꄆꁌꏤꐽꏡꃅ10％ꀁꋌꊨ。 ꃹꅼꃅꁌꎴꄇꈜꄹꏦꄺꀱ，ꈛꈴꋒꈴꁌꀁꋌꊨ。 ꇢꈴꁧꃤꃅꁌꎴꌠꋊꄻꊋꃤꁦꎆꇱ。 ꋋꈓꌠꃷꎏꀨꄜꎁꃅꇗꏸꀋꉬꌠꃣꁧ3000ꎖꂡꂷꊨꑾꌙ，ꀋꋭꀋꋽꌠꆏꏟꈯꃅꇤꇧꎭ，ꀊꂥꇨꌠꆏꏟꈯꃅꊨꀁꋌꇁꄉ，ꎆꏂꑘꁳꁦꉘꃅ、ꊋꋧꊋꏓꌊꀻꎆꎻꌶ。
（ꑍ）ꐳꃅꏀꀺꉹꌠꇩꏤꋈꄻ。 ꋧꃅꀊꏀꈭꌠꈆꑪꇮꇐꇝꂱꌠꌋꆀꅐꑘꐈꆦꆸꄟꒃꌫꄉ，ꃹꅼꃅꏀꀺꅸꇙꀻꎆꄐꇐꃄꌬ，ꀋꆏꃅꎆꏣꏀꀺꊋꃤꌋꆀꋓꈿꊋꃤꄻꀉꇨ。
ꊋꀥꇱꄉꇩꏤꏀꀺꉻꑫꋈꄻ。 ꀉꇨꃅꅉꃀꎥꃪ、ꌬꈧꅉꃀꎥꃪꌋꆀꇬꀦꏀꀺ，ꈆꑪꇮꇐꏀꀺꐘꃆꀉꒉꀊꂾꈨꃄꇬ，ꎕꏦꀊꂥꃅꇩꏤꋒꃯꉜꅉꋈꄻ。 ꎆꏂꑘꊋꊡꄉꂴꅑꄉꈆꑪꇮꇐꐘꃆꀉꒉꀊꂾꌠꃄꄻ，ꈆꑪꎥꃪꑼꌙ、ꌶꅉꀊꂥꌠꌋꆀꎆꏂꑘꐮꉔꐮꈴꄉꏀꀺꌠꊋꁈꄏ，ꐳꃅꏀꀺꊌꐨꆹꏮꌫꄻ。 ꇩꏤꈆꑪꇮꇐꇱꄻꌠꆹꉹꁌꐥꐨꁁꏯꉜꄉꎎ，ꊋꀥꇱꄉꈑꉒꏱꄻꎥꃪ，ꉟꍔꆅꑠꆅꃆꆅꂮꀉꒉꀊꂾꌠꄴꏮꉃꄻꈢꇓꀖꌠꄹꎆꄉ，ꈆꑪꇮꇐꁳꀊꅰꉾꃪꃅꐥꌒꄻꌒꌠꄻꏓꂱꁵꎻ。
ꏀꀺꊋꊡꏱꁈꃄꌬꇫꑟꌋꆀꄻꐛꒆ。 ꈆꑪꇮꇐꏲꂠꄹꏦꄺꀱ，ꈆꑪꇮꇐꎥꃪꐘꃆꃅꊌꐨꈋꍣꌠꆏꐳꃅꈴꎁꉜꁨꌠꇬꄉꄽꂫꐛꐨꉜꁨꌠꇬꉜꄉꄺꀱꌶ。 ꏀꀺꁥꉻꌋꆀꂴꅑꌧꊿꆏꀊꅰꃅꀉꒉꌠꊿꎆꎊꁆꄻꌅꈌꌋꆀꇮꇐꈭꈜꏤꇽꌅꈌꄻꇬꁳꄉ。 ꈆꑪꇮꇐꀉꒉꀊꂾꌠꈢꇓꀖꂿꃆꆸꄜꌠꈆꑪꇮꇐꎥꃪꊿꏭꆏ，ꊜꋽꃅꌒꌠꃄꎆꄹꏦꌋꆀꈁꁠꏿꏁꁈꏁꌬ。 ꈆꑪꇮꇐꎥꃪꊿꈆꑪꇮꇐꊌꐨꁨꌅꈌꅀꀊꉗꃅꌫꄻꌅꈌꄻꇬꁳꌠꎹꎥ。 ꏀꀺꊋꊡꏱꁈꇬꀋꊒꌠꏦꆹꇗꆹꆏ，ꐳꃅꌌꄺꀱꇤꇧꎭ； ꏀꀺꄓꊋꃑꄻꌠꇬꈭꋍꈜꇈꌠꉉꑌꀠꎴꌠꁱꇗꆏ，ꉌꑣꄉꇤꇧꎭꌶ。
ꋍꏅꑘꀺ、ꋍꉻꏀꀺꌠꑞꅉꀊꏀꌠꇬꑟꌠꊥꎆ。 ꉪꇩꏤꆹꋧꃅꇬꄉꈁꀉꒉꐯꀉꒉꌠꊾꊋꌧꊿꇁꀦꐥ，ꋋꆹꏀꀺꀻꎆꌠꇬ“ꈚꇑ”ꀉꒉꐯꀉꒉꌠꉬ。 ꋍꑞꋍꁁꏯꃅꏀꀺꑘꀺꁧꃤꃅꌠꇲꁵ，“ꑍꀺ”ꌶꀠꃄꅉꋈꄻꌠꄹꎆ，ꎆꏂꑘꀉꒉꌠ、ꌶꅉꀊꂥꌠꌋꆀꈆꑪꎥꃪꑼꌙꑠꊋꊡꄉꋍꑞꋍꑵꏀꀺꇁꀦꁉꃑ，ꐽꈉꎆꏣ、ꐯꇯꈲꎆꏣꀻꎆꇈ，ꑟꇬꑟꉈꄻꐯꇯ、ꒃꌷꎥꌬꐊꃅ、ꎆꏂꑘꀉꒉꐧꀠꀄꊭꐮꉔꌠꏀꀺꑘꀺꐛꄟꏓꐛ， “ꑍꀺ”ꊐꐕꑵꌠꄺꑣ。 ꇩꏤꎆꏓꄉꀧꎆꀨꏓꄻꄉ，ꊈꂄꏀꀺꉹꌠꎆꏂꑘꃷꎏꃹꄉꎆꏓꌠꊋꁈꄏ，ꑘꀺꎆꇱ、ꄟꏂꎆꇱꇗꏸꒇꏣꁵꏱꁈꃅꉚꈍꈐꍔꐯꌊꇩꏤꑭꊂꃅꑟꌐꎻ。 ꃹꅼꃅꌧꊿꀻꎆꏦꉻꉺꏦꄺꀱ，ꈆꑪꇮꇐꊾꊋꇁꀦꄿꐨꊱꁨꃅꐮꈴꌠꄹꇙ，ꎆꏂꑘꊋꁈꄏꄉꇮꇐꇮꃅꊿꊌꐨꉀꐕ，ꊋꀥꇱꄉꇮꁈꀉꇨꌠꌧꊿꊋꊡ，ꎿꉈꌷꏷꊿꊋꊡꄉꀱꉈꑴꇩꈐꄉꏀꀺꑘꀺꇁ，ꉇꄅꇩꏤꌧꊿꉪꇩꏤꇁꌠꀊꃴꈴꈜꀺꀊꐯ。 ꋍꏅꀑꁮꊋꃤꏓꌊꋍꏅꊋꃤꐛ，ꀋꎪꃅꍏꇩꏀꀺ“ꀥꇱꐳꐨ”ꀥꅐꇁꄎꎂꀕ。
（ꌕ）ꃹꅼꃅꅉꃀꃅꐙꌠꀋꉬꀋꉆꁁꏯꄺꀱ。 ꄺꀱꁉꃑ40ꈎꈭꏝꐛꌠꌌꊜꋽꄮꃅꄉ，ꄺꀱꌠꄹꇙꌊꀊꏀꃅꂵꅐꌠꊌꅜ，ꀋꆏꃅꐧꋦꒃꅐꊋꃤꁌꄝꌋꆀꀻꎆ。
ꇩꁨꀕꇐꇩꁨꎆꏂꑘꄺꀱꌠꄹꎆ。 ꎆꅐꊿꍞꊟꏲꂠꌅꈌꃅꎁꃷꁨꋏꄯꒉꏤꄻꄉ。 ꃹꅼꃅꇩꁨꎆꀨꎆꇱ、ꀰꏢꇬꌦꑠꄺꀱꃅꉚ，ꑴꌅꌅꈌꀊꅰꀉꑌꃅꄻꇬꁳꄉ。 ꐪꊛꄉꇩꁨꎆꏂꑘꄻꃪꏓꄻꀱꌠꌋꆀꍏꑷꎆꏂꑘꇴꍆꄹꏦꄺꀱꌠꄹꎆ，ꐳꃅꇿꋌꐥꐮꏢꄉꌠꏦꊿꏱꄻꐛꉻꌋꆀꑻꈭꊌꐨꈲꁧꀊꂥꌠꃷꎏꈴꀰꏢꉺꏦꄻꐛ，ꐪꊛꄉꏠꁧꈯꂄꌠꃅ，ꀨꄜꑘꈯꄜꋓꈿꊋꃤꉀꐕ，ꇩꁨꎆꀨꄹꇙꄉꄻꀉꇨꄻꉾꃪꄻꀉꒉ。 ꏣꀋꑌꎍꐽꄉꄐꃅꐮꉔꁨꏦꄺꀱꌠꄹꎆ。 ꇩꏤꑭꊂꏓꄊꎮꊈꉼꏭꇩꁨꁨꇐꏲꂠꐛꐪꅇꄜꌠꄹꏦꃄꌬꇫꑟ。 ꇩꁨꎆꏂꑘꆏꄺꀱꏀꀺꌠꇬꈴꄉ，ꊇꁧꀊꂥꃅꀻꎆꌠꇬꂴꐊꌶ。
ꉹꁌꀰꏢꎆꏂꑘꀻꎆꌠꊋꁈꄏ。 “ꑍꑵꋍꍈꑌꀋꇙꀋꑐ”ꌠꌭꈬ，ꌅꈌꈲꁧꐥꊯ、ꊜꋽꄮꐥꊯ、ꏦꋪꐥꊯꌠꌭꈬ，ꐊꑷꃅꉻꁨꏦꀋꉬꌠꎆꏣꀻꎆꌠꏭꊋꁈꄏꏱꁈꏁꁈꃄꌬꇫꑟ，ꎔꎗꃅꉹꁌꀰꏢꎆꏂꑘꉉꄜꌠꌤꃆꑓꅐꎑꌠꂥꀘ，ꏟꈯꃅꋍꑞꋍꑵꂿꀋꉆꌠꁿꇓꐅꄻꇧꎭ。 ꑖꑟꐙꎴꌠꍔꃚꌋꆀꃼꇇꃅꌠꐮꃆꂮꀊꏀꉹꌠꏓꄻ，ꎆꏂꑘꌋꀉꇨꌠꁳꎆꏂꑘꃆꂮꐥꌠꏱꁈꏤꄻꌠꇬꐊꈽꎻꌠꉺꏦꄻꐛꒆ。 ꎆꏂꑘꌋꀉꇨꌠꉌꊈꄖꄑꌋꆀꀧꌋꃅ，ꎆꏂꑘꌋꀉꇨꌠꊿꁥꌌꀉꇨꀉꑌꇁ，ꎆꏂꑘꌋꀉꇨꌠꉌꊋꄻꀉꇨ，ꉹꁌꀰꏢꎆꏂꑘꁳꃷꎏꎆꏣꒉꂂꇬꄉꀉꇨꃅꃄꄻꎻ。
ꁨꇐꌅꈌꄹꏦꌋꆀꐊꊈꃷꎏꁆꄻꉺꏦꄻꐛꒆ。 ꁨꇐꌅꈌꄹꏦꆹꐧꋦꉪꏦꃷꎏꎆꏣꈯꌬꊋꃤꉬ。 ꁨꇐꌅꈌꀧꌋꃅ、ꋯꏤꄯꒉꌋꃅ、ꃷꎏꏓꋍꃱꃅ、ꐥꊯꃅꐮꀠ、ꐽꊯꃅꋓꅔꌠꌌꅉꀨꍝꄎꅍꃅꄉ，ꄚꃆꂮꐥꌠꏦꃤꏦꇗꄻꐛꒆ。 ꋍꑞꋍꑵꌅꈌꉄꌎꃅꐨꏭꆏꏦꃤꇬꈴꄉꅱꐆꃅꀞꄻ，ꁨꇐꌅꈌꏟꃆꏈꑘꑗꇖꃣꈌꏭꆏꏦꃤꇬꈴꄉꌌꊨꄅꃅꋊꍬꌶ。 ꀉꇨꃅꌧꇐꅏꄻꌅꈌꀧꌋꃅ，ꌅꈌꉄꌎꌠꅓꀞꃅꐙꌠꁵꊒꄹꏦꃄꌬ。 ꐳꃅꇮꇐ、ꃄꅉꑠꐊꊈꁌꏤꃷꎏꈴꌠꄺꀱ，ꃹꅼꃅꅐꀦꉹꌠꅐꇐꌋꆀꄉꉻꁧꃤꃅꁌꏤꄺꀱ，ꏲꑘꇂꇎꌠꅥꁖ，ꃷꎏꇂꇎꌠꄴꏮ。 ꊋꑌꌠꅏꄻꌅꈌꀧꌋꃅ、ꁣꀋꐥꌠꐊꊈꏭꇙꌠꌬꄉ，ꃷꎏꄓꊋꌋꆀꐧꋦꁧꀿꊋꃤꁳꆏꄑꉠꄩꐂꃅꁖꇁꎻ。
ꃹꅼꃅꏱꎆꇗꏸꏦꉻꄺꀱ。 ꍏꑷꌋꆀꃅꄷꎆꏲꌤꃆꌅꈌꌋꆀꌬꐨꃅꎁꁷꄻꄺꀱꌠꄹꎆ，ꐳꃅꊌꐨꁷꄻꄺꀱꌠꄐꉻꏤꄻꅐꇁ，ꆹꏮꁵꄻꄹꏦꄻꐛꒆ。 ꃅꄷꇗꏸꉻꑫꄻꐛꒆ，ꎍꐽꋭꋽꃅꑳꇤꁨꇐꇗꏸꏦꃤꏤꄻꌠꄹꎆ。 ꊨꏦꊌꐨꇗꏸꄺꀱ。 ꐊꑷꃅꃅꊌꐨꏲꂠꌠꃄꌬꄉ，ꏱꎆꎆꀨꁳꌌꋍꌫꅉꌬ、ꎃꊒꃅꌬꎻꌶ。
ꐳꃅꎆꒉꎆꇁꏦꉻꄺꀱ。 ꎆꒉꎆꇁꁧꃤꃅꉻꑫꄻꐛꒆ，ꎆꒉꎆꇁꏲꉻꊋꁈꄏꄉꁊꈲꎆꒉꎆꇁꃅꑘꀹꎆ，ꐛꏦꈴꃅꃅꄷꃤꐧꀠꀄꊭꌠꎆꒉꎆꇁꏲꉻꀻꎆ，ꊋꇤꄉꀄꊭꐭꉹꌠꎆꏂꑘꎆꏓꊋ、ꎆꏓꁌꇨꌠꌤꃆꂥꀘ。 ꃹꅼꃅꀉꑌꊐꃅꐙꌠꎆꀨꃷꎏꄺꀱ，ꎝꃆꊫꌐ、ꏤꃷꎊꈬꃷꎏꀻꎆꌠꄹꇙ。 ꄜꏂꀧꃷꎏꐔꈔꉆꌠꏦꀧꄐꊋꍔꐯ。 ꎆꒉꎆꇁꍞꏲꏦꉻꄺꀱ。 ꃹꅼꃅꇔꊰꍆꁧꉇꎆꀟꄻꍆꁧꃷꎏꈴꌠꄺꀱ，ꏓꂱꀙꎆꃀꉇꎆꀟꄻꍆꁧꁳꋭꋽꐽꊯꌠꑞꅉꇬꄉꀑꐱꃅꎍꐽꇬꎷꎻ。
ꐧꋦꏦꉻꄺꀱꌠꄹꎆ。 ꃹꅼꃅꃀꌠꀨꎹꄜꏂꀧꄹꏦꄺꀱ，ꎆꏂꑘꌤꃅꊿꅉꀨꃀꌠꀨꎹꄜꏂꀧꎆꀨꍏꑷꁳꋊꄻꎻꌠꄹꏦꄻꐛ。 ꃹꅼꃅꉻꀞꆅꉚꅉꏓꇱꄺꀱ，ꋮꄮꃅꆅꉚꆄꄻꁌꏤ、ꊿꌤꃄꎆ、ꁬꋌꏮꈴ、ꆅꉚꄜꏂꀧꁵꄻꄺꀱꌠꄹꎆ，ꆅꉚꆄꄻꁧꃤꃅꊇꁧꉀꐕ，ꊋꀉꒉꃅꇤꄉꉹꁌꆅꉚꆄꄻꊋꌠꌤꃆꂥꀘ。 ꃹꅼꃅꂘꑘ、ꁱꀕ、ꈯꎟꑠꄺꀱꌠꄹꎆ，ꋒꐯꋒꃅꐧꋦꁁꏯꀻꎆꊋꂫꀉꇨꐯꀉꇨꌠꋊꇤꅐꇁ。
ꒆꉻꌧꑳꏦꉻꄻꐛꒆ。 ꒆꉻꋦꈭꏲꂠꄹꏦꄻꐛꒆ，ꊋꀥꇱꄉꋌꐛꒆꉻꈥꈉꌫꅉꏢꑲꌠꄻꀉꇨ，ꒆꉻꋦꈭꉮꄻꁵꊒꄹꏦꄹꌬ，ꒆꉻꁵꊒꉺꏦꄻꐛꒆꄉ，ꀊꅰꃅꇿꋌꐥꌠꄹꏦꌌꒆꉻꋦꈭꀧꌋꃅ。
（ꇖ）ꏟꈯꃅꈢꇓꀖꀉꒉꌕꐘꌠꃄꄻꋒ。 ꃅꈎꈢꇓꀖꂿꃆꃅꇫꑟꌠꇬꆼꒆꄉ，ꋍꑞꋍꁁꏯꃅꎁꊨꄅ，ꏱꁈꏦꀧꌠꄻꀉꇨ，ꋍꑞꋍꐘꌤꃅꋒꃅꉾꌶ。
ꃨꆰꐨꀉꒉꀊꂾꌠꄴꏮꋊꑣꌠꄹꇙꄉꁨꎆꐨꄇꇖꀕꌠꊌꅜ。 ꀋꃋꋋꄮꉪꇩꏤꎆꏣꎆꒉꎆꇁꃨꆰꐨꀑꐱꃅꇬꋏꆸꉆ，ꐴꇱꁧꏲ，ꇿꋌꐥꃅꃨꆰꐨꉮꐴꋊꑣꇧꎭꌶ。 ꏦꇨꃅꏦꀋꊒꃅꎆꏓ、ꎆꒉꎆꇁꊏꀸꑠꏦꐆꑽꃤꃅꈧꌠꏭꇇꇩꍈ。 ꐳꃅꃷꎏꈴꏦꏲꈴꃅꎝꏮꇴꐛꌋꆀꎆꏂꑘꐅꄻꏓꀱ。 ꊋꀥꇱꄉꎆꒉꎆꇁꏲꉻꃨꆰꐨꈏꇓꋎꍅ。 ꎆꒉꎆꇁꍞꏲꏓꈴꇲꈴꃅꋮꄮꌠꄻꀉꇨ，ꒋꒌꑴꉴ、ꐮꈴꈄꏍꎆꒉꎆꇁ、ꎆꒉꎆꇁꇴꍆꋏꌭꇬꌦꑠꏭꍞꏲꌠꄻꐛꒆ，ꀒꁨꋍꁘꃅꎆꒉꎆꇁꍞꏲꌠꄻꐛꒆ、ꍞꏲꇿꋌꊐꐕ。 ꃅꄷꍔꃚꎝꈣꃨꆰꐨꄴꏮꋊꑣ。 ꏦꇨꃅꋍꑞꋍꑵꏦꐆꇗꐆꄉꎆꉛ、ꄉꀧꑠꃅꐨꏢꇋ。 ꌜꊐꌠꍔꃚꆏꂱꑱꏱꁕꇬꎝꈣꏭꉬꇮꃅꌄꇤꌶ，ꌜꊐꌠꈍꐯꃅꄷꍔꃚꈁꐥꊐꌠꆏꂱꂯꃤꌄꇤ，ꏣꀋꑌꃅꋭꋽꃅꏓꊭꄉꌠꎝꈣꀞꄻ。 ꐛꏦꈴꌠꃅꄷꍔꃚꎆꉛꎆꏓꉺꏦꄻꐛꒆ。 ꎼꈎꃅꄷꏭꌐꐘꎝꃆꊫꌐ1.35ꃪꂡꂷꄐꁆ，ꀋꉊꄻꈎꄩ5500ꂡꂷꁦꎆ，ꂴꄉꋈꄻꇰꌠꐘꃆꎍꐽꃅꋈꄻꌠꏭꊋꁈꄏ，ꄉꄐꃅꌐꐘꎝꃆꊫꌐꌫꄻꈍꈐꍔꐯ。 ꉪꇩꏤꎆꏣꀑꐱꃅꇬꉾꃪ，ꏱꁈꌬꅍꀉꑌ，ꇯꍝꃅꉻꑫꃅꐙꌠꃨꆰꐨꇫꅐꀋꇁꌠꂫꑟꐏꄉꄎꌠꉬ。
ꊒꌸꃅꎭꑆꇔꌠꊋꃤꀉꒉꃅꇱ。 ꎼꈎꉈꑴꂿꑘꁡꇤꌢꎭꊻꂷ1000ꃪꑼꈋꉐꀁꋌꊨ，ꊿ280ꃪꑼꎭꄏꎞꀀꌠꃅꇫꑟ。 ꃹꅼꃅꅐꑘ、ꂘꑘ、ꋬꂻ、ꒆꉻꌋꆀꁱꀕꑠꎭꄏꌠꄹꎆ，ꅉꃀꉂꈽꌋꆀꄉꉻꁧꃤꃅꌠꀋꇎꀋꂪꅉꅋꐯꊯ，ꊋꀥꇱꄉꁭꅐꁮꐚꁆꏯꌢꎭꄏꐓꇷꃅꌠꌋꆀꐮꊒꄉꐯꇇꀨ，ꌢꎭꄏꐓꌠꌌꉌꊈꄏꐓ、ꀑꊋꄏꐓꌠꌋꆀꐮꐊꐙꌠꉜꁨ，ꎭꑆꇔꈏꒆꇙꊋꄖꄑ。 ꊋꀥꇱꄉꌢꎭꐯꌢꎭꃅꄷꏭꊋꁈꄏ，ꍏꑷꏱꎆꌢꎭꄏꐓꎆꇱꀊꏀꃅꁦꎆꌠꌋꆀꄚꃆꂮꐥꌠꆹꏮꁵꄻꌠꌌꌢꎭꅼꇨꃅꄷꉜꄉꎎ。 ꃀꌠ、ꊾꄣ、ꆄꃚꑠꉇꉈꃅꏤꄉꌠꌢꎭꊻꂷꏭꆏ，ꑱꁯꉜꄉꊿꉜꄉꏦꀧꏁꁈꃄꌬꇫꑟ。 ꈢꇓꀖꊬꌠꇬꎭꑆꇔꇈꏱꁈꀋꐞ，ꀊꏀꃅꅐꇁꌠꌢꎭꊻꂷꌋꆀꀱꉈꑴꌢꎭꌠꊻꂷꆏꇇꈤꃅꌌꇇꀨꊋꄏꌠꇬꇱꄉꌶ。 ꌢꎭꄏꐓꎆꀨꋊꍬꐯꇯꀱꌠꌋꆀꃅꊌꐨꏲꂠꌠꊋꀥꇱ。 ꌢꎭꄏꐓꁁꏯꍹꈔꌋꆀꃅꇏꌤꃆꌐꄉꏱꄻꌠꃅ，ꎖꉚꍞꊟꃄꄟꄻꃪ。 ꀋꃋꌬꌠꎭꑆꇔꎕꏦꌭꈬ，ꁨꎆꐨꌋꆀꊇꁧꄉꀧ，ꎭꑆꇔꌠꁳꉹꁌꃶꐚꃅꇫꏚꍆ、ꐩꋊꁳꍤꎖꄎꎻ。
ꍍꆀꄴꏮꄹꎆꌠꃅꊌꐨꀊꅰꀉꒉꌠꊌꅜ。 ꃅꑆꃴꇉꀕꌠꊌꐨꄻꈫꈈ，ꎼꈎꑍꀑꐊꑘ、ꄊꀑꐊꇐꋊꃑꃷꁨ3％ꀁꋌꊰ，ꀋꂿꑘꃄꁕꈑꋧꐊꇐ（PM2.5）ꐊꐨꐪꊛꄉꀁꋌꊰ。 ꎸꅍꑠꉹꑘꀁꂥꐯꀁꂥꃅꋊꃑꄺꀱꌠꄹꇙ。 ꍍꆀꋊꃑꎕꏦꐕꀊꂥ，ꄮꈉꏤꄉꎕꏦꑟꌠꃄꌬ。 ꊋꇤꄉꁦꎴꊋꀦꀻꎆ。 ꊵꒀꌬꌠꎊꈬꈻꍯ、ꇉꎕꏦꐂꄉꋊꃑꌠꌐꐘꏱꄻꌠꃅ，ꐪꊛꄉꍮꊪꀉꆹꀉꁘꌠꀜꋊ。 ꃹꅼꃅꒉ、ꃄꅉꍍꆀꄴꏮꏱꄻꌠꄹꎆ，ꎼꈎꐈꇐꀑꈉꃷꁨ、ꉢꄊꋊꃑꃷꁨ2％ꀁꋌꊰ。 ꀋꂿꑘꈳꁕꌋꆀꎿꋮꆸꈈꐛꁕꏓꇱꏱꄻꌠꃄꌬ，ꐊꑷꃅꒉꊈꀉꆈꍹꅿꌠꏱꄻ。 ꒉꍍꆀꎵꄻꉁꈾꄺꑣꌠꇬꊋꃤꁦꎆꃅꇱ，ꁌꎴꏱꁈꄻꐛꒆ。 ꊋꀥꇱꄉꇴꄜꋊꀜꌋꆀꀉꀜꀊꇁꁸꄉꋊꄻ，ꏟꈯꃅ“ꉇꄅꎊꁘꎊꇁ”ꁳꇩꈐꃹꇁꎻꀋꉆ。 ꊋꀥꇱꄉꒆꉻꉻꑫꀧꌋꃅꌋꆀꀱꐛꅉꐛ，ꐊꑷꃅꒆꉻꀧꌋꃅꑟꅪꑴꏤꋒ，ꌩꏪ1ꂡꂿꈋꉐꊪꌐ，ꋠꃅꆦꊪꊪꆏꃅꊂꁦꎆꌊ3000ꃪꂿꇬꑟ，ꊋꀥꇱꄉꅉꃴꒉꀧꌋꃅꌋꆀꄻꐛꅉꐛ，ꒉꊩꀧꌋꃅꌋꆀꀱꐛꅉꐛꌠꈍꈐꍔꐯ，ꃹꅼꃅꇩꏤꋍꏅꈩꅉꏦꉻꄺꀱꌠꃅꉚ。 ꏦꇨꃅꎿꋍꅔꄻꌠꋏꌫ。 ꏦꇨꃅꋦꈭꏦꌬꌋꆀꅑꃤꎹ。 ꉪꊇꆏꇇꄻꐮꃬꄉ，ꃅꑆꃴꇉꀕ、ꃄꅉꃴꆧꁏ、ꀇꐒꐝꍠꀕꌠꎔꃨꌠꍏꇩꋈꄻꌶ。
（ꉬ）ꊋꀉꒉꃅꇤꄉꑣꋂꉀꎆꌠꄐꇐꏤꁈꃄꌬ。 ꋭꋽꃅꄐꎖꏤꄻ，ꇓꈓꇓꉈꐯꈽꀻꎆꌠꏦꉻꉺꏦꄻꐛꒆ，ꄺꀱꏀꀺꌠꉘꇉꄉꂿꑘꁡꇤꀻꎆꌠꄐꊋꀊꏀꌠꀺꄻꀉꇨ。
ꂿꑘꇲꁵꁁꏯꐛꉻꃅꐙꌠꄺꀱꌠꄹꎆ。 ꂿꑘꌩꑘꆫꑘꉛꑘꌋꆀꊪꑘꏀꀺꀻꎆꌠꊥꎆ，ꐳꃅꐛꏀꂿꑘꅐꑘꐛꅉꌋꆀꐋꀋꌡꂿꑘꅐꇐꂱꎆꅑꅉꋈꄻ。 ꊈꐕꌠꌌꍝꄎꌠꌭꈬ，ꋛꂷꒃꅐꎍꐽꌋꆀꉾꃪꎻ。 ꐳꃅꋛꂷꊭꊎꄉꌠꌬꈧ。 ꂿꑘꅐꇐꄺꂡꑘꀻꎆ。 ꎕꏦꀊꂥꌠꋠꃅ8000ꃪꂿꈋꉐ、ꈲꁧꀊꂥꃅꒉꏏꒈꎭꒉꊐꃅꊂ2000ꃪꂿꀊꏀꃅꁦꎆ。 ꀊꏀꉹꌠꀰꏢꀨꄜꉗꄻ，ꂿꑘꈆꑪꇮꇐꑟꐨꉀꐕ，ꂿꑘꏸꐕꌬꈴꈭꎁꑭꊂꐊꑷꃅꀻꎆꌠꄹꎆ，ꊋꀥꇱꄉꂿꑘꑱꁯꀄꊭꌠꏭꐧꋦꈴꌠꁧꃤꃅ。 ꀱꂱꑱꃅꄷꇁꌠꂿꑘꊿꊋꃅꌠ、ꄊꍏꍋꌶꅐꌠ、ꈆꑪꇮꇐꐥꊿ、ꂽꄻꎞꆏꇁꌠꌋꆀꇬꎭꎆꏂꑘꑠꈐꊟꊋꊡꌊꐛꏀꂿꑘꋈꄻ、ꂿꑘꁡꇤꃅꑘꐛꄟꀊꏀꌠꈁꏦꀊꏀꌠꀻꎆ。 ꃹꅼꃅ“ꐮꈴꈄꏍ＋ꂿꑘ”ꌠꀻꎆ，ꈴꈜꀉꑌꃅꏂꄉꂿꑘꊿꊌꐨꁦꎆꎻ，ꂿꑘꁡꇤꅐꑘꋍꑍꌕꉹꌠꐮꉔꀻꎆꌠꊥꎆ。
ꐊꑷꃅꃹꅼꃅꂿꑘꁡꇤꄺꀱ。 ꑍꈭꌠꃄꅉꀧꃅꏤꈉꑟꈭꐨꉈꑴ30ꈎꁦꎆꇬꇯꌠꏱꁈꃅꑞꅉꑟ。 ꑲꅉꇤꂷꁨꌅꈌ、ꇎꏦꌅꈌ、ꌬꈧꌅꈌꁷꄻꄺꀱꌠꎹꎥ，ꋠꃅꍆꁥꁵꐮꆽꏣꏲꂠꏡꁈꄻꃪ，ꀊꏀꃅꁦꎆꌠꋠꃅꌐꁧ、ꇓꈓꇓꉈꋈꄻꌬꃄꅉꁦꎆꊨꒊꐯꎏꏏꋒꌐꁧꌜꁕꐂꄉꋊꄻꌠꉺꏦꄻꐛ，ꈲꁧꊌꐨꈁꐥꌠꃅꌌꎭꑆꇔꈢꇓꀖꌋꆀꑣꋂꉀꄓꌠꇬꊋꁈꄏ。 ꃹꅼꃅꋛꂷꊭꊎ、ꋍꉻꁨꇐꌅꈌ、ꋍꉻꌩꏪꌅꈌ、ꇩꁨꌩꏪꌩꐷꄈꅉ、ꂿꑘꃅꏀꀖ、ꇲꃷꎹꑠꄺꀱꄉ，ꂿꑘꂿꑘꁡꇤꁳꍄꑐꇙꊋꐥꇁꎻ。
ꂿꑘꁡꇤꋍꑞꋍꐘꌤꑘꐊꑷꃅꀻꎆꌠꄹꎆ。 ꂿꑘꁡꇤꆅꉁꆄꄻ、ꂘꑘ、ꁱꀕꑠꄉꉻꁧꃤꃅꌠꄻꐛꒆ。 ꒉꇲ、ꄆꇲ、ꈴꌗꑠꅉꃀꉁꈾꄻꃪ，ꀊꏀꃅꋈꄻꄺꀱꀱꌠꂿꑘꁡꇤꄇꈜ20ꃪꉻꆏꐥ。 ꄔꐽꃅꂿꑘꁡꇤꊿꀀꋦꈭꌕꈎꏱꄻꃅꐨꍔꆙ，“ꅊꁧꒈꅉꄺꀱ”ꌠꌋꆀꀉꀜꀊꇁꏓꄻꋊꄻꌠꄹꎆ。 ꂿꑘꁡꇤꄹꆴꀺꆦꌠꊥꎆ。 ꑴꏲ、ꏦꏲ、ꑌꇐꏲꐮꐊꐙꌠꑣꋂꏱꄻꉻꑫꄻꐛꒆ。 ꊋꀉꒉꃅꇤꄉꑣꋂꄖꄑꌄꆣꌧꊿꉘꉚ。 ꉪꊇꆏꍏꇩꐛꐨꐧꋦꉪꏦꑣꋂꉀꄓꈝꃀꈴꇬꎷꄉ，ꐳꃅꂿꑘꂿꑘꁡꇤꐛꏀꈴꌠꃅꇫꑟꌶ。
（ꃘ）ꏟꈯꃅꃄꁕꋮꄮꀻꎆꌠꄐꇐꏤꁈꄹꎆ。 ꃄꁕꀻꎆꏱꁈꄻꐛꒆ，ꅉꀨꄉꉻꁧꃤꃅꌠꐽꏡꈴꌠꄹꎆ，ꋍꁘꋍꁘꃅꇓꈓꇓꉈꃄꁕꀻꎆꍣꐨꍕꒊꄉ，ꃅꄷꈁꐥꌠꊼꇅꂱꎆꅑꌠꌋꆀꊋꂫꑌꌠꋒꐯꋒꃅꋊꇤꎼꇁ。
ꃄꁕꀻꎆꐛꉻꀊꏀꌠꄺꑣ。 ꊋꀥꇱꄉꇝꂱꀉꆹꃅꄷ、ꊿꋅꃅꄷ、ꃅꋮꃅꄷ、ꌢꎭꃅꄷꄺꀱꀻꎆꌠꇬꊋꁈꄏ。 ꀙꏢꏓꈌꀋꉬꌠꄐꊋꁷꑣꌠꌌꀨꃅꄉꏢꏸꏹꋮꄮꃅꀻꎆꌠꄹꎆ，ꄓꈌꀊꂥꃅꄐꎖ、ꎕꏦꀊꂥꃅꑪꉢꑟꐎꋈꄻ。 ꒆꉻꂴꄉ、ꀊꃴꀻꎆꌠꌌꄐꏁꌠꃅꄉꍤꏦꎆꏣꁕꀻꎆꌠꄹꎆ。 ꒀꇤꉪꎿꈪꀉꒉꁕꀻꎆꄐꎖꐱꀨꃄꌬꌠꏤꄻꎼꇁ，ꐊꑷꃅꅔꈐꌋꆀꑣꇤ、ꉪꂱꐯꈲꇷꃅꌠꄹꎆ。 ꁮꐚꁁꏯꀉꒉꃅꀖꁉꌠꀊꏀꌠꄐꇺꉜꐨꏤꄻ，ꑌꌋꈤꑠꇮꑘꐛꅉꀉꆹꌠꉀꄖꏁꁈꃅꇫꑟ，ꐪꊛꄉꈯꄔꃅꄷꉀꄓꌠꄹꇙ，ꁭꅐꃅꄷꂴꐊꄉꀻꎆꌠꊋꁈꄏ。 ꊋꀥꇱꄉꅐꀦꉹꌠꃅꄷꎆꏣꉹꏮꀻꎆꌠꄏꐓ。 ꎿꃀꎆꏣꄺꂡꀉꒉ，ꏟꈯꃅꇩꏤꎿꃀꌅꈌꈲꁧꀧꌋꃅ。
ꀊꏀꉹꌠꇓꈓꏦꎫꐛꈴꊇꁧꉀꐕ。 ꎼꈎꉈꑴꇓꈓꈿꀀꇁꌠꊿ1300ꃪꑻꐥ，ꐳꃅꂿꑘꊻꂷꆹꏮꌊꇓꈓꊿꐛꎻ。 ꇓꈓꏦꎫꄐꎖꌠꄻꐛꒆ，ꄉꉻꈭꈜꌌꂴꄉꀻꎆ，ꉐꀖꃱꁧꃷꅉ、ꐕꍯꄈꅉꑠꉹꁌꃅꌒꑽꌒꁧꃤꃅꉁꈾꄻꃪ，ꐳꃅꇊꑴꀋꅑꉁꈾꋈꄻ。 ꊱꁨꃅ“ꇓꈓꇬꁡꇤ”、ꀀꁕꀉꆹꄺꀱꌠꄹꎆ，ꇱꄻꉁꈾꄻꃪ，ꇎꏦꐥꌠꊋꊡꄉꄆꅂꊐꄻꇬꄀ。 ꊋꀥꇱꄉꒉꁦꎵꈄꏍ、ꅉꃴꏓꇱꁠꐤꈴꈜ、ꎿꂱꇓꈓꑠꋈꄻ。 ꀊꏀꉹꌠꇓꈓꏦꎫꐛꈴꌠꈯꄜꆏꊿꉬ，ꊋꀥꇱꄉꑭꋧꃅꁧꃤꃅ、ꊾꊈꃅꄉꏲꂠꄉ，ꊿꋍꂷꋑꀋꋒꌠꁳꐯꇯꐽꊯꃅꀻꎆꌠꊜꋽꄮꐥꎻ，ꀀꊿꁳꐥꌒ、ꉌꇿꎻ。
（ꏃ）ꏣꀋꑌꃅꌬꈧꍔꐯꌋꆀꈲꁧꐥꃅꎆꇱꌠꊥꎆ。 ꀀꊿꈉꐨꀊꏀꃅꐛꐈꌠꇬꐊꄉꌬꈧꌠꍔꐯ，ꑓꏮꐛꉻꋊꄻꌠꇬꉜꄉꎆꇱꌠꁦꎆ，ꇲꁵꐛꉻꄻꃪꌠꌋꆀꈁꉬꈉꐨꄉꄐꃅꍔꒉꌠꉾꃪꃅꀰꏮꌠꏓꐛ。
ꌬꈧꌠꎆꏣꀻꎆꌠꏭꅉꃀꃅꐙꌠꂿꄐꀉꇨꃅꐥꎻ。 ꌬꈧꊐꐕꌠꄹꎆ，ꌬꈧꃅꑘꐛꄟꀊꏀꌠꈁꏦꀊꏀꌠꀻꎆ。 ꊋꀦꐕꍯꀊꏀꌠꍮꊪꃻꄻꇗꏸꈲꁵꏱꁈꉈꑴꌕꈎꁦꎆꃅꌬ，ꐊꑷꃅꍮꊪꌬꋺꌠꃷꌠꋎꏢꏱꁈꇤꇧꎭ。 ꐧꋦꊋꃤꊋꁈꄏꄉꆅꉁ、ꃀꌠꀨꎹ、ꂘꑘ、ꁱꀕꈯꎟꑠꁧꃤꃅꇲꁵꌠꁦꎆꎻ。 ꈁꉬꈩꆫꌶꀠꃄꁕꀹꄻ，ꇩꁨꈩꆫꀨꄉꅉꈩꅉꁌꎴꁌꏤꀁꋌꊰ。 ꈄꏍꇬꄉꃼꌠ、ꐳꃅꌞꎭꌠꐛꒆꃅꀻꎆꌠꄹꇙ。 ꋍꑞꋍꑵꌬꈧꊿꌅꈌꈲꁧꏭꉮꄻꌠꃅꐨꏭꆏ，ꏦꃤꈴꄉꅓꀞ，ꏦꇨꃅꌌꇇꇩꍈꌶ。
ꎆꇱꌠꇲꁵꐛꉻꄻꃪꌠꏭꀋꉬꀋꉆꃅꐙꌠꂿꄐꋊꇤꅐꇁ。 ꎼꈎꆏꎸꈜꎆꇱꌠ7320ꂡꂷ、ꄇꈜꒉꄩꎞꎭꎆꇱꌠ1.8ꃪꂡꂷꀑꂪꃅꌐ，ꈲꒉꇬꊎꋈꄻꌠꎆꇱꄉꈁ1ꃪꂡꂷꑟ。 ꅉꃀꉁꈾꀉꒉꀊꂾꃅꋈꄻꌠꐪꊛꄉꈯꄔꁮꐚꃅꄷꉜꄉꎎ。 ꀊꏀꈭꌠꇮꇐꄺꀱꊐꐕꋉꃆꀉꒉꀊꂾꌠꃄꌬ。 ꍏꑷꄐꌗꈐꎆꇱꁆꄻꌠ5376ꂡꂷ，ꀋꉊꄻꈎꄩ300ꂡꂷꁦꎆ。 ꉹꁌꎆꇱꊋꊐꌠꏱꁈꏁꁈꃅꇫꑟ，ꎸꈜ、ꃅꈯꎞꎭ、ꇓꋌꌗ、ꄆꈴꌗꑠꁁꏯꁯꈻꊋꃤꐥꌠꐘꃆꈨꄹꅐꇁꄉ，ꀋꎪꃅꉹꁌꎆꀨꁳꈒꃹꇁꄎ、ꀻꎆꄎꎻ。
（ꉆ）ꐊꑷꃅꁉꃑꐛꇷꀊꏀꌠꏓꐛꌠꄹꇙ。 ꀒꁨꋍꁘꃅꁉꃑꅉꌋꆀꏠꊐꍔꐯ，ꁉꃑꐛꉻꄐꉻꌋꆀꏦꉻꉺꏦꄻꐛꒆꄉ，ꑟꐨꀊꂥꃅꁉꃑꌠꌌꊇꁧꀊꂥꃅꀻꎆꌠꄹꇙ。
“ꋍꁕꋍꈜ”ꇩꏹꇷꃅꌠꄹꎆ。 ꐯꇯꇖꐯꇯꋈꄻꐯꇯꈲꊌꌠꌭꈬ，“ꋍꁕꋍꈜ”ꇩꏹꇷꃅꀊꂥꉉꎥꈉꊌꐨꃅꇫꑟ。 ꇩꏹꈴꈜꀊꐯꌠꋈꄻꌠꄹꇙ，ꃹꅼꃅꈛꁧꈴꀸꀉꒉꌠꐮꇷꃅ。 ꇩꏹꅐꊋꇷꃅꌠꍔꒉ，ꍏꇩꄺꂡꌠꌋꆀꍏꇩꁧꃤꃅꌠꏃꇙꌊꉇꅐꁧ。 ꉈꉻꏭꎆꇱꐛꉻꄻꃪ。 ꁮꐚꁆꏯ、ꅔꈐꌋꆀꎿꋮꆹꏮꁉꃑꌠꊋꃤꁦꎆꃅꇱ，ꃅꋮꋯꐂꎆꏣꇷꃅꅉꀻꎆꑟꐨꉀꐕ，ꁉꃑꇷꃅꈥꈉꀊꏀꌠꍔꐯ。
ꉇꉻꃼꇇꃅꊿꎆꇱꌠꎍꐽꃅꉀꎆꌠꊥꎆ。 ꊋꀥꇱꄉꇩꏹꌬꈴꎆꏣꃼꇇꏦꋪꌋꆀꐮꊪꊛ，ꇩꏹꀨꏠꌠꀰꏢꃼꇇꋦꈭꋈꄻ。 ꐊꑷꃅꎃꐚꄺꂡꑘꃑꄻ，ꄆꑠ、ꆅꉁ、ꂘꑘ、ꃀꌠꀨꎹ、ꊋꀦꐕꍯꀊꏀꑠꁁꏯꁉꃑꌠꍔꒉ。 ꊱꁨꃅꑴꉴꈁꋊꌗꑠꃷꎏꁉꃑ，ꉇꎆꄜꏂꀧꇢꆣꀞꇬꌦꀰꏢꈍꈐꋎꏢꌠꄝꃑ，ꑴꉴ、ꁌꁦꊫꌐ、ꎆꀨꏲꂠ、ꏤꃷꎊꈬ、ꎆꒉꎆꇁꁨꇐꏲꂠꇬꌦꑠꉇꎆꇴꍆꁧꋎꏢꌠꄝꏯꐯꅀꇤꇧꎭ，ꍏꇩꉇꄅꎆꀨꑴꉴꃷꎏꃹꉆꎕꏦꏓꋍꃱꃅꄉ。 ꇩꉈꎆꇱꊿꇩꈐꍍꊱꉈꑴꎆꇱꊛꄯꇗꏸꏮꌠꃄꌬ。 ꉈꎆꎆꏂꑘꀞꄻꈭꎁꄻꈝꐮꃅꄉ，ꃼꇇꃅꑘꁱꊐꌋꆀꇮꑘꃼꇇꁱꄀꌠ“ꋍꈚꄉꀞꄻ”。 ꐊꑷꃅꑴꌅꃼꇇꃅꋒꃯꉚꅉꎖꋪꌡꄉꃅ，ꄿꐨꃼꇇꈴꀸꋈꄻꌠꎹꎥ，ꄺꀱꁉꃑꀊꏀꃅꀊꂥꅉꄺꑣ。
ꉇꉻꃼꇇꎍꐽꌠꇬꄉꉾꅉꉜꄉꆹꌠꄻꈫꈈ。 ꉇꅐꉌꒊꄜꏂꀧꉱꑷꅉꍔꐯ，ꉻꄜꈴꀸꈴꄮꈉꉈꑴꌕꁧꋊꋍꁧꀁꋌꒊꎻ。 ꁧꃤꃅꃼꇇꀻꎆꉺꏦꄺꀱ。 ꃼꇇꃅꃅꑘꀊꏀꈁꏦꀊꏀꌠꉘꉚ。 ꄺꑣꃼꇇꄹꇙꌊꈯꄔꁮꐚꁁꏯꉜꄉꋍꊐꋍꊐꃅꆹꏮ。 ꏣꀋꑌꃅꈏꃹꌠꍔꒉ，ꇫꇬꃢꌠꍏꇩꇩꏹꈏꃹꀊꐯꈭꃅꄉꀨꌠꀞꋒ，ꐕꍯ、ꑍꃀꑍꌬꇐꄹꁆꑠꈏꃹꈴꀸꇗꏸꀁꋌꊨ。 ꉪꊇꆏꊋꀊꅰꀉꒉꃅꇤꌊꃷꎏꁉꃑꄉ，ꅐꑘꊐꐕꌋꆀꃼꇇꐽꏡꃅꀻꎆꌠꊥꎆ，ꌬꈧꊿꎁꃅꀊꅰꀉꑌꃅꌊꄻꅍꇲꁵꌶ。
ꃼꇇꌋꆀꎆꇱꄿꐨꈴꈝꐮꈴꌠꊥꎆ。 ꍏꇩꆹꀋꎪꀋꑴꃅꎆꏣꅉꆺꈴꌠꄹꎆ，ꄿꐨꃼꇇꀧꌋꃅ，ꄚꃆꂮꐥꁁꏯꌋꆀꐯꇯꀉꑌꁁꏯꃼꇇꐯꉇꌠꈭꎁꄹꇙ，ꏛꃅꃄꁕꐊꑷꎆꏣꇷꃅꃆꂮꋯꏤꐯꉇꌠꃅꌐ，ꐳꃅꑸꄠꄿꐨꃼꇇꃅꅉꌋꆀꄏꑸꎆꏣꏓꐊꄜꋈꄻ。 ꍏꇩꆹꐥꊯꋮꇖꌠꇬꈴꄉꃼꇇꅔꀥꌠꂥꀘꌠꍜꇜ，ꃼꇇꀧꌋꃅꉪꏦꏭꆼꁏ，ꏟꈯꃅꊨꏦꑴꅉꏦꊒꌅꈌꈲꁧꀧꌋꃅ。
（ꈬ）ꉹꁌꐥꐨꏦꀧꌋꆀꄻꃪꌠꑟꐨꉀꐕ。 ꀻꎆꅉꃀꀂꏽꄉꉹꁌꈲꌠꌤꃶꐚꌠꀉꑌꃅꀞꄻ、ꉹꁌꐥꐨꇬꌤꊋꋠꌠꀉꑌꃅꂥꀘ，ꉹꁌꐥꐨꂫꑟꄻꈬꃅꄉ，ꀋꆏꃅꏓꂱꉹꁌꊌꅜꃅꐙꐨ、ꐥꌒꃅꐙꐨ、ꋬꂻꃅꐙꐨꉀꐕꌶ。
ꊋꇤꄉꃅꑘꊌꑘꀺꌠꊥꎆ。 ꊋꀥꇱꄉꋍꑞꋍꁁꏯꄉꉻꃅꑘꊌꌠꁧꃤꃅ，ꄉꈁꀉꒉꃅꃅꑘꇮꇐꄐꊋꁰꍋꌠꃅ，“ꐮꈴꈄꏍ＋”ꌬꄉꃅꑘꊌꐛꄟꀊꏀꌠꀻꎆ。 ꎼꈎꌶꅉꀊꂥꌠꇬꌷꅐꌶꌺꆏ820ꎖꃪꑼꐥ，ꉈꑴꐩꋊꀊꂥꅉꀊꏀꌠꇬꑟ，ꈴꈜꀉꑌꏢꃅꃅꑘꊌꌠꊥꎆ，ꑘꀺꌠꌌꃅꑘꊌꌠꈺꇙꌠꊋꁈꄏꌶ。 ꏟꈯꃅꎞꆏꂽꑼꄻꇱꅉꇱ、ꏲꂠꌋꆀꏦꀧꌠꌤꃅꋒ。 ꊾꄣꑠꃅꑘꊌꊋꌠꊿꏭꇇꀨꊋꃤꁦꎆꇱ。 ꂿꑘꊋꃅꊿꃅꑘꊌꌠꍔꒉ，ꐊꑷꃅꃄꎆꄯꎝꌤꃆꏱꄻ。 ꑘꃅꃆꂮꋮꇖꉺꏦꄻꐛꒆ，ꌺꅪꌋꆀꇭꀧꃆꂮꉜꄸꌠꀜꋊꇧꎭ，ꀊꅰꃅꀋꈐꀋꉈ、ꀊꅰꇎꋒꃅꃅꑘꊌꌠꁳꉪꇩꏤꀻꎆꌠꄩꅐꉽꅉꐛꇁꎻ。
ꄔꐽꃅꀀꊿꊌꐨꑟꐨꉀꐕ。 ꐪꊛꄉꎞꆏꊿꅉꀨꃀꌠꀨꎹꎆꀨꌋꆀꇓꈓꇓꉈꀀꊿꅉꃀꃀꌠꀨꎹꎆꀨꉀꐕ。 ꋭꋽꃅꐧꋦꀁꂥꐯꀁꂥꌠꃄꎆꎕꏦꋊꄻ。 ꌤꏲꅉꌤꑘꌤꃅꅉꃄꎆꌋꆀꁥꇱꀥꁵꎆꄹꏦꄻꐛꒆ，ꎬꅧꃅꄷ、ꐋꀋꌡꌠꃅꈉꇬꉜꄉꎎ。 ꊾꄜꊌꐨꇗꏸꏭꄻꅉꉀꐕ，ꌳꃈꅮꉙꂘ、ꆄꒉꈺꒉꉃꄻꑠꌐꐘꌫꎆꈎꄻꌠꁦꎆꇱ，ꄉꄐꃅꃣꁧꊨ，ꏓꂱꉹꁌꈐꊟꊋꊡꌊꑘꃅꄉꊌꐨꁦꎆ、ꌣꈚꆹꎻ。
ꐽꊯꇈꊇꁧꐥꌠꂘꑘꀻꎆ。 ꇓꈓꇓꉈꋭꑘꂘꑘꋍꉻꃅꀻꎆꌠꄹꇙ，ꂘꑘꎆꇱꌠꐪꊛꄉꊋꋠꃅꄷꌋꆀꊋꁧꅉꏭꉜꄉꎎ。 ꃶꐚꃅꂿꑘꁡꇤꌶꌺꌷꆏꐨꊨꒊ，ꃛꊸꃅꇓꈓꏦꎫ“ꃷꁨꀉꑌꂘꁥ”ꀜꋊꇧꎭ，ꊋꇤꄉꐧꐭꌶꌺꌷꈉꉈꃣꇖꌤꃆꂥꀘ。 ꀊꉘꆹꊿꋅꊫꂫꃰꇌꉬ、ꑱꈐꉘꇉꐨꉬ。 ꈴꈜꀉꑌꏢꃅꌷꂾꉙꂘꅐꀦꇲꁵꌠꁦꎆꇱ，ꀊꉘꂘꃀꏭꉈꇬꌋꆀꉘꉚꌠꉜꁨ，ꐮꈴꈄꏍꑠꈴꌗꈴꇇꁈꌬꄉꀊꉘꉜꂘꈭꎁꇬꍞꏲꌠꊋꀥꇱ，ꀋꎪꃅꀿꃀꁳꇫꉈꄡꇬꇫꉌꇱꎻ。 ꊋꀥꇱꃅꑘꂘꑘꀻꎆ，ꐧꋦꊋꃤꃅꑘꂘꑘꀞꌠꊋꁈꄏꌋꆀꋊꍬ。 ꐧꊐꂥꌷꊬꌠꂘꑘꁊꈴꌠꄹꎆ。 ꎆꏣꐧꋦꀻꎆꈉꐨꌌꍝꄎꅍꃅꄉ，ꀊꂥꊐꌠꂘꑘꐛꉻꄻꃪ，ꐳꃅ“ꑍꀨꏠꌠ”ꋈꄻ，ꈯꄔꁮꐚꃅꄷꐋꀋꌡꐨꐥ、ꑟꐨꀊꂥꌠꒉꌶꅉꋈꄻꌠꊋꁈꄏ。 ꐪꊛꄉꂿꑘꁡꇤꌋꆀꌢꎭꃅꄷꌐꐘꌶꌺꎹꎖꄎꌠꃄꌬ。 ꊿꋅꂘꑘ、ꐋꀋꌡꂘꑘ、ꐪꊛꂘꑘꌋꆀꈄꏍꂘꑘꀻꎆ。 ꊋꀥꇱꄉꂘꃀꁥꌠꌋꆀꂘꃀꑌꇐꑲꇐꂘꄻ。 ꐳꃅꂘꑘꐛꏀꈴꌠꄹꎆ，ꏓꂱꉌꃹꌠꂘꑘꀞꄻꋒꄉ，ꊾꂷꈁꐥꌠꁳꉙꂘꌠꇬꈴꄉꊨꏦꊫꂫꃰꇌꄺꀱ、ꊿꐥꐨꉌꉪꅉꃅꇫꑟꌠꊜꋽꄮꐥꊯꌠꐥꌶ。
ꈯꂄꊈꂂꌠꍏꇩꄐꇐꏤꁈꃄꌬ。 ꅉꀨꆅꉁꄜꏂꀧꌋꆀꆄꒉꈺꒉꄜꏂꀧꏦꀧꑟꐨꉀꐕ，ꀀꊿꅉꀨꆅꉁꄜꏂꀧꊾꂷꌠꐽꏡꃅꇬꏱꎆꁥꁵꎕꏦꉈꑴꎆꃀ40ꂷꁦꎆ，ꈮꁁꆏꌌꆄꒉꈺꒉꄜꏂꀧꌠꇬꌬ。 ꌜꐂꌞꃅꄷꄉꆅꉁꌠꁌꈛꎂꃅꌗꂫꇽꈍꈐꍔꒉ，ꅉꂫꊐꌠꆅꉚꅉꌋꆀꉇꅐꂿꑘꊿꊋꃅꌠ、ꉇꇁꃅꑘꃅꑘꀺꊿꑠꉬꇮꃅꄻꈐꏭꇱ。 ꊋꀥꇱꄉꆅꉁꀨꎹꊿꉘꉚ，ꊋꀥꇱꄉꌧꈴꑱꌜ、ꀉꑳꆅꌠꉜꑱꌜꊿꁥꁱꂘ，ꊐꁸꄉꆅꇠꆅꉃꌠꌋꆀꑱꈐꑱꌜꏤꁱꄉꁧꃤꃅꌠꄹꎆ。 ꐪꊛꄉꅉꀨꄉꉻꁦꎴꆄꄻꁧꃤꃅꌫꎆꊾꂷꌠꐽꏡꏱꎆꁥꁵꎕꏦꉀꐕ。 ꄴꏮꌠꄻꂴꄉꇬꎷ，ꊋꀥꇱꄉꆄꒉꈺꒉꌠꄴꏮ。 ꌋꅪꀊꉘꇭꀧꂄꌠꀧꁧꃤꃅꉻꑫꄻꃪ。 ꍏꇩꆅꉁꁬꋌꌤꑘꊪꊛꏀꀺꀻꎆꌠꊋꁈꄏ。 ꍏꑭꑱꐮꐊꌠꊋꊡ。 ꋠꇐꁬꋌꍞꏲꃄꄟꏀꀺ，ꐮꈴꈄꏍ、ꃷꁨꊫꌐꀉꒉꌠꑠꌬꄉꍞꏲꄐꊋꉀꐕꌠꉜꁨ，ꐳꃅꈁꉬꈴꎁꐪꁮ、ꈴꌗꊂꈹꎹꈹꉆꌠꃅꇫꑟ，ꅐꇐꀋꉾꌠꁳꂁꀀꅉꀋꊌ、ꏦꀋꈴꃅꃷꄻꊿꁳꏦꃤꂾꆶꀋꄐꎻ，ꌬꈧꊿꁳꉌꇱꃅꃼ、ꉮꀋꐥꃅꋠꎻ。 ꀙꏢꃅꋆꉪꒀꉼ、ꃅꋆꊾꄣꉪꒀꉼꊭꄎꀞꄻ，ꈴꈜꀉꑌꏢꃅꉹꁌꈯꎟꅉꌋꆀꉁꈾꁦꎆꇱ。 ꏓꂱꉹꁌꇭꀧꉌꂵꂄ、ꉾꏯꉜꄉꆹꀍꉀꉜꄉꆹꆏ，ꇩꏤꆏꀋꎪꃅꌄꆣꍅꁍꀕ、ꌣꈚꐞꄿꇁꎂꀕ。
ꀊꅰꉾꃅꉹꁌꀀꑳꌤꃆꂥꀘ。 ꀊꏀꌠꌕꈎꑲꆹꇤꆹꄺꀱꈢꇓꀖꎖꄎꌠꃄꇬ，ꎼꈎ580ꃪꂷꋈꇬ。 ꉻꊤꑳꏦꀧꌠꊋꀥꇱ，ꊌꐨꀁꂥꀀꑳꊋꋠꑱꁯꏭꄉꀧꄡꑟꌠꄉꀧꌐ，ꇎꏦꄐꊒꌠꀊꏀꃅꃅꑘꃅꀀꑳꀋꐥꌠꌤꃅꇮꃅꊿ、ꉇꇁꌤꃅꇮꃅꊿꌌꏦꀧꅉꇬꇱꄉ。 ꑳꇤꆹꌌꄉꀀꌠ、ꌌꃼꀱꃷꀱꃅꌠꀋꉬꌠꇫꅉꏤꌠꌭꈬ，ꃅꄷꀨꄜꆽꎍꌠꃅꇫꑟ，ꐪꊛꄉꍣꐨꐥꃅꋏꆸꌠꃄꌬ，ꎴꈲꉺꏦꄻꐛꒆ，ꑲꅉꇤꂷꃷꎏꎍꐽꉾꃪꃅꀻꎆꌠꊥꎆ。 ꀀꊿꊨꏦꀀꑳꃼꈉꐨꏭꊋꁈꄏ，ꀀꑳꊤꀀꃷꎏꉗꄻ，ꀀꑳꁨꇐꌅꈌꇷꁨꌠꀻꎆ。 ꐳꃅꀨꄜꀉꑌꑵꃅꇲꁵ、ꈴꈜꀉꑌꏢꃅꏦꀧ、ꊤꃼꐯꇯꃅꌠꀀꑳꄹꏦꄻꐛꄉ，ꏓꂱꉹꁌꋍꏅꌠꁳꏛꃅꀀꑳꀀꌒꌠꊌꎻ。
ꀉꇨꃅꉹꁌꐥꐨꂫꑟꏦꀧ。 ꎍꐽꃅꇓꈓꇓꉈꂫꀧ、ꐧꋦꈭꋏ、ꅲꇫꇲꄻꈲꁵꑠꎕꏦꉀꐕ。 ꏣꀋꑌꃅꊻꂷꃀꌠꐛꈴꌠꊜꄻ，ꀁꇬꐥ、ꋥꁕꌋꆀꐯꇇꀨꃅꐙꌠꃀꌠꀨꎹꌠꀻꎆ，ꆅꉚꀨꎹꐮꐊꐙꌠꄹꎆ，ꃀꌠꀨꎹꅉꁧꃤꃅꊇꁧꉀꐕ。 ꂿꑘꁡꇤꐥꌠꑳꐍꀊꉘꇇꀨꉈꇬ。 ꊋꀥꇱꄉꇓꈓꇓꉈꊋꋠꌠꀊꉘꏦꀧ。 ꂽꂷꊂꌸꄉꄣꌠꌋꆀꀑꇬꁮꌠꇨꊨꏣꑟꈲꁵꌠꌤꃅꋒꌶ。 ꊋꀥꇱꄉꊾꄣꌠꀱꐛꀕꇁꌠꏭꁧꃤꃅ。 ꐧꋦꈭꋏꇇꀨꉻꑫꄻꐛꒆ，ꉻꈲꂄꃅꎔꏿꌤꑘꀻꎆꌠꊋꁈꄏ。 ꎔꃅꅉꂫꊐꌠꌤꃅꋒ，ꃄꊋꄷꄉꐵꀋꉆ，ꀄꊭꄷꄉꀋꃅꀋꉆ，ꐥꐨꊋꋠꊿꋍꂷꋑꀋꋒꌠꁳꐯꇯꐧꋦꉈꇬꌠꌋꆀꊷꆣꌠꊌꄎꎻꌶ。
ꐯꇯꋈꄻꐯꇯꏱꄻꐯꇯꈲꊌꌠꐧꋦꏲꂠꇶꏦꄻꐛ。 ꅉꂫꊐꌠꉹꁌꊨꏦꏲꄹꏦꄻꐛꒆ，ꊋꀥꇱꄉꋥꁕꏱꄻ。 ꇪꉼ、ꇭꏾꄨ、ꌋꅪꏓꉻꑠꁥꏓꎀꍹꂿꄐꋊꇤꋒ。 ꐧꋦꎀꍹ、ꌐꑘꐧꋦꌤꃅ、ꉌꇗꁧꃤꃅꉾꃪꃅꀻꎆꌠꊥꎆ。 ꊋꀥꇱꄉꐧꋦꉌꒊꉻꑫꋈꄻ。 ꄉꉻꏦꃤꁧꃤꃅꉻꑫꄻꐛꒆ，ꏦꃤꁊꈴꃅꎁꄹꏦꃅꇫꑟ。 ꌋꅪꁌꒉ、ꀊꉘꉈꇬ、ꃀꌠꉈꇬ、ꊾꄣꌠꀧꌋꃅꌠꃅꀹꉾꃪꌠꄻꐛ。 ꐧꋦꐮꄙꏟꃆꏈꑘꀉꑌꁁꏯꃅꉉꄮꌠꉺꏦꄻꐛꒆ。 ꄯꒉꁱꌊꅲꇫꇁꌠꌤꃅꄟꏀꀺ，ꏦꃤꈴꄉꐳꃅꉹꁌꋭꋽꑗꇖꅇꎹꌠꂥꀘ。 ꏦꇨꃅꋬꂻꒃꅐꃅꎁꃅꇫꑟ，ꏟꈯꃅꌤꀉꒉꀊꂾꌠꇫꅐꄡꎽ。 ꃄꇙ、ꃅꌗ、ꃄꊈꑠꌤꃅꌠꃅꋒ，ꉮꌸꄴꏮꉮꌸꊨꒊꉮꌸꈭꋏꌠꄐꊋꉀꐕ。 ꋬꂻꌠꍏꇩꋈꄻꌠꄹꎆ，ꊋꅸꏿꇶꌾꃅꈧꌠꌊꅱꈯꃅꄴꏮꌋꆀꏟꈯꃅꇇꇩꍈ，ꏦꃤꈴꄉꄸꅥꄸꋊꌐꐘꉈꈽꌠꃅ，ꊾꈐꊿꇏꊾꊏꎲꃅꄊꁉꅋꅝꅋꃷꑠꏦꐆꑽꃤꃅꌠꅓꀞ，ꄆꑠꈄꏍꊏꀸ、ꉻꊿꊨꏦꈴꌗꉄꌎ、ꈄꏍꊏꃷꑠꌤꃆꑓꅐꎑꌠꏱꄻ， ꇩꏤꋦꈬꌠꌋꆀꄉꉻꋬꂻꌠꀧꌋꃅ。
ꏓꂱꁳꐥꐨꐥꌒꎻꂿꄷꄉꌐꇁꈤꀋꉆꌠꉌꊈꋠꇐꇲꁵꌶ。 ꍏꉸꋊꃅꁱꀕꉾꃪꌠꍔꆙ，ꇝꂱꁱꀕꊪꊛ，ꐧꋦꉪꏦꄞꅐꁱꀕꀻꎆ，ꐧꋦꉪꏦꈯꄜꁌꐨꉜꐨꉗꄻꌋꆀꃄꄻꌶ。 ꊋꀥꇱꄉꉪꇐꑌꇐꂘꄻꌋꆀꉹꁌꃅꐙꌠꉌꊈꌧꑳꀹꄻꌶ。 ꐳꃅꍏꇩꐛꐨꍔꑪꐧꋦꈆꑪꋉꐛ，ꁱꀕꋽꇐꁰꄻꌠꌌꌄꆣ，ꈨꏀꍑꅐ、ꅇꁊꄆꒌꄆꁱ、ꄉꉣꑠꌤꑘꀻꎆ。 ꁱꀕꎊꇐꀧꌋꃅꌬꈧꌋꆀꁱꀕꍸꇐꀧꌋꃅꊪꊛꌠꊋꀥꇱ。 ꀊꏀꉹꌠꀑꁮꊭꊐꌠꋈꄻꋒ。 ꊋꀥꇱꄉꐮꈴꈄꏍꐊꇐꋈꄻ。 ꃹꅼꃅꁱꀕꉹꁌꈲꊌꋉꃆꃄꄻ，ꀊꏀꉹꌠꁱꀕꃅꑘꐛꄟꉘꉚ，ꐳꃅꁱꀕꅐꑘꀻꎆ。 ꉹꁌꃅꁱꂷꉜꀘꌠꄕꊪ，ꌶꄻꉹꌠꐧꋦꋈꄻ。 ꃹꅼꃅꍏꇩꉇꄅꊿꁱꀕꐮꈴꌠꃅ，ꍏꉸꁱꀕꑌꑲꊋꃤꉀꄖꀉꇨ。 ꉪꊇꆏꍏꇩꐛꐨꐧꋦꉪꏦꁱꀕꌄꆣꌠꌌꄉ，ꊿꋅꀱꌄꆣꇁꌠꉌꊈꊋꃤꀉꇨꐞꄿꌠꏓꋧꎼꇁꌶ。
ꁧꎁꊈ！
ꃅꋊꀊꏀꋎꌠꃹꆹꇬ，ꍔꃚꌤꃅꀊꏀꈒꌠꆏꃅꑊꀊꏀꃅꐨꀊꏀꌠꐥꌶ。 ꏟꈯꃅ“ꇖꑵꉪꉻ”ꑌꈬ，ꀋꎪꃅ“ꇖꑵꑴꑇ”ꇬꎷ，ꀋꎪꃅꑮꏣꀻꊝꎻꏹꈯꄜꉆꈉꀧꌋꃅ，ꀋꎪꃅꄈꍏꑷꋦꒉꐨꌋꆀꏓꋍꃱꃅꏲꂠꌠꀧꌋꃅ，ꐊꑷꃅꏦꇨꃅꄈꏱꄻꌠꇖꐨꃅꇫꑟ，ꊋꀥꇱꄉꍔꃚꑴꑳꋈꄻ，ꃹꅼꃅꍔꃚꌅꊋꆹꏮꌠꄹꎆ，ꐊꑷꃅꃅꎁꃅꐨꊐꐕ， ꏓꂱꎁꃅꊈꂄꑘꅐꁧꃤꃅꌠꇲꁵꌶ。
ꐊꑷꃅꏦꃀꈴꄉꏲꂠ、ꏦꃤꈴꄉꑘꏲꌠꄹꎆ。 ꏦꇨꃅꏦꃀꏦꃤꍬꌬ，ꐳꃅꏦꏲꍔꃚꋈꄻ，ꍔꃚꃅꈧꌠꐊꑷꃅꌌꏦꏲꍬꈜꇬꃹ。 ꏦꇨꏦꐛꎃꊒꌧꑳꃅꏦꌬꌠꌭꈬ，ꌅꈌꐥꇬꈁꏾꃅꌬꀋꉆ，ꌅꈌꌬꇬꀋꎪꃅꌠꁳꍞꊟꎻ。 ꍔꃚꈁꐥꊐꌠꆏꏦꃤꈴꄉꋋꊐꇬꏓꄊꌋꆀꋍꎮꊈꉼꁳꍞꊟꎻ，ꑴꐚꃅꏓꂱꍔꑠꁳꋮꁧꍞꊟꎻ，ꑴꇙꃅꐧꋦꌋꆀꉹꁌꉉꐨꁳꍞꊟꎻ，ꎔꎗꃅꏓꄊꁧꎁ、ꍔꑠꊈꑼꉜꐨꅱꄻ，ꋯꁦꄈꀾ、ꇬꎭꆃ、ꄈꀾꀋꐥꌠꊿꂒꋦꌠꌋꆀꏓꂱꏓꉻꈁꐥꌠꉜꐨꅱꄻ。 ꍔꃚꆏꀋꎪꃅꅇꏤꁨꌶ，ꈍꃅꑌ“ꇜꏀꎝꆹꏚꀋꍆ”ꌠꃅꀋꉆ。 ꐊꑷꃅꏲꃆꄇꄜꋊꌠꄹꎆ。 ꍔꃚꏦꃤꇖꊩꄟꃀꄹꏦꄹꌬ。 ꈆꑪ、ꋯꁦ、ꏦꈴꄉꁈꏤꌠꃄꌬꇬꎷ，ꉹꁌꈲꁧꇬꑌꑲꐨꐥꌠꌤꀉꒉꀊꂾꌠꉬꄷꆏ，ꉬꇮꃅꃹꅼꃅꋍꑞꋍꁆꏯꉜꐨꉈꑴꀠꂘꉜꐨꑌꇫꐊꌠꅱꄻ。 ꏓꂱꍔꃚꃤꌤꈁꃅꌠꐯꇯꏓꂱꉪꐨꄛꑣꌶ，ꃅꌊꉾꀋꉾꌠꆏꃶꐚꊌꐨꇬꉜ、ꄽꂫꆏꏓꂱꁳꇽꏤꎻꌶ。
ꐊꑷꃅꄈꃅꇏꐙꎴꋈꄻꌠꊋꀥꇱ。 “ꑍꌷꋍꄻ”ꌶꄻꉙꂘꅉꀕꐛꐨꈴꄹꏦꈴꌠꄹꎆ，ꎔꎗꃅ“ꇬꂾꉪꐨꎺꋒ、ꂿꃆꎺꈬ”ꌠꅇꀨꉙꂘꌠꃅ。 ꏟꈯꃅꄈꍏꑷꏤꐪꉆꐘꌠꌋꆀꃄꌬꏦꋧꉌꊈꃄꌬꇫꑟ，ꁨꂵꀋꆏꃅ“ꃅꇏꇖꑵ”ꏱꄻ，ꈜꀕꇈꊋꇤꄉꇶꏦꉪꏦ、ꇛꌺꉪꏦꏢꇋ。 ꊋꀥꇱꄉꍤꌗꍞꊟ。 ꍹꈔꏭꁎꉈꈽꌠꍅꄉꃅꐙꄟꄻꈫꈈꀻꎆ，ꌅꈌꈢꄹꏦꈄꁨꇬꊐ，ꏟꈯꃅꍹꈔꃅꐨꋍꑞꋍꉹꌠꅓꀞ。 ꍔꃚꌤꃅꊿꆏꌶꒃꐙꎴ，ꈪꑌꊋꇤ，ꑴꐚꃅꏦꃤꁳꍞꊟ、ꍞꊟꍤꄻꁳꍞꊟꌋꆀꏓꂱꁳꍞꊟꎻ，ꁦꎴꇤꌃꃅꏓꂱꎁꃅꌤꃅ，ꈍꃅꑌꏓꂱꋍꏅꊩꌺꂒꉻꋋꇬꏭꇢꏿꀋꉆ。
ꐊꑷꃅꍔꃚꌤꃅꂿꄐꉀꐕ。 ꍔꃚꏲꉻꄐꄻꌠꌋꆀꌅꊋꇱꄻꌠꄻꃪ，ꃹꅼꃅꏲꉻꄺꀱ，ꃅꎁꊨꄅ、ꏦꈴꑘꏲꌠꍔꃚꏱꄻꉻꑫꄻꐛ，ꍔꃚꉻꑇꊋꃤꌋꆀꃄꌬꊋꃤꀉꇨꎻ。 ꍏꇩꄺꀱꀻꎆꊌꐨꈁꐥꌠꆹ，ꉬꇮꃅꃄꅐꇁꌐꌠꉬ。 ꍔꃚꈁꐥꊐꌠꌋꆀꋍꌤꃅꊿꏭꃅꄉꉉꇬ，ꏓꂱꎁꃅꌤꃅꌠꆹꃅꋭꌠ、ꀋꃅꌠꆹꃅꎁꀋꃅꌠ。 ꊡꀮꏢꑲ、ꑽꐪꅓꄽꑽꐪꋊꍬꌠꉺꏦꄻꐛꒆ，ꊨꄅꃱꉻꃅꏣꀋꑌꃅꌤꃅꌠꏭꄘꄏꊋꌗꊐ，ꏦꇨꃅꏲꄸꏲꐵꌠꏭꅑꃤꎹ。 ꈍꃅꑌꉉꆏꅇꒉꉐꒉꉉ、ꃅꆏꃅꀁꑌꃅꌊꑞꅉꀋꑟꌠꐥꀋꉆ，ꈍꃅꑌꑋꅉꍆꄉꌤꀋꃅꌠꐥꎻꀋꉆ。 ꇥꀯꋍꏅꌠꆏꍔꍞꊇꁧꌋꆀꌤꃅꄐꅍꉀꐕ，ꇯꍝꌠꎹꃶꐚꌠꃅ，ꃅꌠꌌꂴꐕꄉ，ꃶꐚꀕꌠꃅꊌꐨꀊꏀꌠꃅꅐꇁ，ꉹꁌꇫꊂꉉꂂꌠꃅꅐꇁ，ꁀꄵꆳꂾꋓꃅꋓ、ꆎꐂꉠꃀꅞꌠꐛꊂꍄꑐꌠꃅꇫꅐꇁꌶ。
ꁧꎁꊈ！
ꍏꉸꊿꋅꆹꐮꄮꃅꐥ、ꋯꑌꃯꉻꌠꑱꁯꀉꒉꁯꉬ。 ꉪꊇꆹꏟꈯꃅꊿꋅꃅꄷꊨꏦꏲꄹꏦꄻꐛꒆꄉ，ꐊꑷꃅꄈꅿꊿꋅꏱꁈꃅꈴꌬꈴꌶ。 ꐪꊛꄉꊋꀥꇱꄉꊿꋅꃅꄷ、ꊻꂷꊼꇅꀁꑌꌠꊿꋅꀻꎆꌠꀂꏽꊋꁈꄏ。 ꇨꑭꍌꋇꊨꏦꏱꅉꐎ、ꆀꑤꉇꉈꊨꏦꏱꅉꐎꄻ60ꈎꈭꏝꐛꌠꋨꏦꃅꈧꌠꉾꃅꊥꇫ。 ꊋꀥꇱꄉꊿꋅꈁꐥꌠꐯꎻꈴꐮꑌꑲꐮꉔꄉ，ꍏꉸꊿꋅꏓꐊꄜꅉꃀꁳꀊꅰꃅꏟꈯꀕ、ꇺꏣꀊꅰꃅꈫꈈꇁꎻ。
ꉪꊇꆏꐊꑷꃅꄈꅿꑇꇐꌤꃅꅉꀨꌐꏦꃅꈴꌬꈴ，ꀋꎪꃅꉪꇩꏤꑇꇐꍏꇩꃤꃅꐙꌠꃅꍜꌭꈬꇬꎷ，ꑇꇐꐮꃆꂮꉾꃪꐮꄮꌠꊥꎆ，ꑇꇐꁁꏯꊿꂒꋦꌠꌋꆀꑇꇐꑇꌠꉹꁌꎆꏣꐧꋦꀻꎆꊥꎆꌠꇬꏣꀋꑌꂿꄐꋊꇤꅐꇁꌶ。
ꉪꊇꆏꎔꎗꃅꇩꉈꀀꃺꑌꌤꃆꏱꁈꃄꌬꇫꑟ，ꎿꉈꃺꑌꌋꆀꀱꁍꇩꇁꌠꃺꑌꏦꊒꌅꈌꈲꁧꀧꌋꃅ，ꊿꊇꇩꏤꐛꏀꈴꋈꄻꅉꇬꄉꐛꋲꂱꎆꅑꌠꌋꆀꀋꂿꑘꌠꂿꄐꋊꇤꌠꎁꃅꇎꏦꀊꅰꃅꉾꃪꌠꀹꄻꄉ，ꎿꈐꎿꉈꍏꉸꌺꇖꈐꊟꊋꊡꌊꐯꇯꊋꇤꏡꇤ、 ꐯꇯꊌꐨꀉꇨꌠꁦꄻꎼꇁꌶ。
ꁧꎁꊈ！
ꇩꏤꋦꈬꋦꈭꃹꅼꃅꐛꐈꌠꂾꄉ，ꉪꊇꆏꄈꃅꋊꀊꏀꋎꌠꂽꇨꁻꌐꌌꄐꏁꅍꃅꄉ，ꏟꈯꃅꑮꏣꀻꂽꇨꉪꇐꇩꐏꌋꆀꂽꏂꋈꄻꌠꇬꄐꇺꉆꈉꏤꄻꈫꈈꃅꄉ，ꀋꎪꀋꑴꃅꍏꇩꐛꐨꂽꇨꈝꃀꍬ，ꐊꑷꃅꂽꁰꍋꌉꊭꌉꄐꌤꃅꌠꄹꎆ，ꏟꈯꃅꊋꑌꃅꇩꏤꌅꀨ、ꋦꈬ、 ꀻꎆꈲꁧꀧꌋꃅꌶ。 ꄈꂽꏭꀋꎪꃅꏲꂠꌠꁧꀦꏥꏦꌋꆀꄹꏦꌭꈬꇬꎷ，ꐊꑷꃅꃹꅼꃅꂽꌤꊈꑼꉼꍗꑮꆽꎍꄹꏦꍬꌬ。 ꐪꊛꄉꇩꐏꌋꆀꂽꏂꄺꀱꌠꄹꎆ，ꀉꇨꈫꈈꌠꐛꏀꃅꋮꎿꇬꃅꈯꐏꁇꌠꋈꄻ。 ꇩꐏꄕꊪꉻꑫꄻꐛꒆ，ꋍꏅꃅꇩꐏꉙꂘꌠꊋꀥꇱ。 ꂽꌋꆀꂽꑱꈐꊿꏦꊒꌅꈌꈲꁧꀧꌋꃅꄉ，ꂽꁳꐧꋦꑭꊂꃅꇫꁌꒉꌠꃅꑘꐛꎻ。 ꃹꅼꃅꂽꌋꆀꏓꂱꐯꈽꄉꀻꎆꌠꄐꇐꏤꁈꌫꄻ，ꃹꅼꃅꇩꐏꈆꑪꇮꇐꇮꑘꄺꀱ。 ꍔꃚꈁꐥꊐꌠꆏꃄꁈꀊꅰꊋꑌꌠꌬꄉ，ꇩꐏꌋꆀꂽꏂꋈꄻꄺꀱꌠꊋꁈꄏ，ꃹꅼꃅꂽꁌꒉꂽꑱꈐꊿꀨꎹ、ꍔꃚꁌꒉꏓꂱꉁꅉꌠꃅ，ꂽꌋꆀꍔꃚꂽꌋꆀꏓꂱꐮꋯꑌꌊꇓꆈꀋ꒜ꌟꃅꈬ、ꈍꄮꑌꐴꅼꏾꂄꎻꌶ。
ꁧꎁꊈ！
ꉪꊇꆏꐪꊛꄉꐊꑷꃅꎃꊒꃅ“ꋍꇩꑍꏦ”ꌐꏦꃅꈴꌬꈴ，ꏦꇨꃅꏦꃀꌋꆀꅉꀨꏦꃤꇬꈴꄉꌤꀞꌶ。 ꊋꈀꑌꃅꇤꄉꑣꇤ、ꉪꂱꏲꑘꇣꋲꏱꅉꐎꍔꃚꌋꆀꏲꑘꇛꌺꏦꃤꈴꄉꏲꂠꌠꊋꁈꄏ，ꊋꀉꒉꃅꇤꄉꎆꏣꀻꎆ、ꐪꊛꄉꉹꁌꐥꐨꄻꃪ、ꊱꁨꃅꋯꁦꄹꎆ、ꐧꋦꐮꄮꌠꊥꎆ。 ꑣꇤ、ꉪꂱꇩꏤꀻꎆꃅꇴꄉꉻꀉꒉꌠꇬꃹꌠꊋꁈꄏ，ꅔꈐꌋꆀꑣꇤꃅꄷꐮꈴꇷꃅꌠꃹꅼꃅꀕ。 ꉪꊇꇬꑅꌠꆏ，ꑣꇤ、ꉪꂱꆏꀋꎪꃅꁍꇩꅔꈐꌋꆀꐯꇯꀻꎆ、ꐯꇯꌄꆣꇁꎂꀕ。
ꉪꊇꆏꐪꊛꄉꄠꃪꏭꌤꃅꌠꏱꁈꌐꏦꀉꒉꌠꃅꈴꌬꈴ，ꍏꇩꋍꂷꀉꄂꐥꌠꏥꏦꌭꈬꇬꎷ，“ꈬꑍꉜꐊ”ꌠꅉꃀꀂꏽꄉꎿꋯꑍꄷꄮꐽꃅꀻꎆꌠꄹꇙ，ꁍꇩꄮꐽꋍꃱꃅꌠꈴꎁꄹꎆꌶ。 ꏟꈯꃅꇩꏤꌅꀨꌋꆀꏲꄸꐛꒆꌠꐏꁇ，ꈍꃅꑌ“ꄠꃪꄂꋦ”ꁷꐞꏭꉪꌠꌋꆀꃅꐨꑠꇫꅐꇁꄡꎽ。 ꎿꋯꑍꄷꎆꏣꁱꀕꐮꈴꇷꃅꌠꍔꒉ，ꋍꁘꋍꁘꃅꄠꃪꃺꑌꅔꈐꇬꄉꌶꄻ、ꑘꀺ、ꃅꑘꊌ、ꐤꄻꌠꎁꃅꅔꈐꃺꑌꌋꆀꐯꌟꌠꇲꁵ。 ꎿꋯꑍꄷꋍꁯꉬ，ꃷꅍꆊꅪꐯꅑꎍ。 ꎿꋯꑍꄷꃺꑌꆏꐩꋊꆸꄟꊂꈹꄉ、ꐯꇯꊿꋅꇗꒉꆸꄜꄉ，ꀋꎪꃅꐯꇯꍏꉸꊿꋅꇰꀋꃀꃅꀱꌄꆣꇁꌠꉾꃪꌠꃆꏂꊂꑋꀹꄻꎂꀕ！
ꁧꎁꊈ！
ꍏꇩꆏꋧꃅꇣꄧꇩꏤꈁꐥꌠꀻꎆꌠꌋꆀꐯꅑꐮꁠꎍ、ꐒꌒꐯꇯꊝꌠꉬ。 ꉪꊇꆏꈍꄮꑌꀋꎪꀋꑴꃅꄮꐽꀻꎆꈝꃀꍬ，ꇩꏹꐮꃆꂮꀊꏀꉹꌠꏓꄻꌠꄹꇙ。 ꏣꀋꑌꃅꅉꆺꑭꊂꏱꄻꌠꄺꀱꐛꒆꌠꃅꈽ，ꊋꋧꄉꁉꃑꃅꐙꌠꋧꃅꎆꏣꋈꄻ。 ꇩꏤꀉꒉꌠꋮꄮꃅꇷꃅꌠꄹꎆ，ꃹꅼꃅꈭꇍꇩꏤꌋꆀꐮꉂꐮꄮꉈꑴꐯꇯꀻꎆ，ꀻꎆꇰꌠꇩꏤꌋꆀꋯꑌꇷꃅꌠꊋꀥꇱ。 ꀨꀎꑸꍏꉉꎥꃅꈎꃀ、ꎮꉰꇷꃅꎀꍹꀑꋾꃀ、ꍏꃏꇷꃅꉉꎥꀑꋾꃀꑠꃥꌋꉇꉻꑌꑲꌠꀞꋒ。 ꐪꊛꄉꇩꏹꌋꆀꃅꄷꊷꈌꌤꃆꂥꀘꌠꎁꃅꃅꎁꆽꎍꌠꇩꏤꀉꒉꂿꄐꋊꇤ。 ꎿꉈꈲꁧꀋꁮꀋꑍꌠꏦꀧꉻꑫꊋꀥꇱꌋꆀꄻꐛꒆ。 ꍏꇩꆏꇩꏤꈁꐥꌠꌋꆀꐮꐊꄉ，ꃰꊿꊫꂫꐮꐊꐙꌠꋈꄻꌠꄹꇙꌠꎁꃅꀋꆏꃅꊋꇤꏡꇤꏾ！
ꁧꎁꊈ！
ꋯꑌꆏꊋꏓ，ꃅꆏꊫꂫꐥ。 ꉪꊇꆏꀊꅰꑖꑟꃅꋯꑌꌊꐋꀨꑮꏣꀻꈯꄜꃅꄉꌠꄈꍏꑷꈭꇍꄉ，ꀊꂥꃅꍏꇩꐛꐨꐧꋦꉪꏦꇰꀋꃀꌠꁈꁧꐕꄉ，ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌌꄐꇺꅍꃅꄉ，ꋦꄉꏀꀺ，ꏟꈯꃅꌤꃅ，ꎆꏣꐧꋦꐪꊛꄉꉾꃪꃅꀻꎆꌠꊥꎆ， ꐊꑷꃅꊼꇅꌣꈚꌠꐧꋦꋈꄻꐛꌠꂫꋓꊋꐛ、ꃅꋊꀊꏀꋎꌠꍏꇩꐛꐨꐧꋦꉪꏦꇰꀋꃀꃅꊋꐛꌠꇑꅜꌠ，ꉪꇩꏤꋈꄻꌊꌣꈚꐞꄿꋯꁦꌧꑳꐮꄮꎔꃨꌠꐧꋦꉪꏦꐛꏀꈴꇩꏤꀉꇨꌠꐛꌠ、ꍏꉸꊿꋅꇰꀋꃀꃅꀱꌄꆣꇁꌠꍏꇩꉪꐨꃅꇫꑟꌠꎁꃅꑆꊋꀊꏀꌠꅐꌞꌶ！
