ꍏꇩꇭꍣꄈꄈꏦ
(ꍏꇩꇭꍣꄈꊯꈬꃢꌠꇩꏤꑭꊂꁧꎁꃀꀉꒉꈿꅉꇬꄹꁆꄺꀱꄉꌠ,2017ꈓ10ꆨ24ꑍꉌꃹꈴꄉꌠ)
ꐱ ꀨ
ꍏꇩꇭꍣꄈꆹꍏꇩꇮꃅꊿꏠꌠꇬꂴꅑꁥꌠꉬ,ꍏꇩꏓꂱꌋꆀꍏꉸꊿꋅꃤꂴꅑꁥꌠꑌꉬ,ꍏꇩꐛꐨꐧꋦꉪꏦꌤꑘꇬꏲꂠꈯꄜꉬ,ꍏꇩꂴꅑꌠꒃꅐꊋꃤꀻꎆꆹꈇꌠꇬꁧꎁꉬ,ꍏꇩꂴꅑꌠꁱꀕꀒꁨꀻꎆꆹꌠꃅꍜꇬꁧꎁꉬ,ꍏꇩꏓꂱꀉꑌꇊꀉꑌꈧꌠꊇꅉꈲꁧꇬꁧꎁꉬ。 ꄈꅿꀊꂥꇊꀊꂥꌠꉪꅉꌋꆀꄽꂫꇊꄽꂫꇬꑞꅉꁻꌐꆹꇷꁨꉪꏦꃅꇫꑟꌠꉬ。
ꍏꇩꇭꍣꄈꆹꂷꇻꌦꆺꆀꉪꏦ、꒜꒾ꄏꉪꇐ、ꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠ、ꈆꑪꃅꀻꎆꌠꉜꐨ、ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌌꊨꏦꃅꐨꇬꃅꍜꄐꅍꃅꄉꌠꉬ。
ꂷꇻꌦꆺꆀꉪꏦꆹꃰꊿꐧꋦꐩꋊꀻꎆꌠꈳꏦꋌꇱꋊꄜꎼꇁꀐ,ꋍꅉꀨꇗꏦꆹꎃꊒꌠꉬ,ꐥꎴꊋꃤꀉꇨꃅꑌꌠꉬ。 ꍏꇩꇭꍣꄈꊿꎹꈹꌠꇷꁨꉪꏦꉪꅉꀊꂥꇊꀊꂥꌠꆹ,ꐧꋦꉪꏦꐧꋦꇎꋒꃅꀻꎆꌠꌋꆀꀉꇨꃅꐞꄿꌠꅉ꒜ꇬꄉꑲꆀꃅꇫꑟꄎꌠꉬ。 ꐧꋦꉪꏦꄹꏦꀻꎆꌠꌋꆀꐛꒆꌠꆹꐩꋊꈭꎁꀊꉗꑠꊭꈴꁧꇁꌠꉬ。 ꏟꈯꃅꂷꇻꌦꆺꆀꉪꏦꅉꀨꇗꏦꌭꈬꃅꄉ,ꍏꇩꏓꂱꊨꏦꉌꃹꃅꌋꄉꌠꍏꇩꐛꃆꐛꂮꇬꄐꊒꌠꈝ꒜ꍬꇬꎷ,ꍏꇩꃤꐧꋦꉪꏦꌤꑘꆹꈍꃅꑌꄽꂫꇬꆏꊋꐛꇀꎂꀕ。
ꐋꀨ꒜꒾ꄏꀋꉬꀋꉆꌠꁧꎁꃅꄉꌠꍏꇩꇭꍣꄈꊾꆏ,ꂷꇻꌦꆺꆀꉪꏦꅉꀨꇗꏦꌌꍏꇩꇝꂱꇬꑭꋧꃅꃄꄻꌠꇬꐊꌊꄉ,꒜꒾ꄏꉪꇐꀹꄻꎼꇁꀐ。 ꒜꒾ꄏꉪꇐꆹꂷꇻꌦꆺꆀꉪꏦꌌꍏꇩꄉꌫꄻꌠꌋꆀꀻꎆꌠꉬ,ꋋꆹꃄꄻꅉꇬꄉꌌꊨꄅꄉꀐꌠꍏꇩꇝꂱꌋꆀꋈꄻꃆꂮꇬꌧꇗꏥꏦꎃꊒꌠꌋꆀꎖꋪꏓꄻꐯꇯꄉꌠꉬ,ꋋꆹꍏꇩꇭꍣꄈꋍꏅꀑꁮꐨꏓꐛꄉꌠꊌꐨꉬ。 ꒜꒾ꄏꉪꇐꌌꄐꏁꌠꇂꃴꄉ,ꍏꇩꇭꍣꄈꆹꇩꏤꑭꊂꊿꋅꈁꐥꌠꏓꂱꃅꋌꏲꂠꌊ,ꀊꉗꀊꎴꃅꄃꇩꉪꏦ、ꌅꁵꉪꏦ、ꇜꌺꎆꀨꉪꏦꏭꆼꁏꄉꇝꂱꃅꉈꈽꇈ,ꋯꁦꉪꏦꀊꏀꇝꂱꌠꊋꐛꄉ,ꏓꂱꋯꁦꌅꈌꌬꄉꏱꌅꌠꍏꉸꏓꂱꇭꉼꇩꄻꐛꀐ; ꍏꇩꀊꏀꄻꐛꊂꆏ,ꁣꀋꐥꃅꐧꋦꉪꏦꈴꄉꄺꀱꀐ,ꋯꁦꉪꏦꀊꏀꊬꌠꇬꄉꈳꅐꅷꐧꋦꉪꏦꇬꑟꌠꃅꇫꑟꀐ,ꐧꋦꉪꏦꅉꀨꄹꏦꄻꄉꀐ,ꐧꋦꉪꏦꎆꏣ、ꍔꍞꌋꆀꁱꀕꃅꌊꀻꎆꀐ。
ꊯꊪꈭꌕꃢꌠꍏꑷꊈꑼꉼꊈꑼꐊꈴ꒜ꈿꊂꅑꅸꇁꌠ,ꐋꀨꄓꑦꀻꀋꉬꀋꉆꌠꁧꎁꃅꄉꌠꍏꇩꇭꍣꄈꊾꆏ,ꍏꇩꀊꏀꄻꐛꊂꊒꀋꊒꌠꑍꁁꏯꎖꋪꏓꈹꐯꇯ,ꉪꇐꁌꄝ,ꑞꉬꌠꑞꃅꄉ,ꄈꑭꊂꌤꃅꈯꄜꆹꏮꌊꎆꏣꋈꄻꌠꇬꆹ,ꄺꀱꁉꃑꌠꃄꌬ, ꐧꋦꉪꏦꌤꑘꀻꎆꌠꀊꏀꊭꀹꄻꎼꇁꀐ,ꋍꁘꋍꁘꃅꍏꇩꐛꐨꐧꋦꉪꏦꋈꄻꌠꈛꏦ、ꌐꏦ、ꏱꁈꄻꐛ,ꍏꇩꄉꐧꋦꉪꏦꋈꄻ、ꐧꋦꉪꏦꈫꈈꌠꌋꆀꀻꎆꌠꅉꀨꌤꃆꉉꊨꄅꄉ,ꄓꑦꀻꌧꇗꀹꄻꄉꀐ。 ꄓꑦꀻꌧꇗꆹꂷꇻꌦꆺꆀꉪꏦꅉꀨꇗꏦꌌꀋꃋꋋꄮꍏꇩꃄꄻꌠꌋꆀꃅꋊꐛꐨꏓꐯꇯꌠꅐꇐꉬ,ꋋꆹ꒜꒾ꄏꉪꇐꐩꋊꇎꏦꀊꏀꌠꇂꃴꄉꊪꊛ、ꀻꎆꆹꌠꉬ,ꋋꆹꂷꇻꌦꉪꏦꌌꍏꇩꄉꀻꎆꌠꀊꏀꊭꉬ,ꋋꆹꀋꃋꋋꄮꍏꇩꃤꂷꇻꌦꉪꏦꉬ,ꋋꆹꍏꇩꇭꍣꄈꋍꏅꀑꁮꐨꏓꐛꄉꌠꉬ, ꉪꇩꏤꐧꋦꉪꏦꐛꏀꈴꌤꑘꄐꏁꌊꀋꆏꃅꀒꁨꆹꇬꎷꌠꉬ。
ꊯꌕꈭꇖꃢꌠꍏꑷꊈꑼꉼꊈꑼꐊꈴ꒜ꈿꊂꅑꅸꇁꌠ,ꐋꀨꏦ꒾ꂱꀋꉬꀋꉆꌠꁧꎁꃅꄉꌠꍏꇩꇭꍣꄈꊾꆏ,ꍏꇩꐛꐨꐧꋦꉪꏦꋈꄻꌠꃄꄻꅉꇬꄉ,ꃹꅼꃅꑞꆏꐧꋦꉪꏦꉬ、ꈍꃅꄉꍏꇩꐛꐨꐧꋦꉪꏦꋈꄻꌠꌋꆀꄈꈍꃅꐙꂷꋈꄻ、ꈍꃅꄈꋈꄻꂯꌠꌧꐚꂿꐚꄉ, ꄈꏲꇩꏲꎖꋪꀊꏀꁌꇐꈤꑠꈨꏓꊭꎼꇁꇈ,“ꌕꑵꁧꎁ”ꉪꇐꀋꂿꑘꌠꐛꀐ。 “ꌕꑵꁧꎁ”ꉪꇐꀋꂿꑘꌠꆹꂷꇻꌦꆺꆀꉪꏦ、꒜꒾ꄏꉪꇐ、ꄓꑦꀻꌧꇗꇬꊪꊛ、ꀻꎆꆹꌠꉬ,ꀋꃋꋋꄮꋧꃅꇣꄧꌋꆀꍏꇩꀻꎆꐛꐈꆹꌠꄈꌋꆀꇩꏤꌤꃅꅉꏭꇖꐨꀊꏀꌠꄜꋊꅐꇁꀐ,ꋋꆹꄈꋈꄻꌠꇬꊋꀥꇱꌠꌋꆀꄻꃪꌠ、ꉪꇩꏤꐧꋦꉪꏦꑴꅉꇬꄻꐛꒆ、 ꀻꎆꌠꄹꎆꅉꇬꌧꇗꇇꌭꀉꇨꐯꀉꇨꌠꉬ,ꋋꆹꍏꇩꇭꍣꄈꋍꏅꀑꁮꐨꏓꐛꄉꌠꉬ,ꋋꆹꄈꀋꎪꃅꀊꉗꃅꌭꈬꌶꌠꄐꇺꉪꇐꉬ。 ꈍꄮꑌ“ꌕꑵꁧꎁ”ꃅꇫꑟꌶꌠꆹ,ꉪꄈꅿꄈꋦꁧꀦ、ꍔꏲꅉꀨ、ꊋꃤꅐꀦꉬ。
꒜ꀉꒉꊰꃘꃢꌠꈿꊂꅑꅸꇁꌠ,ꐋꀨꃛꏢꄧꀋꉬꀋꉆꌠꁧꎁꃅꄉꌠꍏꇩꇭꍣꄈꊾꆏ,ꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿꑘꌠꌌꄐꇺꅍꃅꄉꌠꌭꈬꇬꎷ,ꀻꎆꈉꐨꀊꏀꌠꇬꈴꄉ,ꃹꅼꃅꃅꒊꃅꇁꀊꏀꌠꇂꃴꀻꎆꈍꃅꐙꌠꃅꇫꑟ、 ꈍꃅꄉꀻꎆꑠꌤꃆꀉꒉꀊꂾꌠꌧꐚꌋꆀꅇꀱꀐ,ꊿꌌꀨꇬꄉ、ꐊꑷꃅꋮꄮꃅꊛꄉꀻꎆꉆꌠꈆꑪꃅꀻꎆꌠꉜꐨꐛꀐ。 ꈆꑪꃅꀻꎆꌠꉜꐨꆹꂷꇻꌦꆺꆀꉪꏦ、꒜꒾ꄏꉪꇐ、ꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠꌋꆀꋍꐴꃅꐯꊛꇈꃅꋊꐊꄉꁨꆹꌠꈆꑪꌧꇗꉬ,ꋋꆹꂷꇻꌦꉪꏦꀻꎆꌠꋧꃅꉜꐨꌋꆀꏡꁈꉉꈻꌠꃆꂮꏓꋧꄛꑣꌠꉬ,ꂷꇻꌦꉪꏦꍏꇩꃤꐛꈴꌠꀉꒉꀊꂾꌠꊌꐨꉬ, ꍏꇩꇭꍣꄈꋍꏅꀑꁮꐨꏓꐛꄉꌠꉬ,ꍏꇩꐛꐨꐧꋦꉪꏦꀻꎆꌠꀋꎪꃅꀊꉗꃅꌭꈬꌶꌠꄐꇺꉪꇐꉬ。
ꃀꀉꒉꊰꉆꃢꌠꈿꊂꅑꅸꇁꌠ,ꐋꀨꑮꏣꀻꀋꉬꀋꉆꌠꁧꎁꃅꄉꌠꍏꇩꇭꍣꄈꊾꆏ,ꃅꋊꀻꎆꌠꇬꐊꄉ,ꌧꇗꌋꆀꃄꄻꌠꏓꐯꇯꌠꀂꏽꄉꑭꋧꃅꃅꋊꀊꏀꋎꌠꇬꍏꇩꐛꐨꐧꋦꉪꏦꈍꃅꐙꌠꌭꈬꌠꌋꆀꀻꎆꌠ、 ꈍꃅꄉꍏꇩꐛꐨꐧꋦꉪꏦꌭꈬꌠꌋꆀꀻꎆꌠꃅꋊꎥꃆꀉꒉꀊꂾꋋꏢꏭꅇꀱꀐ,ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꀹꄻꄉꀐ。 ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꆹꂷꇻꌦꆺꆀꉪꏦ、ꃀꊱꄏꉪꇐ、ꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠ、ꈆꑪꃅꀻꎆꌠꉜꐨꇬꊪꊛꌠꌋꆀꀻꎆꌠꉬ,ꂷꇻꌦꉪꏦꍏꇩꃤꐛꈴꌠꉜꐨꀊꏀꇊꀊꏀꌠꉬ,ꄈꌋꆀꏓꂱꃄꄻꎖꋪꌋꆀꋍꏅꀑꁮꐨꏓꐛꌠꉬ, ꍏꇩꐛꐨꐧꋦꉪꏦꌧꇗꉻꑫꇬꏓꐛꌠꀋꂿꑘꄹꁆꉬ,ꄈꑭꊂꇩꏤꑭꊂꏓꂱꃅꍏꉸꊿꋅꇰꀋꃀꃅꀱꌄꆣꇁꌠꎁꃅꊋꇤꇬꃄꄻꃅꍜꄐꌐꅍꉬ,ꀋꎪꃅꀊꉗꃅꌭꈬꄷꀋꁧꀋꆏꃅꀻꎆꌶ。 ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌌꄐꇺꌠꇂꃴꄉ,ꍏꇩꇭꍣꄈꆏꇩꏤꑭꊂꊿꋅꈁꐥꌠꏓꂱꃅꋌꏲꂠꄉ,ꉈꈽꇰꀋꃀꌠ、ꋉꃆꇰꀋꃀꌠ、ꌤꑘꇰꀋꃀꌠ、ꉪꐨꇰꀋꃀꌠꏓꏲ,ꍏꇩꐛꐨꐧꋦꉪꏦꄹꇙꌊꃅꋊꀊꏀꋎꌠꇬꃹꆹꀐ。
ꄺꀱꁉꃑꊂꅑꅸꇁꌠꉪꊇꊌꐨꌋꆀꀻꎆꐨꈁꐥꌠꁧꀦꁢꊧꆹ,ꏓꈹꐯꇯꎼꇁꇬ:ꍏꇩꐛꐨꐧꋦꉪꏦꈝ꒜ꀹꄻꅐꇁꀐ,ꍏꇩꐛꐨꐧꋦꉪꏦꌧꇗꉻꑫꐛꀐ,ꍏꇩꐛꐨꐧꋦꉪꏦꄹꏦꏤꄻꄉꀐ,ꍏꇩꐛꐨꐧꋦꉪꏦꁱꀕꀻꎆꄉꀐ。 ꄈꑭꊂꐋꀨꊈꃅꄈꎭꅗꅧꅗꃅꀹꄻꅐꇁꌠꈝ꒜ꋋꏢ、ꌧꇗꉻꑫꋌꐘ、ꄹꏦꋋꏢ、ꁱꀕꋌꐘꀊꅰꃅꁌꒉ、ꀊꉗꃅꌭꈬꌋꆀꀋꆏꃅꀻꎆꄉ,ꍏꇩꐛꐨꐧꋦꉪꏦꁈꁧꇰꀋ꒜ꌠꀊꂥꃅꐕꄉ,ꏟꈯꃅꈝꃀꑴꑇ、ꌧꇗꑴꑇ、ꄹꏦꑴꑇ、ꁱꀕꑴꑇ,ꄈꅿꅉꀨꌧꇗ、ꅉꀨꈛꏦ、 ꅉꀨꄐꇐꌭꈬꇬꎷ,ꐛꏀꈴꋈꄻꌠꄹꎆ、ꁍꇩꏓꋍꃱꃅꌐ、ꋧꃅꄮꐽꀧꌋꃅꌠꌋꆀꐯꇯꀻꎆꌠꊥꎆꌠꐩꋊꂿꃆꀉꒉꋋꌕꐘꃅꇫꑟ,“ꋍꉐꈎꑍꂷ”ꌠꊋꇤꁻꌐꃅꇫꑟ、ꍏꉸꊿꋅꇰꀋꃀꃅꀱꌄꆣꇁꌠꍏꇩꉪꐨꃅꇫꑟꌠꎁꃅꊋꇤ。
ꉪꇩꏤꆹꀋꃋꄷꀋꁧꀊꉗꃅꐧꋦꉪꏦꉘ꒜ꊬꌠꇬꎍꑴꌦ。 ꋋꆹꂴꇯꆐꎆꏣꁱꀕꊁꊰꌠꍏꇩꐧꋦꉪꏦꐛꏀꈴꋈꄻꌠꐩꋊꐂꆹꀋꉆꑠꊭꉬ,ꃅꐎꉏꎖꈎꈁꄻꅐꌠꉬ。 ꉪꇩꏤꐧꋦꉪꏦꋈꄻꇬ,ꀋꎪꃅꉪꇩꏤꐛꃆꐛꂮꇬꉜꄉ,ꍏꇩꐛꐨꐧꋦꉪꏦꈝ꒜ꍬꌶ。 ꀋꃋꋋꊭꇬ,ꉪꇩꏤꐧꋦꇬꐮꄙꐨꀋꉬꀋꉆꌠꆏꏓꂱꋍꑍꋍ꒿ꃅꉀꎆꇁꌠꉾꇁꃪꃅꐥꌠꈉꐨꌋꆀꐮꆽꀋꏣꇎꀋꋒꌠꀻꎆꇢꊭꇬꐮꄙꐨꉬ。 ꇩꈐꇬꒉꄸꌋꆀꇩꉈꇬꁧꏖꐛꅹ,ꊿꏠꐮꉈꈽꌠꋍꈨꈐꇬꀊꉗꃅꐥꁧꑴꌦ,ꇎꏦꊵꑵꈨꐤꄮꇬꆏꀊꅰꃅꃛꇨꇀꑌꉆ,ꄚꋋꆹꐮꄙꐨꀨꏡꌠꀋꉬꀐ。 ꉪꇩꏤꐧꋦꉪꏦꋈꄻꌠꁧꀦꂿꃆꆹ,ꀒꁨꋍꁘꃅꒃꅐꊋꃤꁌꄝ,ꒃꅐꊋꃤꀻꎆ,ꋍꁘꋍꁘꃅꐧꋦꉪꏦꐛꏀꈴꌠꃅꇫꑟ,ꄷꀋꁧꋋꏢꐛꅹꃅꒃꅐꐮꃆꂮꌋꆀꄩꇴꏦꉻꇬꒃꅐꊋꃤꀻꎆꌠꇬꀋꊒꁆꏯꌋꆀꊨꊭꇬꄺꀱꌠꉬ。 ꀋꎪꃅꉻꁨꏦꌬꌠꌌꀨꃅꄉ、ꎆꏣꁨꏦꀉꑌꑵꃅꐯꇯꀻꎆꌠꅉꀨꎆꏣꄹꏦꌭꈬ、ꄻꐛꒆ,ꀋꎪꃅꃅꐨꉜꄉꁸꌠꌌꀨꃅꄉ、ꁷꄟꀉꑌꑵꃅꐯꇯꌬꌠꁷꎸꄹꏦꌭꈬ、ꄻꐛꒆ,ꈐꊟꊋꊡꄉꃅꄷꋍꈨꌋꆀꊿꋍꈨꁳꂴꌣꈚꇁ,ꋍꁘꋍꁘꃅꌢꎭꌠꀋꐥꇁ,ꐯꇯꌣꈚꇁꌐꌠꃅꇫꑟꎻ, ꒃꅐꀻꎆꌠꌋꆀꐧꋦꁨꇐꁦꎆꇁꌠꅉ꒜ꀂꏽꄉꀋꆏꃅꏓꂱꋍꑍꋍ꒿ꃅꉀꎆꇁꌠꉾꇁꃪꃅꐥꌠꈉꐨꇬꇎꈴ,ꃰꊿꐊꑷꃅꀻꎆꌠꊥꎆ。 ꀻꎆꌠꆹꉪꄈꋋꂷꌅꈌꌬꇩꏤꄖꄑꌄꆣꇁꌠꌤꃆꀨꎍꐘꌠꉬ。 ꀋꎪꃅꏓꂱꌌꈯꄜꃅꄉꌠꀻꎆꉪꇐꌭꈬ,ꏀꀺ、ꋮꄮ、ꀊꃴ、ꁉꃑ、ꐯꇯꈲꊌꌠꀻꎆꉪꉻꑌꇬꎷ。 ꋍꑞꋍꑵꌤꃅꌠꈁꉬꃅꐧꋦꉪꏦꐧꋦꇬꒃꅐꊋꃤꀻꎆꌠꇬꈲꐪꐥ,ꐧꋦꉪꏦꇩꏤꏓꇱꇩꊋꀉꇨꇁꌠꇬꈲꐪꐥ,ꏓꂱꐥꐨꐕꀊꂥꌠꇬꈲꐪꐥ,ꋋꈨꌌꑭꄑꈉꌋꆀꎖꉚꌐꏦꃅꄉ,ꑘꃅꁌꒉ、ꌧꇐꁌꒉ、ꌧꊿꁌꒉ、ꀹꄻꁌꒉ,ꀻꎆꌠꆹꏓꂱꎁꃅ、ꀻꎆꌠꏓꂱꉘꇉ、 ꀻꎆꌠꊌꐨꆏꏓꂱꐯꇯꈲꌠꃅꇫꑟ。 ꐂꐥꋊꀊꏀꌠꃹꇬ,ꉪꇩꏤꆹꐊꑷꃅꊼꇅꌣꈚꌠꐧꋦꋈꄻ、ꐳꃅꐧꋦꉪꏦꐛꏀꈴꌠꄹꎆꌊꀻꎆꑞꅉꀊꏀꊭꇬꃹꆹꀐ。 ꀋꎪꃅꍏꇩꐛꐨꐧꋦꉪꏦꌤꑘ“ꉬꑵꋍꉻ”ꀑꐱꄐꉻꌋꆀ“ꇖꑵꐊꑷ”ꄐꇐꄐꉻꇬꈴꄉ,ꏓꈴꇲꈴꃅꎆꏣꋈꄻ、ꍔꍞꋈꄻ、ꁱꀕꋈꄻ、ꐧꋦꋈꄻ、ꒆꉻꌧꑳꋈꄻꌠꄹꎆ,ꋮꄮꃅꐊꑷꃅꊼꇅꌣꈚꌠꐧꋦꄻꐛ、ꐊꑷꃅꃹꅼꃅꄺꀱ、ꐊꑷꃅꏦꃤꈴꄉꇩꏲ、 ꐊꑷꃅꏦꇨꃅꄈꏲꌠꄹꎆ。 ꐥꋊꀊꏀꃅꋊꀊꏀꋎꌠꇬ,ꎆꏣꌋꆀꐧꋦꀻꎆꌠꄐꇐꏤꁈꑞꅉꁻꌐꆏ,ꄈꄻꋍꉐꈎꐛꄮꇬꆏ,ꐊꑷꃅꊼꇅꌣꈚꌠꐧꋦꄻꐛ; ꍏꇩꀊꏀꄻꋍꉐꈎꐛꄮꇬꆏ,ꐊꑷꃅꐧꋦꉪꏦꐛꏀꈴꌠꇩꏤꀉꇨꌠꄻꐛ。
ꍏꇩꇭꍣꄈꆹꐧꋦꉪꏦꉘ꒜ꊬꌠꇬꅉꀨꈛꏦꆏ:ꇩꏤꑭꊂꊿꋅꈁꐥꌠꏓꂱꏲꂠ、ꋯꑌꌊꄉ,ꎆꏣꋈꄻꌠꌌꈯꄜꃅꄉ,ꅉꀨꏥꏦꇖꐘꌠꌭꈬꇬꎷ,ꄺꀱꁉꃑꌭꈬꇬꎷ,ꊨꏦꊋꃤꉘꇉ,ꎬꅧꃅꑘꀺ, ꉪꇩꏤꋈꄻꌊꌣꈚꐞꄿꋯꁦꌧꑳꐮꄮꋽꎔꌠꐧꋦꉪꏦꐛꏀꈴꌠꇩꏤꀉꇨꂷꐛꇁꌠꎁꃅꊋꇤ。
ꍏꇩꇭꍣꄈꆹꐧꋦꉪꏦꌤꑘꏲꂠꇬ,ꀋꎪꃅꎆꏣꋈꄻꌠꌌꈯꄜꃅꌠꌭꈬꇬꎷ,ꀉꁁꋍꑞꋍꑵꌤꈀꃅꌠꃅꈯꄜꋋꏢꇬꐊ、ꋋꏢꎁꃅꃅꌶ。 ꈆꑪꂘꑘꌌꇩꏤꄖꄑꌄꆣꌠꄐꇐꏤꁈ、ꌧꊿꌌꇩꏤꋈꄻꀉꇨꇁꌠꄐꇐꏤꁈ、ꏀꀺꄹꇙꀻꎆꌠꄐꇐꏤꁈ、ꑣꋂꄖꄑꍄꑐꄐꇐꏤꁈ、ꃄꁕꋮꄮꃅꀻꎆꌠꄐꇐꏤꁈ、ꊛꄉꀻꎆꉆꌠꄐꇐꏤꁈ、ꂽꌋꆀꉹꁌꐮꉔꄉꀻꎆꌠꄐꇐꏤꁈꌫꄻ, ꇎꋒꃅꈆꑪꇮꇐꌌꒃꅐꊋꃤꀨꐘꌠꃅꄉꌠꂿꄐꇤꅐꇁ,ꋒꐯꋒꃅꏀꀺꌠꌌꀻꎆꌠꇬꄐꏁꌠꇘꊋꀨꏡꌠꂿꄐꋊꇤꅐꇁ,ꈆꑪꇮꇐꀻꎆꌠꉘꇉꄉ,ꑘꁨꊿꊇꁧꐕꀊꂥ,ꇩꂱꎆꏣꊇꁧꀊꅰꃅꀊꂥ、ꑘꅐꐨꀊꅰꃅꐥ、ꀊꅰꃅꐽꊯ、ꀊꅰꃅꊛꄉꀻꎆꉆꌠꊥꎆ。
ꐧꋦꉪꏦꈝ꒜ꍬꌠꌭꈬꇬꎷ、ꏓꂱꋯꁦꌅꈌꌬꄉꏱꌅꌠꌭꈬꇬꎷ、ꍏꇩꇭꍣꄈꏲꂠꄉꌠꌭꈬꇬꎷ、ꂷꇻꌦꆺꆀꉪꏦ꒜꒾ꄏꉪꇐꌭꈬꇬꎷꌠꅉꀨꏥꏦꋋꇖꐘꆹ,ꉪꊇꃤꇩꋦꁧꀦꉬ。 ꐧꋦꉪꏦꐛꏀꈴꋈꄻꌠꈴꎁꋋꂷꇬꃅ,ꀋꎪꃅꅉꀨꏥꏦꇖꐘꌠꌭꈬꇬꎷ,ꁨꇐꐥꏠꌠꄿꐨꈴꌠꏭꆼꁏꌶ。
ꄺꀱꁉꃑꌠꌭꈬꇬꎷꌠꆹ,ꉪꊇꃤꇩꏤꀉꇨꇁꌠꇬꀋꍬꀋꉆꌠꈝ꒜ꉬ。 ꄺꀱꁉꃑꇬꀉꄂ,ꍏꇩꀻꎆꄎ、ꐧꋦꉪꏦꀻꎆꄎ、ꂷꇻꌦꉪꏦꀻꎆꄎ。 ꐊꑷꃅꃹꅼꃅꄺꀱ,ꍏꇩꐛꐨꐧꋦꉪꏦꄹꏦꄻꃪꌋꆀꀻꎆ,ꇩꏤꏱꄻꉻꑫꌋꆀꏱꄻꊋꃤꐛꏀꈴꌠꄹꎆ。 ꁧꀦꇬꄉꒃꅐꊋꃤꀻꎆꌠꇬꈭꑴꈜꑲꌠꎆꏣꏦꉻꄺꀱ,ꐧꋦꉪꏦꃷꎏꎆꏣꏦꉻꌭꈬ、ꄻꐛꒆ; ꋋꏢꇬꌋꆀꐮꄉꄐꃅꄉ,ꍔꍞꏦꉻꄺꀱꌠꌋꆀꀉꁁꁁꏯꇬꄺꀱꌶ。 ꏟꈯꃅꉇꉻꏭꁉꃑꌠꅉꀨꇩꁈꌬ,ꐧꇁꃰꊿꈀꁧꀿꄉꌠꌧꑳꊌꐨꈁꐥꌠꎹꈹ、ꌶꌬꌶ。 ꄺꀱꁉꃑꌠꆹꉌꂵꀉꒉꃅꎹꎥ,ꀬꅑꃅꀹꄻ,ꄺꀱꁈꏤꌠꇬꈆꑪꐨꉀꐕ,ꀊꅰꃅꄺꀱꉻꑫꐨꐥ、ꉻꄜꐨꐥ、ꋮꄮꐨꐥꌠꉜꁨ,ꃄꄻꅉꇬꄉꈭꏀꈜꏀꀹꄻꅐꇁꄡꑟ。
ꍏꇩꇭꍣꄈꆹꏓꂱꋌꏲꂠꌊꐧꋦꉪꏦꃷꎏꎆꏣꀻꎆ。 ꋍꍈꑌꀋꇙꀋꑐꃅꉻꁨꏦꎆꏣꄻꈫꈈ、ꀻꎆ,ꋍꍈꑌꀋꇙꀋꑐꃅꉻꁨꏦꀋꉬꌠꎆꏣꀻꎆꌠꊋꊡ、ꊋꁈꄏ、ꄐꏁ。 ꃷꎏꁳꌬꇐꁆꄻꌠꇬꏤꄻꃅꐙꌠꂿꄐꇤꅐꇁꎻ,ꀊꅰꉾꃅꍔꃚꂿꄐꋊꇤꅐꇁ,ꉻꒉꋊꐽꉻꑫꄺꂡꐛꒆ。 ꇓꈓꇓꉈꀻꎆ、ꃄꁕꀻꎆ、ꎆꏣꐧꋦꀻꎆ、ꊾꌋꆀꋌꐛꋌꐙꐮꄮꃅꀻꎆ、ꇩꈐꀻꎆꌠꌋꆀꉇꉻꁉꃑꌠꉜꈴꇲꈴ,ꎆꏣꐛꉻꋊꍬ,ꎆꏣꀻꎆꄟꆹꏮ,ꇲꁵꁁꏯꐛꉻꃅꐙꌠꄺꀱꌠꄹꎆ。 ꀊꏀꉹꌠꇮꑘꈴ、ꈴꌗꈴ、ꇓꈓꏦꎫꐛꈴ、ꂿꑘꐛꏀꈴꌠꋍꋓꃅꀻꎆꌠꊥꎆ,ꐧꋦꉪꏦꂿꑘꁡꇤꀊꏀꌠꋈꄻ,ꍏꇩꐛꐨꀊꏀꉹꌠꇮꑘꈴꌠꈝꃀꍬ,ꏀꀺꉹꌠꇩꏤꌋꆀꋧꃅꈆꑪꇮꇐꀉꇨꌠꇩꏤꂷꋈꄻ。
ꍏꇩꇭꍣꄈꆹꏓꂱꋌꏲꂠꌊꐧꋦꉪꏦꋯꁦꍔꍞꀻꎆ。 ꏟꈯꃅꄈꁳꏲꂠ、ꏓꂱꑱꏲꃥꌋꐛ、ꏦꈴꇩꏲꌠꋭꋽꃅꏓꋍꃱꃅꄉ,ꍏꇩꐛꐨꐧꋦꉪꏦꍔꍞꀻꎆꌠꈝ꒜ꍬ,ꐧꋦꉪꏦꋯꁦꍔꐯ,ꍏꇩꐛꐨꐧꋦꉪꏦꏦꏲꉻꑫꋈꄻ,ꐧꋦꉪꏦꏦꏲꇩꏤꋈꄻ,ꏓꂱꋯꁦꌅꈌꌬꄉꏱꌅꌠꄻꈫꈈ,ꐧꋦꉪꏦꍔꍞꌧꑳꋈꄻ。 ꏟꈯꃅꏓꂱꁧꎁ꒜ꀉꒉꈿꌠꄹꏦ、ꍏꇩꇭꍣꄈꏲꂠꄉꌠꄈꀉꑌꂷꃅꇷꃅꌠꌋꆀꍔꍞꋮꒉꄹꏦ、ꊿꋅꃄꁕꊨꏦꏲꄹꏦꌋꆀꅉꂫꊐꌠꉹꁌꊨꏦꏲꄹꏦꌭꈬ、ꄻꐛꒆ。 ꀊꅰꃅꀊꐯ、ꀊꅰꃅꇎꋒ、ꀊꅰꃅꐛꒆꌠꏓꂱꋯꁦꀻꎆ,ꋮꒉꋯꁦꌠꀊꐯꈭ、ꀉꑌꊐ、ꄹꏦꈴꃅꀻꎆꌠꄹꎆ,ꃶꐚꃅꏓꂱꇩꏤꌤꆿꌋꆀꐧꋦꌤꆿꏲꂠ、ꎆꏣꌋꆀꁱꀕꌤꑘꏲꂠꌠꌅꈌꈲꁧꏦꀧ。 ꃰꊿꌅꈌꁌꒉꌋꆀꏦꀧ。 ꀊꐯꃅꅇꉉꈜꁌ,ꋯꁦꃅꌊꄻ、ꋯꁦꃅꁈꏤ、ꋯꁦꃅꏲꂠ、ꋯꁦꃅꍞꊟꌠꄹꏦꌋꆀꈭꎁꄻꐛꒆ。 ꍏꇩꐛꐨꐧꋦꉪꏦꏦꃤꉻꑫꄻꐛꒆ,ꏦꃤꃄꌬꌤꃅꌠꊋꀥꇱ,ꇩꏤꋍꑞꋍꑵꌤꃅꌠꏦꏲꈴꌠꃅꇫꑟ。
ꍏꇩꇭꍣꄈꆹꏓꂱꋌꏲꂠꌊꐧꋦꉪꏦꂴꅑꁱꀕꀻꎆ。 ꐧꋦꉪꏦꉌꊈꌧꑳꋈꄻ,ꏦꈴꇩꏲꌠꌋꆀꑌꇐꌌꇩꏲꌠꏓꐯꇯꄉ,ꊿꋅꈁꐥꌠꉪꇐꑌꇐꊇꁧꌋꆀꈆꑪꁱꀕꌧꐨꐕꀊꂥꃅꄉ,ꄺꀱꁉꃑꌠꌋꆀꐧꋦꉪꏦꐛꏀꈴꋈꄻꌠꎁꃅꀉꇨꌠꉪꇐꄉꀧꅍ、ꉌꊈꇘꊋꌋꆀꀑꁮꊋꃤꊋꁈꄏꌠꇲꁵ,ꐧꋦꉪꏦꁱꀕꀉꇨꌠꇩꏤꂷꋈꄻ。 ꐧꋦꉪꏦꈯꄜꁌꐨꉻꑫꋈꄻꌠꊋꀥꇱ,ꏟꈯꃅꂷꇻꌦꉪꏦꌌꄐꇺꉪꇐꃅꄉ,ꍏꇩꐛꐨꐧꋦꉪꏦꐮꐊꉪꅉꑌ,ꇩꉂꉪꏦꌌꈯꄜꃅꄉꌠꊿꋅꉌꊈꌋꆀꄺꀱꏀꀺꌠꌌꈯꄜꃅꄉꌠꃅꋊꉌꊈꍔꆙ,ꐧꋦꉪꏦꈯꄜꁌꐨꉜꐨꉘꉚꌋꆀꃄꄻ,ꐧꋦꉪꏦꂄꄸꉜꐨꄕꊪ,ꊿꋅꑴꑲꁌꒉ、 ꑴꑇꌋꆀꑴꇨꉌꊈꀉꇨꄉ,ꎆꀨꉪꏦꌋꆀꌅꁵꉪꏦꉪꇐꍹꈔꑠꈏꃹꇁꌠꄘꑣ,ꐧꋦꇬꄷꅠꃅꐨꋍꑞꋍꑵꑠꌩꎳꇧꎭ,ꊋꇤꄉꉪꇩꏤꏓꂱꁳꊫꂫꉪꅉꐥ、ꑌꇐꑲꇐꐥ、ꁱꀕꌧꇐꐥ、ꍬꏦꐥꌠꏓꂱꐛꎻ。 ꄈꑼꏭꇷꁨꉪꏦꉪꇐꎳꒉꌠꌌꂘꑴꌶ。 ꊋꀉꒉꃅꇤꄉꂘꑘ、ꈆꑪ、ꁱꀕꌤꑘꀻꎆ,ꍏꉸꉾꃪꌠꋊꃅꐥꌠꁱꀕꄹꇙꌊꀹꄻꐨꐥꃅꆹꏮ、ꏀꀺꐨꐥꃅꀻꎆ,ꇝꂱꁱꀕꊪꊛ,ꐧꋦꉪꏦꂴꅑꁱꀕꀻꎆ,ꇩꏤꁱꀕꆓꊋꃤꉀꐕ。 ꏟꈯꀕꃅꉪꐨꐛꄟꌤꃅꏲꂠꌅꈌꒃꇇꈐꊐꄉ,ꀋꆏꃅꂷꇻꌦꉪꏦꌌꉪꐨꐛꄟꁁꏯꇬꄐꇺꅍꃅꄉꌠꉆꈉꄻꈫꈈ,ꄈꑭꊂꇩꏤꑭꊂꏓꂱꃅꋯꑌꄉꉈꈽꌠꐮꐊꉪꇐꅉꃀꄻꈫꈈ。
ꍏꇩꇭꍣꄈꆹꏓꂱꋌꏲꂠꌊꐧꋦꉪꏦꐮꄮꐧꋦꋈꄻ。 ꋯꁦꏦꏲ、ꎃꊒꑗꐥ、ꀋꎪꉁꄮ、ꌄꆣꍄꑐ、ꑘꒃ꒾ꁨ、ꊾꌋꆀꋌꐛꋌꐙꐮꄮꃅꐯꇯꋦꌠꀑꐱꈉꐨꌋꆀꐯꇯꋈꄻ、ꐯꇯꈲꊌꌠꏥꏦꇬꈴꄉ,ꏓꂱꐥꐨꏦꀧꌠꌋꆀꄻꃪꌠꌌꀨꇬꄉ,ꏓꂱꋍꉎꀋꐥꃅꇫꉈꇬꌠ、ꋍꉎꀋꐥꃅꈛꎂꌠ、ꋍꉎꀋꐥꃅꃶꐚꌠꈲꁧꃆꂮꂥꀘꋒꄉ, ꀻꎆꊌꐨꀊꅰꃅꀉꑌꀊꅰꃅꀋꈐꀋꉈꃅꏓꂱꈁꐥꌠꁳꈲꊌꎻ,ꀋꆏꃅꏓꂱꉹꁌꊌꐨꌌꉪꐨꀉꇨꇁꎻ,ꊋꇤꄉꏓꂱꋍꏅꌠꑞꄐꆏꑟꃅ、ꑞꊌꋭꌠꑞꊌꇈꐮꄮꃅꐮꐊꌠꐛꐨꐛꇁ。 ꐧꋦꏱꄻꌠꊋꀥꇱꌋꆀꏀꀺ。 ꁮꐚꉪꐮꄙꌠꌋꆀꏓꂱꈏꇓꐮꄙꌠꊇꅉꇬꐯꀋꌡꃅꐮꄙꋋꑍꉹꏦꇨꃅꊨꄅ、ꎃꊒꃅꂥꀘ。 ꐧꋦꋬꂻꏓꇱꏱꄻꌠꊋꀥꇱ,ꏦꃤꈴꄉꏟꈯꃅꋍꑞꋍꑵꇩꏤꋬꂻꌠꌋꆀꈲꁧꇬꉮꄻꌠ、ꐧꋦꑘꒃꌠꌋꆀꎆꏣꀻꎆꌠꇬꉮꄻꌠꑽꃤꐆꐺꌠꌋꆀꑽꃤꐆꊿꌌꇇꇩꍈꄉ,ꐧꋦꀊꉗꃅꑘꒃꌠꄝꏦꀋꊰꇬꎷ。 ꉻꄜꇩꏤꋬꂻꉜꐨꌭꈬꇬꎷ,ꏟꈯꃅꇩꏤꌅꀨ、ꋬꂻ、ꀻꎆꈲꁧꀧꌋꃅ。
ꍏꇩꇭꍣꄈꆹꏓꂱꋌꏲꂠꌊꐧꋦꉪꏦꒆꉻꌧꑳꋈꄻ。 ꋌꐛꋌꐙꁌꒉ、ꋌꐛꋌꐙꄉꄐ、ꋌꐛꋌꐙꀧꌋꃅꌠꒆꉻꌧꑳꉪꉻꑌ,ꒉꎔꁧꎔꌠꆹꐎꁧꏂꁧꉬꌠꉪꐨꀉꇨꃅꑌꇁ,ꅐꀦꏎꏸꌠꌋꆀꋦꈭꀧꌋꃅꌠꅉꀨꇩꁈꌭꈬꇬꎷ,ꏎꏸꌠꌌꂴꄉ、ꀧꌋꃅꌠꌌꂴꄉ、ꋌꐛꋌꐙꀱꐛꅉꐛꌠꌌꂴꄉꌠꌐꏦꌭꈬꇬꎷ,ꒃꅐꀻꎆ、ꐥꐨꌣꈚ、 ꒆꉻꉾꃪꌠꌧꑳꀻꎆꈝꃀꍬꇬꎷ。 ꊋꇤꄉꅐꀦꏎꏸꉹꌠ、ꋦꈭꐮꄮꉹꌠꐧꋦꋈꄻ,ꋍꉎꀋꐥꃅꏦꇨꌠꒆꉻꋦꈭꀧꌋꃅꄹꏦꌫꄻꄉ,ꅐꀦꏎꏸꌠꌋꆀꋦꈭꀧꌋꃅꌠꈥꈉꐛꊂ、ꅐꑘꐛꉻ、ꒃꅐꃄꄟ、ꐥꐨꐤꄟꄻꐛꄉ,ꏓꂱꎁꃅꒃꅐꐥꐨꋦꈭꉾꃪꌠꀹꄻ,ꍏꉸꊿꋅꐥꍂꃅꀊꉗꃅꊛꄉꀻꎆꌠꃅꇫꑟ。
ꍏꇩꇭꍣꄈꆹꏟꈯꃅꏓꂱꁌꄝꂽꌋꆀꀉꁁꏓꂱꇇꌭꊋꃤꇬꉱꋃꃅꏲꂠ,ꑮꏣꀻꂽꇨꉪꇐꃅꈴꌬꈴ,ꊋꀥꇱꄉꏓꂱꁌꄝꂽꋈꄻ,ꍔꍞꌌꂽꁰꄻ、ꄺꀱꄉꂽꇨꇁ、ꈆꑪꇮꇐꌌꂽꌄꆣ、ꏦꃤꈴꄉꂽꏱꄻꌠꌭꈬꇬꎷ,ꄈꅇꃅꅲ、ꌉꈿꊋꄎ、ꃅꇏꉾꃪꌠꏓꂱꂽꋈꄻ, ꃶꐚꃅꏓꂱꁌꄝꂽꇿꋌꐥꃅꃅꋊꀊꏀꋎꌠꂽꂿꃆꃅꎁꍬꌬꌠꄉꀧ,ꋒꐯꋒꃅꏓꂱꁌꄝꂽꆏꇩꏤꐏꈬꁇꈬ、ꁍꇩꀧꌋꃅꌠꌋꆀꐧꋦꉪꏦꐛꏀꈴꋈꄻꅉꇬꄉꂿꄐꋊꇤꅐꇁ。
ꍏꇩꇭꍣꄈꆹꐥꊯꋯꑌꐮꇇꀨꐮꄮꌠꐧꋦꉪꏦꊿꋅꐮꃆꂮꀧꌋꃅꌋꆀꀻꎆ,ꏣꀋꑌꃅꀁꑌꊿꋅꇥꀯꂘꄻ、ꌊꌬ,ꀁꑌꊿꋅꌋꆀꀁꑌꊿꋅꃅꄷꇬꇇꀨꄉꎆꏣ、ꁱꀕꌋꆀꐧꋦꌤꑘꀻꎆꄉ,ꍏꉸꊿꋅꇭꀧꋍꂷꉬꌠꉪꐨꄻꈬ,ꊿꋅꈁꐥꌠꃅꐯꇯꋯꑌꊋꇤ、 ꐯꇯꌄꆣꀻꎆꌠꃅꇫꑟ。 ꐊꑷꃅꄈꑇꇐꌤꃅꅉꀨꌐꏦꌫꄻ,ꑇꇐꑇꌠꉹꁌꋯꑌꌊꎆꏣꐧꋦꀻꎆꌠꎁꃅꑆꊋꅐꌞꇁꎻ。
ꍏꇩꇭꍣꄈꆹꇩꏤꑭꊂꊿꋅꈁꐥꌠꇮꃅꊿ、ꂿꑘꊿ、ꌧꇐꐥꊿꃅꋯꑌꐮꐊꄉ,ꋯꁦꄈꀾꈁꐥꌠ、ꊿꄈꀾꀋꐊꂒꋦꌠ、ꊿꋅꈁꐥꌠꇬꇩꉂꊋꃤꃅꋯꑌꐮꐊꄉ,ꀒꁨꋍꁘꃅꐧꋦꉪꏦꑘꃅꊿꈁꐥꌠ、ꐧꋦꉪꏦꌤꑘꋈꄻꌠ、ꐧꋦꉪꏦꉌꃹꌠꇩꉂꊿ、 ꁍꇩꊋꏓꋍꃱꃅꌠꉌꃹꌠꌋꆀꍏꉸꊿꋅꇰꀋꃀꃅꀱꌄꆣꇁꌠꇬꊋꇤꄉꃅꌠꇩꉂꊿꑠꏓꐯꇯꄉꌠꀊꐯꇊꀊꐯꃅꇩꉂꊋꏓꋍꃱꃅꌠꄻꌊꀻꎆ、ꀉꇨꇁ。 ꀋꆏꃅꇩꏤꑭꊂꏓꂱꑣꇤꇣꋲꏱꅉꐎꃺꑌ、ꉪꂱꇣꋲꏱꅉꐎꃺꑌ、ꄠꃪꃺꑌꌋꆀ꒺ꉈꃺꑌꃅꇫꐊꄉꐮꋯꑌꌠꊋꀥꇱ。 “ꇩꏤꋍꂷ、ꄹꏦꑍꑵ”ꌬꌠꌐꏦꇬꈴꄉ,ꑣꇤ、ꉪꂱꀊꉗꃅꌄꆣꑘꒃꌠꊥꎆ,ꁍꇩꏓꋍꃱꃅꌠꌤꑘꀉꒉꋌꐘꃅꇫꑟ。
ꍏꇩꇭꍣꄈꆹꄂꋦꑴꌅꌠꉇꉻꑌꑲꏱꁈꌬꌠꌭꈬꇬꎷ,ꄮꐽꀻꎆꌠꈝ꒜ꍬꌠꌭꈬꇬꎷ,ꐯꈲꋓꊋꌠꁉꃑꄐꇐꏤꁈꌬꌠꌭꈬꇬꎷ,ꇩꈐꇩꉈꃅꇴꄉꉻꀉꒉꑍꈚꐯꇯꉜꈴꇲꈴꄉ,ꏣꀋꑌꃅꉇꉻꑌꑲꌠꀻꎆ, ꊋꇤꄉꉪꇩꏤꄺꀱꁉꃑꌠꌋꆀꐛꏀꈴꋈꄻꌠꎁꃅꈲꁧꐥꌠꇩꏹꋦꈭꅔꄻ。 ꇩꏹꌤꆿꀂꏽꇬ,ꎃꊒꌠꑗꉬꈲꁧꉜꐨꌭꈬꇬꎷ,ꉪꇩꏤꄂꋦꌠꌋꆀꑴꌅꌠꇬꀧꌋꃅꄉ,ꌅꈌꇂꇎꉪꏦꌋꆀꇨꌅꍔꍞꏭꁏ,ꋧꃅꄮꐽꌠꀧꌋꃅ,ꃰꊿꀻꎆꌠꊥꎆ,ꃰꊿꊫꂫꏓꐊꄜꏓꄻꌠꄹꇙ,ꀊꉗꃅꄮꐽ、ꐯꇯꌄꆣꌠꐮꄮꋧꃅꋈꄻꌠꄹꇙ。 ꐮꇬꌅꀨꉜꁨꌠꌋꆀꏱꁕꐛꒆꌠꁌꒉꄣꅼ、ꐯꀋꉅꀋꌎ、ꐮꈏꇓꏲꑘꇬꀋꊢꀋꂖ、ꐥꊯꐯꈲ、ꄮꐽꃅꐮꐊꌠꏥꏦꉬꐘꌠꅉ꒜ꀂꏽꄉ,ꉪꇩꏤꌋꆀꋧꃅꇩꏤꈁꐥꌠꇢꊭꇬꐮꑌꑲꐨꌌꀻꎆ。 ꀋꆏꃅꉪꇩꏤꌋꆀꈭꇍꇩꏤꈧꌠꐮꉂꐮꅉꌠꌌꀻꎆ,ꊋꀥꇱꄉꇩꏤꀻꎆꆸꇰꈧꌠꏭꋯꑌ、ꇷꃅ。 ꐯꇯꇖꐯꇯꋉꐯꇯꈲꌠꏥꏦꍬꌬ,“ꋍꁕꋍꈜ”ꋈꄻꌠꄹꎆ。 ꄂꋦꑴꌅ、ꐮꐥꊯꌐ、ꐮꁌꒉ、ꐮꈏꇓꏲꑘꇬꀋꊢꀋꂖꌠꏥꏦꇬꈴꄉ,ꉪꄈꌋꆀꇩꏤꈁꐥꌠꇬꇭꍣꄈ、ꀉꁁꍔꄈꐮꑌꑲꃆꂮꌌꀻꎆ。
ꍏꇩꇭꍣꄈꆹꇩꏤꑭꊂꊿꋅꈁꐥꌠꏓꂱꃅꋌꏲꂠꌊꄉ“ꋍꉐꈎꑍꂷ”ꌠꉈꈽꁻꌐꃅꇫꑟ、ꍏꉸꊿꋅꇰꀋꃀꃅꀱꌄꆣꇁꌠꍏꇩꉪꐨꃅꇫꑟꂿꄷꇬ,ꀋꎪꃅꄈꅿꅉꀨꈛꏦꇬꆼꒆꄉ,ꄈꆏꄈꏲ、ꐊꑷꃅꏦꇨꃅꄈꏲꌠꌭꈬꇬꎷ,ꄈꌅꈌꌬꊋꃤꋈꄻꌠ、 ꂴꅑꐨꌋꆀꌃꎴꐨꋈꄻꌠꊋꀥꇱ,ꄺꀱꏀꀺꉌꊈꌌꐊꑷꃅꄈꋈꄻꋉꃆꇰꀋ꒜ꀊꏀꌠꄹꎆ,ꄈꅿꍔꍞꋈꄻꌠꌌꏓꏲꌠꃅꄉ,ꐊꑷꃅꄈꅿꍔꍞꋈꄻ、ꉪꇐꋈꄻ、ꎀꍹꋈꄻ、ꃅꇏꋈꄻ、ꍬꏦꋈꄻꌠꄹꎆ,ꄹꏦꋈꄻꌠꈐꏭꃅꈴꌬꈴꌐ,ꃹꅼꃅꍹꈔꌠꏭꁏꉈꈽꌠꄹꎆ, ꐊꑷꃅꄈꅿꋈꄻꈆꑪꈴꌠꑟꐨꉀꐕ。 ꋍꉻꎁꃅꄈꄻ、ꏓꂱꎁꃅꌅꈌꌬꌠꌭꈬꇬꎷ,ꄈꅿꉾꃪꌠꋊꃅꐥꌠꃅꇏꌋꆀꃄꄟꑽꄟꍔꆙ,ꀋꆏꃅꄈꅿꏲꂠꄐꐨꌋꆀꌅꈌꌬꇮꐨꉀꐕ,ꍹꄙꐈꄵꌠꌋꆀꆽꀠꇁꉆꌠꇬꄘꑣꊋꃤꉀꐕ,ꀋꆏꃅꑴꑳꁦꎴ、ꑴꑲꐛꒆ、ꑴꑳꏀꆦ、ꑴꑳꉀꐕꌠꊋꃤꄻꀉꇨ, ꀋꆏꃅꄈꅿꊿꏠꅉ꒜ꌌꀉꇨꌠꌋꆀꄈꅿꉹꁌꅉ꒜ꌌꍔꐯꌠꃅ,ꀋꆏꃅꄈꀹꄻꊋꃤ、ꏓꋧꊋꃤ、ꌉꈿꊋꃤꉀꐕ,ꌶꄻꉹꌠ、ꁧꃤꃅꉹꌠ、ꏀꀺꉹꌠꂷꇻꌦꉪꏦꏱꌅꄈꋈꄻꄉ,ꉪꄈꁳꈍꄮꑌꃅꋊꂲꆽꉆꇬꎷꄉ, ꇩꏤꑭꊂꏓꂱꋌꏲꂠꌊꍏꇩꐛꐨꐧꋦꉪꏦꈝ꒜ꇬꍬꄉꀋꆏꃅꀒꁨꆹꌠꇬꈯꄜꀉꇨꑠꂷꐛꇁ。 ꄈꋈꄻꇬꀋꎪꃅꄚꊁꅉꀨꇖꐨꉬꐘꌠꃅꇫꑟꌶ:
ꋍꆏ,ꄈꅿꅉꀨꈛꏦꌭꈬꇬꎷ。 ꄈꑭꊂꃅꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠ、ꈆꑪꃅꀻꎆꌠꉜꐨ、ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌋꆀꄈꅿꅉꀨꈛꏦꌌꄉꉪꇐꏓꋍꃱꃅ,ꃅꐨꏓꋍꃱꃅ,ꄷꀋꁧꋍꍈꑌꀋꇙꀋꑐꃅꃅꅷꁧꇬꎷ。 ꀋꎪꃅꄺꀱꁉꃑꌠꌋꆀꅉꀨꏥꏦꇖꐘꌠꏓꋍꃱꃅꎼꇁ,ꐊꑷꃅꄈꅿꅉꀨꈛꏦꌫꄻ,“ꃼ”ꏯꌋꆀꑳꏯꎎꌠꑽꃤꈁꉬꌠꏭꁏ,ꑳꏯꎎꌠꋓꉪꁨꄉ,ꄚꀋꉬꀋꉆꌠꆏ“ꃼ”ꏯꎎꌠꄴꏮ。 ꊋꀥꇱꄉꈁꐥꊐꌠꇬꏲꌋꁥꌠꂘꄻ,ꄈꌋꆀꏓꂱꇬꈇꌠꇥꀯꉾꃪꌠꉘꉚꌊꄻ,ꐧꋦꉪꏦꌤꑘꎃꉆꊿꄙꇁꃪꃅꂘꄻ、ꁰꍋꎼꇁꄉ,ꎀꍹꇬꈴꄉꄈꅿꅉꀨꌧꇗ、ꅉꀨꈛꏦ、ꅉꀨꄐꇐꄐꁈꌫꄻꇫꑟꌠꇬꏦꀧ。
ꑍꆏ,ꉪꇐꁌꄝ,ꑞꉬꌠꑞꃅꄉ,ꃅꋊꐊꄉꁨꆹ,ꇯꍝꌠꎹꀋꎪꌠꃅꌠꌭꈬꇬꎷ。 ꄈꅿꉪꇐꈛꏦꆹꑞꑌꐛꐨꇬꈴꄉ,ꌧꇗꌌꐛꐨꇬꑌꑲ,ꑞꉬꌠꑞꃅꄉ,ꃄꄻꅉꇬꄉꇗꊈꎖꉚ、ꇗꊈꌌꀻꎆ。 ꄈꑭꊂꃅꀋꎪꃅꉪꇐꈛꏦꋋꏢꌭꈬꇬꎷ,ꏣꀋꑌꃅꎹꎥ,ꉌꂵꀉꒉꃅꎖꉚ,ꄹꀖꏀꀺ,ꁧꀿꐨꐥꃅꌤꃅ,ꀋꆏꃅꐛꃆꐛꂮꀊꏀꌠꎥꃪ,ꎖꋪꀊꏀꌠꏓꈹ,ꌤꃆꀊꏀꌠꀞꄻ,ꃄꄻꅉꇬꄉꂷꇻꌦꉪꏦꄻꀉꑌ、ꄻꀻꎆ,ꂷꇻꌦꉪꏦꍏꇩꃤꐛꈴꌠꄹꎆ。
ꌕꆏ,ꋍ꒜ꁨꀋꑌꉌꂵꄅꀋꑌꃅꏓꂱꎁꃅꃅꌠꌭꈬꇬꎷ。 ꄈꆹꇮꃅꊿꏠꌠꌋꆀꏓꂱꉹꁌꋍꏅꌠꈲꁧꉇꄉꈭꐨꆏ,ꊨꏦꈲꁧꐋꀋꌡꑠꀋꐥ。 ꄈꆹꈍꄮꑌꉹꁌꈲꁧꌌꀨꇬꄉꇬꎷ,ꉹꁌꌋꆀꎬꑌꐯꇯꎭꌑꑌꐯꇯꌒ,ꎔꃅꉹꁌꌋꆀꋍꉎꀋꐥꃅꐮꑌꑲꇬꎷ,ꌅꈌꉹꁌꎁꃅꌬ、ꉌꂵꉹꁌꎁꃅꉪ、ꈲꏣꉹꁌꎁꃅꏂꌠꌭꈬꇬꎷ,ꄈꑼꑞꂷꉬꂿꉹꁌꌋꆀꐮꐞꀋꉆ,ꉹꁌꄩꍅꆹꀋꉆꌠꉬ。 ꉪꄈꅿꍔꍞꂱꎆꅑꐨꀉꒉꇊꀉꒉꌠꆏꑖꑟꃅꉹꁌꌋꆀꐮꑌꑲꌠꉬ,ꄈꌅꈌꌬꊂꀉꒉꇊꀉꒉꃅꆽꀠꇁꉆꌠꆏꉹꁌꇬꐞꁧꌠꉬ。 ꄈꃅꇏꌤꃆ、ꄈꌋꆀꏓꂱꉹꁌꐮꑌꑲꌤꃆꆹꄈꋦꅀꈔꂯꌠꌤꃆꉬ。 ꄈꆹꊨꏦꌤꃅꅉꇬꄉꉹꁌꈛꏦꌫꄻ,ꑞꑌꉹꁌꎁꃅꃅ,ꑞꑌꉹꁌꉘꇉ,ꉹꁌꈬꇬꄉꇁ,ꀱꉹꁌꈬꇬꒉ,ꄈꉪꐨꎃꊒꌠꀱꌊꉹꁌꑴꐚꃅꇫꃅꌠꐛꇁꎻ。
ꇖꆏ,ꋯꁦꏓꁨꄹꏦꌬꌠꌭꈬꇬꎷ。 ꋯꁦꏓꁨꄹꏦꆹꋯꁦꅉꃀꀂꏽꄉꏓꁨꌠꌋꆀꏓꁨꄐꇺꌠꇂꃴꄉꋯꁦꌠꏓꐯꇯꄉꌠꉬ。 ꋋꆹꄈꅿꊇꅉꎀꍹꏥꏦꑌꉬ,ꉈꑴꉹꁌꈛꏦꌌꄈꐥꐨꇬꄉꌬꌠꑌꉬ。 ꀋꎪꃅꋒꐯꋒꃅꄈꈏꇓꋯꁦꍔꆙꄉ,ꄈꑼꀨꄜꉆꈉꁌꒉ,ꄈꑼꋯꁦꌅꈌꏦꀧ,ꄈꎀꍹꈁꐥꊐꌠꌋꆀꄈꑼꋍꏅꌠꏣꀋꑌꐨꀹꄻꐨꋊꇤꅐꇁ。 ꀋꎪꃅꏓꁨꌠꎃꊒꃅꌬꄉ,ꏟꈯꃅꍔꍞꉪꐨ、ꇴꉻꉪꐨ、ꈯꄜꉪꐨ、ꉜꊱꉪꐨꑌꄉ,ꏟꈯꃅꐋꀨꑮꏣꀻꈯꄜꃅꄉꌠꄈꍏꑷꋦꒉꐨꌋꆀꏓꋧꋍꃱꃅꏲꂠꌠꀧꌋꃅ,ꄈꑭꊂꋯꑌꋍꃱꃅꌠꌋꆀꃅꐨꋍꏢꃅꐙꌠꏦꀧ,ꄈꐰꏤꄉꌠꐳꃅꊌꐨꐥꃅꌫꄻꎻꌠꏦꀧ。 ꄈꈏꇓꍔꍞꐥꐨꊋꀥꇱꌋꆀꋊꍬ,ꄈꈏꇓꍔꍞꐥꐨꃤꍔꍞꐨ、ꃅꋊꐨ、ꏥꏦꐨ、ꌉꈿꐨꄻꀉꇨꇁ,ꏣꀋꑌꉾꃪꌠꄈꈏꇓꍔꍞꁱꀕꀻꎆ,ꃅꇏꐙꎴꎃꊒꌠꍔꍞꐛꄟꉾꃪꌠꄺꂡ。 ꄈꆹꊨꏦꍔꍞꐥꐨꇬꄉꎃꊒꃅꀠꂘꌠꌋꆀꊨꏦꀱꊨꏦꀠꂘꌠꃅ,ꏥꏦꀂꏽꆏꉪꇐꉈꈽꌠꃅ,ꇗꊈꌭꈬ,ꑽꐪꄺꀱ。 ꊋꇤꄉꏓꁨꑌꐥꋯꁦꑌꐥ,ꍬꏦꑌꐥꄿꐨꑌꐥ,ꉌꊋꏓꋍꃱꃅꌠꑌꐥꉈꑴꊨꏦꉌꃅꑓꌒꉌꐡꍄꑐꌠꍔꍞꐛꐪꑌꐥꇁꎻ。
ꉬꆏ,ꏦꇨꃅꄈꏲꄈꄻꌠꌭꈬꇬꎷ。 ꐊꑷꃅꏦꇨꃅꄈꏲꄈꄻꌠꆏꐥꍂꃅꈝꂾꇬꐺꇬꎷꌠꉬ。 ꃅꒊꃅꇁꀊꏀꌠꇂꃴ,ꄈꂾꎍꌠꌅꈌꌌꎟꎖꌠ、ꄺꀱꁉꃑꎟꎖꌠ、ꃷꎏꎆꏣꎟꎖꌠ、ꉇꉻꋦꈭꎟꎖꌠꆏꀊꉗꌠ、ꌼꇪꌠ、ꃛꊸꌠꉬ,ꉌꊈꐵꑷꇁꉆꌠ、ꄐꐨꀋꇎꇁꉆꌠ、ꉹꁌꐞꁧꇁꉆꌠ、ꏣꑌꍹꈔꇁꉆꌠꆏꀊꅰꃅꃛꊸꃅꄈꑭꊂꂾꎍꀐ。 ꏦꇨꌠꎕꏦ、ꏦꇨꌠꃄꁈꌌꄈꏲꄈꄻꌠꈴꎁꇬꌋꆀꋍꑞꋍꁁꏯꌠꇬꌬꈴꌶ。 ꇗꏦꈴꄉꄈꏲ、ꈏꇷꉇꇷꃅꏱꄻꌠꌭꈬꇬꎷ,ꍬꏦꄻꂴꄉꌠꌭꈬꇬꎷ,ꎀꍹꐨꍬꏦꐨꊋꀥꇱ,ꄈꅿꍬꏦꂲꆽꆏꊿꃅꐥꊯꌐ。 ꄈꏲꄈꄻꀨꄜꆼꎍꐨꌋꆀꍞꊟꆼꎍꐨꄻꀉꇨꇁ,ꊋꀥꇱꄉꄈꏲꂠꌤꏲꅉꌋꆀꄈꑼꏲꌋꇥꀯꈜꀕꇈꏲꌋꇥꀯꀋꉬꀋꉆꌠꏭꍞꊟ,ꀋꆏꃅꄈꈏꇓꍞꊟꉻꑫꄻꐛꒆ。 ꃹꅼꃅꄈꃅꇏꐙꎴꋈꄻꌠꌋꆀꍹꈔꌠꏭꁏꉈꈽꌠꄹꎆ,ꋍꍈꑋꄝꀋꏆꌠꊜꄟꌌꍹꈔꌠꅓꀞ,ꍹꈔꀋꀬ、ꍹꈔꀋꉆ、ꍹꈔꀋꏾꌠꉺꏦꇿꋌꐥꌠꏓꄻ。
ꍏꇩꇭꍣꄈꏲꂠꄉꌠꆏꍏꇩꐛꐨꐧꋦꉪꏦꊇꅉꇊꊇꅉꌠꐛꄟꉬ,ꍏꇩꐛꐨꐧꋦꉪꏦꄹꏦꂱꎆꅑꐨꀉꒉꇊꀉꒉꌠꉬ。 ꄈꍔꂽꂱꌷ,ꃅꇕꄹꊂꃅ,ꄈꆹꈁꐥꌠꃅꏲꂠꌠꉬ。 ꄈꆏꄺꀱꁉꃑꌠꌋꆀꐧꋦꉪꏦꐛꏀꈴꋈꄻꌠꈉꐨꇬꄉꄐꄉ,ꈆꑪꃅꌅꈌꌌ、ꋯꁦꃅꌅꈌꌌ、ꏦꃤꈴꄉꌅꈌꌌꌠꌭꈬꇬꎷ,ꄈꏲꂠꄉꌠꊋꀥꇱ、ꄻꐛꒆ。 ꄈꆏꀋꎪꃅꃅꇴꄉꉻꀉꒉꌠꏓꏲ、ꋍꑞꋍꁁꏯꃅꋮꄮꌠꏥꏦꇬꈴꄉ,ꋍꑞꋍꑵꎀꍹꂱꑱꋋꊐꌠꇬꏲꂠꈯꄜꂿꄐꋊꇤꅐꇁꌶ。 ꄈꆹꀋꎪꃅꊋꏓꊋꋧꄉꎆꏣꋈꄻꌠꏲꂠ,ꋍꑞꋍꁁꏯꊋꃤꊥꇬ、ꋮꄮꐯꇯ,ꉌꂵꋍꂷꊋꋍꏢꃅ,ꎆꏣꋈꄻꌠꇬꆼꒆꄉꌤꃅ,ꎆꏣꐧꋦꐊꑷꃅꀻꎆꌠꇬꊥꎆ。 ꄈꆏꀋꎪꃅꋯꁦꃅꈆꑪꃅꏤꇽꌠꃅ,ꎃꊒꌠꈛꏦ、ꌐꏦ、ꏱꁈꏤꄻ、ꃄꌬ,ꄈꅿꎀꍹꌤꃅꌠꌋꆀꄜꉺ꒿ꂘꌤꃅꋒ,ꄈꑼꈁꐥꌠꂴꅑꌶꀠꂿꄐꋊꇤꅐꇁ。 ꄈꆹꀋꎪꃅꏦ꒜ꌋꆀꏦꃤꏤꄉꌠꈍꈐꇬꄉꃅ。 ꄈꆹꀋꎪꃅꇩꏤꏦꃤꏤꄻ、ꏦꌬ、ꏲꑘ、ꍞꊟꍤꄻꌤꏲꅉ,ꎆꏣ、ꁱꀕꎀꍹꇬꌋꆀꏓꂱꏓꉻꇬꏣꀋꑌꑴꇙꃅ、ꄂꋦꆽꎍꃅ、ꋮꄮꋍꏢꃅꌤꃅꌠꇬꏦꀧ。 ꄈꆹꀋꎪꃅꊋꀥꇱꄉꇪꉼ、ꇷꁨꉪꏦꌠꏀꄨ、ꌋꅪꐊꏑꉼꉹꁌꎀꍹꑠꏲꂠꄉ,ꋀꊇꁳꍔꍞꐨ、ꂴꅑꐨ、ꉹꁌꐨꄝꏦꀋꊰꌋꆀꀉꇨꇁꎻ,ꇎꋒꃅꂿꄐꋊꇤꅐꇁ。 ꄈꆹꀋꎪꃅꃅꒊꃅꇁꀻꎆꌠꌋꆀꐛꃆꐛꂮꐛꐈꌠꇬꄉꄐ,ꏲꂠꏦꉻꄻꐛꒆ,ꏲꄟꂠꄟꄺꀱ,ꌅꈌꌬꌠꊋꃤꀉꇨꇁ。 ꇭꍣꄈꑼꆹꀋꎪꃅꄈꉈꉹꁌꌋꆀꑖꑟꃅꐮꐊꄉꃅ,ꐯꇯꍏꇩꐛꐨꐧꋦꉪꏦꋈꄻꌠꎁꃅꊋꇤꌶ。
ꋍ꒾ꌠ ꄈ ꑼ
ꋍꏢꌠ ꈎꄜꊰꉆꈓꇱꐛꀐꌠꍏꇩꇮꃅꊿ、ꂿꑘꊿ、ꂽꑼ、ꌧꇐꐥꊿꌋꆀꀉꁁꐧꋦꏠꊐꇬꊿꂴꅑꌠ,ꄈꅿꐱꀨꌋꆀꄈꏦꉌꃹ,ꄈꎀꍹꂷꇬꐊꏾꄷꀋꁧꄚꄉꏣꀋꑌꃅꌤꃅ、ꄈꏤꐪꃄꌬꌠꌋꆀꏤꈉꇬꈴꄉꄈꎆꏮꌠꆏ,ꍏꇩꇭꍣꄈꇬꃹꌠꇖꂟꉆ。
ꑍꏢꌠ ꍏꇩꇭꍣꄈꄈꑼꆹꍏꇩꇮꃅꊿꏠꌠꇬꇷꁨꉪꏦꉪꇐꐥꌠꂴꅑꌠꂽꑼꉬ。
ꍏꇩꇭꍣꄈꄈꑼꆹꀋꎪꃅꋍ꒜ꁨꀋꑌꉌꂵꄅꀋꑌꃅꏓꂱꁧꎁꃅꃅ,ꊨꏦꑞꁮꑋꇬꑌꀋꑴꃅ,ꐥꍂꃅꇷꁨꉪꏦꃅꇫꑟꌠꎁꃅꑅꅐꊋꆜꌠꉬ。
ꍏꇩꇭꍣꄈꄈꑼꆹꐥꍂꃅꑘꃅꏓꂱꇬꎃꐚꂷꉬꇬꎷ。 ꏦꃤꌋꆀꏱꁈꏤꄻꄉꌠꈐꏭꊨꏦꈲꁧꌋꆀꌤꃅꌅꅍꉇꄉꈭꐨꆏ,ꇭꍣꄈꑼꈁꐥꌠꃅꊨꏦꈲꏣꌋꆀꌅꈌꐋꀋꌡꑠꈍꃅꐙꌠꑌꏂꇫꇖꂟꀋꉆ。
ꌕꏢꌠ ꄈꑼꆹꀋꎪꃅꄚꊁꋭꑘꋋꈨꃅꌶ:
(ꋍ)ꎔꎗꃅꂷꇻꌦꆺꆀꉪꏦ、꒜꒾ꄏꉪꇐ、ꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠ、ꈆꑪꃅꀻꎆꌠꉜꐨ、ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌶꄻ,ꄈꅿꈛꏦ、ꌐꏦ、ꏱꁈꌋꆀꏤꐪꌷ,ꄈꅿꅉꀨꌧꇐꌷ,ꈆꑪ、ꁱꀕ、ꏦꃤꌋꆀꃅꑘꌧꇐꌷ, ꊋꇤꄉꏓꂱꁧꎁꃅꀕꌠꄐꊋꉀꐕ。
(ꑍ)ꄈꅿꅉꀨꈛꏦꌋꆀꋍꑞꋍꑵꌐꏦ、ꏱꁈꌫꄻ,ꂴꅑꄉꄺꀱꁉꃑꌠꌋꆀꐧꋦꉪꏦꐛꏀꈴꋈꄻꌠꃅꈽ,ꉹꁌꏃꄉꎆꏣꀻꎆꌠꌋꆀꐧꋦꀻꎆꌠꎁꃅꎬꅧꃅꈒꇤꊋꇤ,ꒃꅐ、ꌤꃅ、ꌶꄻꌋꆀꐧꋦꐥꐨꇬꂴꅑꌶꀠꂿꄐꐥꌶ。
(ꌕ)ꏟꈯꃅꄈꌋꆀꏓꂱꈲꏣꌌꑞꑌꏭꀋꋌꃅꄉꇬꎷ,ꊨꏦꈲꏣꆏꄈꌋꆀꏓꂱꈲꏣꅇꃅ,ꎬꅉꂴꐊ,ꌑꅉꊁꐊ,ꊨꏦꃤꍅꄉꋍꏅꁧꎁꃅ,ꑆꊋꀉꑌꃅꅐꌞꌶ。
(ꇖ)ꑴꐚꃅꄈꍬꏦꍬ,ꂴꆏꄈꅿꍔꍞꍬꏦꌋꆀꍔꍞꇗꏦꉬ,ꂴꅑꄉꇩꏤꏦꃤꏦꇗꇬꈴꄉꃅ,ꏦꇨꃅꄈꌋꆀꇩꏤꂁꇐꂁꈬꃅꄉ,ꄈꏤꐪꃄꌬ,ꎀꍹꇬꅇꃅꄉꑞꃅꄷꆏꑞꃅ,ꏣꀋꑌꃅꄈꂿꃆꃅꇫꑟ。
(ꉬ)ꄈꋯꑌꌠꌋꆀꋍꃱꃅꌠꀧꌋꃅ,ꄈꏭꀋꎪꀋꑴ,ꉉꌠꃅꌠꐮꐊ,ꏟꈯꃅꁥꁸꎀꍹꈁꐥꌠꌋꆀꀁꃶꌺꃅꐮꉻꏑꐺꌠꏭꁏ,ꑓꂿꆏꏧꑸꈞꆈꆏꊂꀠꑍꈌꅑꌠꌋꆀꈞꆈꄉꊾꏂꇫꌠꈁꐥꌠꏭꁏ。
(ꃘ)ꃶꐚꃅꀠꂘꌠꌋꆀꊨꏦꀱꊨꏦꀠꂘꌠꍔꆙ,ꄈꅿꏥꏦꇬꆼꁏꌠꉉꌠꃅꌠꌋꆀꌤꃅꐛꀋꒆꌠ、ꃅꑽꌠꀖꍰꌋꆀꋊꍬꀬ,ꏟꈯꃅꏣꑌꍹꈔꌠꏭꉈꈽ。
(ꏃ)ꑖꑟꃅꉹꁌꏭꑌꑲ,ꄈꉪꐨꌌꉹꁌꏭꄜꉺ,ꌤꆿꊝꇬꆏꉹꁌꏭꇕꄟ,ꉹꁌꉜꐨꌋꆀꇖꐨꆏꐳꃅꄜꌊꄈꏭꇰ,ꉹꁌꈲꏣꊌꋭꌠꀧꌋꃅ。
(ꉆ)ꐧꋦꉪꏦꃅꇏꀊꏀꌠꍔꆙ,ꐧꋦꉪꏦꈯꄜꁌꐨꉜꐨꌋꆀꐧꋦꉪꏦꂄꄸꉜꐨꂴꅑꄉꃄꌬ,ꇷꁨꉪꏦꑌꇐꄖꄑ,ꍏꉸꊿꋅꋊꃅꐥꌠꑌꇐꉾꃪꌠꍔꆙ,ꇩꏤꌋꆀꏓꂱꈲꏣꀧꌋꃅꂯꐛꅹ,ꊋꋠꐨꌋꆀꃨꆰꐨꐥꇬꏸꀋꏦꃅꐂꂴꉆꄉ,ꌳꈄꃅꉈꈽ,ꀑꇬꆺꑌꀋꏦ。
ꇖꏢꌠ ꄈꑼꆏꌅꈌꄚꊁꑠꈨꐥ:
(ꋍ)ꄈꃤꃆꂮꐥꌠ꒜ꈿꈽ,ꄈꃆꂮꐥꌠꁱꐘꉜ,ꄈꁳ꒿ꂘ、ꁱꂘꎻ。
(ꑍ)ꄈ꒜ꈿꅉꇬꌋꆀꄈꄯꒉꇬꄉ,ꄈꏱꁈꌤꃆꃆꂮꎥꇖꈽ。
(ꌕ)ꄈꌤꃅꀂꏽꇬꉜꐨꌋꆀꄕꊪꅇꉉꎼꇁ。
(ꇖ)ꄈ꒜ꈿꅉꇬꄉꁢꊧꐥꃅꄈꎀꍹꌋꆀꄈꑼꑞꂷꏭꑌꀠꂘꉆ,ꄈꏭꆽꎍꐨꐥꃅꄈꎀꍹꌋꆀꄈꑼꑞꂷꉬꂿꏦꃤꍬꏦꁎꐆꌠꌤꃶꐚꌠꌌꀖꍰ、ꀖꇰꉆ,ꄈꑼꏦꃤꍬꏦꁎꐆꌠꌌꑽꃤꅓꁵꄷꇖꉆ,ꇥꀯꄉꅍꃅꀋꄐꌠꌌꄉꅍꇔꅀꄉꅍꆦꄷꇖꉆ。
(ꉬ)ꊨꇽꌅꈌ、ꌊꄻꌅꈌꐥ,ꌠꇫꌊꄻꌅꈌꐥ。
(ꃘ)ꄈꎀꍹꇬꄈꑼꌌꄈꍬꏦꉜꄉꑽꃤꅓꁵꅀꌌꍜꇠꌠꐮꇖꏤꄻꄮꇬ,ꋍꊨꏦꄚꐊꄉ꒜ꈿꈽꌠꌋꆀꉉꇔꌠꌅꈌꐥ,ꀉꁁꄈꑼꈧꌠꑌꋍꎁꃅꅇꊪꌬꌠꌋꆀꉉꀥꌠꃅꉆ。
(ꏃ)ꄈꅿꏤꐪꌋꆀꏱꁈꇬꉜꐨꐯꀋꌡꌠꐥꑲꆏ,ꀋꎪꃅꃄꌬꈭꐨꑲꆀ,ꀀꉜꐨꊏꄉꄷꉉꀽꉆ,ꄷꀋꁧꊨꏦꉜꐨꌌꄈꅿꎀꍹꉎꊐꌠꅑꅸꍏꑷꇬꑟꌠꏭꉉꄜꉆ。
(ꉆ)ꄈꅿꎀꍹꉎꊐꌠꅑꅸꍏꑷꇬꑟꌠꏭꑗꇖ、ꇖꂟꌋꆀꅇꎹꉆ,ꄷꀋꁧꎀꍹꄚꃆꂮꐥꈧꌠꏭꆽꎍꃅꄉꅇꏮꄷꇖꉆ。
ꄈꎀꍹꑞꊐꉬꄿꂿꅑꅸꍏꑷꇬꑟꌠꐯꇯꄈꑼꃤꄚꂴꉉꌠꌅꈌꋋꈨꇑꀋꉆ。
ꉬꏢꌠ ꄈꑼꊩꃹꇬ,ꀋꎪꃅꍔꍞꎕꏦꄻꀨꇬꄉ,ꄈꍝꀯꇬꈴꄉ,ꋍꂷꋍꂷꃅꃹꌠꏥꏦꌭꈬꌶ。
ꊿꄈꇬꃹꂿꄷꇖꂟꌠꆏ,ꄈꇬꃹꉌꃹꄯꒉꁱꌶ,ꄈꑼꑌꐚꑍꂷꁳꇢꈴꊿꄻꎻ,ꍝꀯ꒜ꀉꒉꈿꅉꉌꃹꈴꇈꉎꊐꌠꄈꎀꍹꈌꁧꇇꈴꌶ,ꄷꀋꁧꄐꄻꄮꐥꄉꍤꎖꈭꐨꑲꆀ,ꄈꑼꑌꐚꌠꐛꉆ。
ꇢꈴꊿꆏꎔꃅꇖꂟꊿꂶꌠꉪꇐ、ꑌꇐ、ꐥꐨꌋꆀꌤꃅꐨꅱꄻꌶ,ꋍꏭꄈꅿꐱꀨꌋꆀꄈꏦꉉꀽꌶ,ꄈꑼꇎꏦ、ꋭꑘꌋꆀꌅꈌꉉꀽꇈ,ꆽꎍꃅꄈꎀꍹꏭꄛꇰꌶ。
ꄈꍜꀯꊈꑼꉼꆏꊿꄈꇬꃹꂿꄷꇖꂟꌠꏭ,ꋓꉪꁨꄉꄈꈏꉈꉹꁌꄚꃆꂮꐥꌠꄷꉜꐨꅲꇈ,ꌌꏦꇨꃅꍤꎖꄉ,ꉜꎼꇁꇬꇎꏦꇬꑟꃅꐙꈭꐨꑲꆀꄜꌊꍝꀯ꒜ꀉꒉꈿꅉꄉꇕꄟ。
ꉎꊐꌠꄈꎀꍹꆏꊿꄈꇬꃹꂿꄷꇖꂟꂶꌠꄈꇬꃹꃆꂮꈌꁧꂾ,ꊿꁆꌊꋍꏭꅇꉉꄉ,ꀒꁨꋍꁘꃅꅱꄻ,ꄷꀋꁧꇫꇇꀨꄉꄈꇬꌧꐨꐕꀊꂥꎻ。
ꐛꐨꐋꀋꌡꃅꐙꄮꇬꆏ,ꄈꅿꍏꑷꌋꆀꌜ、ꊨꏦꏱꅉꐎ、ꎂꏲꏃꊈꑼꉼꆏꈛꎂꃅꄈꑼꊪꇬꇯꉆ。
ꃘꏢꌠ ꄐꄻꄈꑼꆏꀋꎪꃅꄈꁈꁧꏭꉜꄉꄈꇬꃹꏤꅇꄜ。 ꏤꅇꆏ:ꉢꉌꊨꈬꇱꃅꍏꇩꇭꍣꄈꇬꃹꏾ,ꄈꐱꀨꉌꃹ,ꄈꏦꍬꄉꃅ,ꄈꑼꋭꑘꃅꇫꑟ,ꄈꏤꄻꄉꌠꃄꌬ,ꏟꈯꃅꄈꍬꏦꍬ,ꄈꂁꇐꂁꈬꃅꄉ,ꄈꏭꀋꎪꀋꑴ,ꏣꀋꑌꃅꌤꃅ,ꐥꍂꃅꇷꁨꉪꏦꎁꃅꈏꇤꊋꇤ,ꈍꄮꇬꑌꄈꌋꆀꏓꂱꎁꃅꑞꈔꑌꀋꑴꂿꄷꄐꄉ,ꐥꍂꃅꄈꏭꀋꁏ。
ꏃꏢꌠ ꄐꄻꄈꑼꄐꄻꄮꆹꋍꈓ。 ꄈꎀꍹꆏꄐꄻꄈꑼꏭꎔꃅ꒿ꂘ、ꍤꎖꌶ。
ꄐꄻꄈꑼꋭꑘꆏꄈꑼꑌꐚꌠꌋꆀꐯꌟ。 ꄐꄻꄈꑼꌅꈌꆏ,ꊨꇽꌅꈌ、ꌟꌋꌅꈌꌋꆀꌠꁳꌋꎻꌠꌅꈌꀋꐥꈭꐨ,ꄈꑼꑌꐚꌠꌋꆀꐯꌟ。
ꄐꄻꄈꑼꄐꄻꄮꇎꄮꑟꇬꆏ,ꄈꍝꀯꆏꋋꇅꃅꊿꋋꂷꌌꄈꑼꑌꐚꂷꄻꉆꅀꄻꀋꉆꌠꇕꄟꄡꑟ。 ꎔꃅꄈꑼꋭꑘꍬꌬ,ꄈꑼꇎꏦꇫꑟꀐꌠꆏ,ꏤꈉꈴꄉꏮꌊꄈꑼꑌꐚꌠꐛꄡꑟ; ꐪꊛꄉꍤꎖ、꒿ꂘꄻꅐꑴꌦꌠꆏ,ꄐꄻꄮꈉꄯꊁꄉꉆ,ꄚꃅꐎꋍꈓꉎꐂꀋꉆ; ꄈꑼꋭꑘꀋꃅ,ꄈꑼꇎꏦꇬꀋꑟꌠꆏ,ꄐꄻꄈꑼꂓꂶꌠꇔꇧꎭꄡꑟ。 ꄐꄻꄈꑼꏮꌊꑌꐚꄈꑼꐛ,ꅀꄐꄻꄮꈉꄯꊁꄉ,ꅀꄐꄻꄈꑼꂓꂶꌠꇔꇧꎭꌠꆏ,ꐯꇯꌌꍝꀯ꒜ꀉꒉꈿꄉꇕꄟꉌꃹꈴꎻꌋꆀꌌꉎꊐꌠꄈꎀꍹꁳꈌꁧꎻꄡꑟ。
ꄐꄻꄈꑼꄐꄻꄮꆏ,ꍝꀯ꒜ꀉꒉꈿꉌꃹꈴꄉꌌꄐꄻꄈꑼꃅꄹꉇꄑꌗ。 ꄈꑼꄈꇬꃹꃅꈎꆏ,ꄐꄻꄮꈉꇎꇈꏮꌊꑌꐚꄈꑼꄻꄹꉇꄑꌗ。
ꉆꏢꌠ ꄈꑼꋍꂷꋑꀋꋒ,ꄉꅍꌅꈌꐭꒉꀋꍣꃅ,ꈁꉬꃅꄻꄈꍝꀯꂷ、ꑦꊤꂷꅀꀉꁁꋲꏤꎀꍹꑠꇬꇱꄉ,ꄈꎀꍹꐥꐨꐊꈽ,ꄈꈏꉈꉹꁌꇫꍞꊟꌠꅲꌶ。 ꄈꑼꏲꌋꇥꀯꈧꌠꑌꄡꇗꀋꎪꃅꄈꊈ、ꄈꊤꋯꁦꐥꐨ꒜ꈿꈽꌶ。 ꄈꎀꍹꐥꐨꀋꐊ、ꄈꈏꉈꉹꁌꇫꍞꊟꀋꎽꌠꄈꑼꐋꀋꌡꑠꐥꀋꉆ。
ꈬꏢꌠ ꄈꑼꆏꄈꇬꄉꎞꁧꌠꊨꏦꌅꐨꐥ。 ꄈꑼꄈꇬꄉꎞꁧꂿꄷꇖꂟꌠꆏ,ꍝꀯ꒜ꀉꒉꈿꄉꇕꄟꈭꐨꑲꆀꂓꋊꌠꄛꇰ,ꄷꀋꁧꄜꌊꉎꊐꌠꄈꎀꍹꅺꇰꄉꄡꑟ。
ꄈꑼꇝꂱꉪꇐꑌꄸ,ꄈꑼꋭꑘꀋꃅ,ꄈꑼꇎꏦꇬꀋꑟꌠꆏ,ꄈꍝꀯꇬꏭ꒿ꂘ,ꏤꈉꄻꇬꁳꄉꄺꀱꎻꄡꑟ; ꌌ꒿ꂘꈭꐨꄡꇗꄻꀋꀱꌠꆏ,ꎞꄈꉈꅐꁧꄷꇬꉇꄡꑟ。 ꄈꑼꏭꄈꇬꄉꎞꁧꄷꉉꌠꆏ,ꌌꍝꀯ꒜ꀉꒉꈿꅉꄉꇕꄟꏤꄻ,ꄷꀋꁧꄜꌊꉎꊐꌠꄈꎀꍹꇰꄉꈌꁧꎻꄡꑟ。 ꀋꄸꄷꄈꑼꏭꄈꇬꄉꎞꁧꄷꇬꉇꇈꄡꇗꎞꁧꀋꅲꌠꆏ,ꄜꌊꍝꀯ꒜ꀉꒉꈿꅉꄉꇕꄟꄉ,ꋍꂓꋊꇧꎭꄷꐰꏤꄉꑲꆀ,ꄜꌊꉎꊐꌠꄈꎀꍹꁳꈌꁧꎻꄡꑟ。
ꄈꑼꀋꄸꄷꁢꊧꎃꊒꌠꀋꐥꃅ,ꐪꊛꄉꃘꁮꆪꄈꎀꍹꐥꐨꇬꐊꈽꀋꇁ,ꅀꄈꎆꀋꏮ,ꅀꄈꁸꇬꁳꃅꎻꌠꌤꀋꃅꌠꆏ,ꌌꋧꁧꃅꄈꇬꐞꁧꌠꃅꄉ。 ꍝꀯ꒜ꀉꒉꈿꅉꇬꄉꐰꏤꄉꄈꑼꑠꃅꐙꌠꂓꋊꇧꎭ,ꄷꀋꁧꄜꌊꄈꎀꍹꉎꊐꌠꁳꈌꁧꎻꄡꑟ。
ꑍ꒾ꌠ ꄈꅿꎀꍹꄹꏦ
ꊰꏢꌠ ꄈꆹꊨꏦꐱꀨꌋꆀꄈꏦꇬꈴꄉ,ꋯꁦꏓꁨꄹꏦꇬꍬꄉꊥꇫꌊꏓꋍꃱꃅꄉꌠꉻꄜꂷꉬ。 ꄈꅿꋯꁦꏓꁨꄹꏦꅉꀨꏥꏦꆏ:
(ꋍ)ꄈꑼꑴꅉꆏꄈꎀꍹꅇꃅ,ꀁꑌꌠꆏꀉꑌꌠꅇꃅ,ꎀꍹꐰꊐꌠꆏꎀꍹꉎꊐꌠꅇꃅ,ꄈꑭꊂꎀꍹꈁꐥꌠꌋꆀꄈꑼꈁꐥꌠꆏꄈꅿꇩꏤꑭꊂꁧꎁ꒜ꀉꒉꈿꅉꌋꆀꍏꑷꊈꑼꉼꅇꃅ。
(ꑍ)ꄈꅿꏲꂠꌤꏲꅉꈁꐥꊐꌠꆏ,ꊿꊇꁆꌌꁧꎁꃅꌤꏲꅉꌋꆀꄈꎀꍹꀋꉬꅉꇬꄈꊤꉇꄉꈭꐨꆏ,ꐯꇯꌊꄻꄉꅐꇁꌠꉬꌶ。
(ꌕ)ꄈꅿꏲꂠꌤꏲꅉꀊꂥꇊꀊꂥꊐꌠꆏ,ꄈꅿꇩꏤꑭꊂꁧꎁ꒜ꀉꒉꈿꅉꌋꆀ꒜ꈿꅉꇬꄉꌊꄻꅐꇁꌠꍏꑷꊈꑼꉼꉬ。 ꄈꃅꄷꇬꏲꂠꌤꏲꅉꈁꐥꊐꌠꆏ,ꄈꃅꄷꇬꁧꎁ꒜ꀉꒉꈿꅉꈁꐥꊐꌠꌋꆀꊿꊇ꒜ꈿꅉꇬꄉꌊꄻꅐꇁꌠꊈꑼꉼꉬ。 ꄈꅿꊈꑼꉼꈁꐥꊐꌠꆏꂱꑱꊐꌠꇬꁧꎁ꒜ꀉꒉꈿꅉꇬꆽꎍꄉꄷꀋꁧꌤꃅꐨꅇꄜꌶ。
(ꇖ)ꄈꅿꎀꍹꉎꊐꌠꆏꅉꀕꃅꎀꍹꐰꊐꌠꌋꆀꄈꑼꉹꁌꉜꐨꅲꇫꄉ,ꐳꃅꌤꃆꊿꊇꄜꅐꇁꌠꌌꂥꀘꌶ。 ꄈꅿꎀꍹꐰꊐꌠꆏꎀꍹꉎꊐꌠꏭꅺꇰꌋꆀꌤꃅꐨꅇꄜꇈ,ꉈꑴꄁꋦꃅꆽꎍꄉꂱꑱꃅꅍꈍꈐꌤꃆꑠꂥꀘꌶ。 ꎀꍹꐰꉎꊐꌠꇢꊭꇬꐛꐪꄜꐮꇰ、ꐮꊋꁈꄏꌋꆀꐮꍞꊟꌶ。 ꄈꅿꎀꍹꈁꐥꊐꌠꆏꏤꄻꄉꌠꇬꈴꄉꄈꃆꄇꄜꋊꌠꃅ,ꄈꑼꁳꄈꈏꇓꇬꌤꃆꃆꂮꑠꀉꑌꃅꅉꐚꌋꆀꃅꈽꎻ。
(ꉬ)ꄈꅿꊈꑼꉼꈁꐥꊐꌠꆏꋍꉻꃅꏲꂠꌠꌋꆀꂱꑱꃅꐨꁸꄉꆽꎍꃅꐮꐊꏲꌠꄹꏦꌬ。 ꌤꃆꀉꒉꀊꂾꌠꆏꐯꇯꋍꉻꃅꏲꂠ、ꋯꁦꏓꁨ、ꄂꃅꎥꇖ、꒜ꈿꄉꐰꏤꌠꏥꏦꇬꈴꄉ,ꌌꄈꅿꊈꑼꉼꁳꋍꉻꃅꇕꄟꄉ,ꐰꏤꅐꇁꎼꌶ; ꊈꑼꉼꇬꊿꈧꌠꆏꋍꉻꃅꐰꏤꄉꌠꌋꆀꌤꁸꄉꃅꌠꇬꈴꄉ,ꋒꐯꋒꃅꊨꏦꆽꎍꃅꐨꃅꇫꑟꌶ。
(ꃘ)ꄈꆹꊾꂷꏭꉜꒉꅼꇨꌠꐛꄟꈍꃅꐙꌠꉬꄿꂿꇫꏢꇋꌠꉬ。 ꄈꇬꏲꂠꊿꃅꈧꐤꄟꆏꄈꌋꆀꏓꂱꁳꍞꊟꎻꌠꄉꀧꄉ,ꋍꈭꐨꏲꂠꊿꄈꌋꆀꏓꂱꈲꏣꁧꎁꃅꌠꈁꐥꌠꐤꒉꐨꑌꀧꌋꃅꌶ。
ꊯꊪꏢꌠ ꄈꅿꁧꎁ꒜ꀉꒉꈿꅉꈁꐥꊐꌠꇬꁧꎁꌋꆀꊈꑼꉼꌊꄻꅐꇁꌠꆹ,ꌊꄻꊿꉪꐨꇬꈴꄉꃅꌶ。 ꌊꄻꇬꂓꀋꄀꃅꌋꌠꃄꄟꌬ。 ꌋꂯꄐꄉꌠꊾꂓꆏꄈꎀꍹꌋꆀꌊꄻꊿꁳꋒꐯꋒꃅꌌꇕꄟꎻ。 ꈛꎂꃅꌋꂯꄐꄉꌠꃷꁨꆏꌋꅐꄡꑟꌠꃷꁨꄩꎆꄉꍣꌋꏡꁈꌌꑌꐚꃅꌊꄻꉆ。 ꂴꍣꌋꏡꁈꌌꌊꄻꉚꇈ,ꌋꂯꄐꄉꌠꂓꌊꄻꅐꇁꈭꐨꑲꆀ,ꑌꐚꃅꌊꄻꑌꉆ。 ꌊꄻꊿꆹꌋꂯꄐꄉꌠꊿꃆꂮꅉꐚ、ꌋꂯꄐꄉꌠꊿꄺꀱꇧꎭꌠꇖꂟ、ꌋꂯꄐꄉꌠꈐꏭꑞꂷꑌꀋꌋꌠꌋꆀꊿꀉꁁꌋꌠꌅꈌꐥ。 ꎀꍹꌋꆀꊿꊨꏦꑞꂷꉬꄿꂿꃄꄟꋍꑞꋌꑵꇬꈴꄉꄀꇗꇱꄉꌊꄻꊿꁳꑞꂷꌋꅀꀋꌋꄷꀋꉆ。
ꄈꅿꃅꄷꁧꎁ꒜ꀉꒉꈿꅉꈁꐥꊐꌠꌋꆀꅉꂫꊐꌠꇬꁧꎁ꒜ꀉꒉꈿꅉꌊꄻꇬ,ꀋꄸꄷꄈꏦꇬꏦꐆꌠꃆꂮꑠꇫꅐꇁꇬꆏ,ꉎꊐꌠꄈꅿꊈꑼꉼꆏꌌꍤꄻꊨꄅꈭꐨ,ꌊꄻꄉꌠꀋꍝꄷꇨꎭꌠꌋꆀꏡꁈꄐꊒꌠꇬꈴꄉꐰꏤꅐꇁꄡꑟ, ꄷꀋꁧꄜꌊꉈꑴꉎꋍꊐꌠꄈꅿꊈꑼꉼꁳꍤꄻꄉꈌꁧꎼꇁꇈ,ꑌꐚꃅꄛꇰꄉꃄꌬꌶ。
ꄈꅿꁧꎁ꒜ꀉꒉꈿꅉꈁꐥꊐꌠꁧꎁꆏꃄꄮꏤꐥꄹꏦꌫꄻ。
ꊰꑋꏢꌠ ꄈꅿꍏꑷꌋꆀꃅꄷꈁꐥꊐꌠꇬꊈꑼꉼꆏꄻꅐꄮꇬꆏꁧꎁꇴꌊ꒜ꈿꄉ,ꐳꃅꂥꀘꌶꌠꌤꃆꀉꒉꀊꂾꌠꇕꄟꐰꏤꉆ。 ꁧꎁ꒜ꈿꌠꁧꎁꃷꁨꌋꆀꁧꎁꌊꄻꏡꁈꆏ,ꁧꎁ꒜ꈿꌠꇳꍝꌠꊈꑼꉼꁳꐰꏤꎻ。
ꊯꌕꏢꌠ ꄈꅿꎀꍹꀊꏀꌠꄻ,ꅀꄈꅿꎀꍹꂴꐥꌠꐆꇧꎭꂿꄷꇬꆏ,ꀋꎪꃅꉎꊐꌠꄈꎀꍹꁳꐰꏤꎻ。
ꄈꅿꃅꄷꁧꎁ꒜ꀉꒉꈿꅉꈁꐥꊐꌠꌋꆀꅉꂫꊐꌠꁧꎁ꒜ꀉꒉꈿꅉ꒜ꀋꈿꄮꇬ,ꉎꊐꌠꄈꎀꍹꉜꇬꄻꅐꇬꆏ,ꐰꊐꌠꄈꎀꍹꏲꌋꄀꆦꅀꌐꄉꁆꇬꇯꉆ。
ꄈꅿꍏꑷꌋꆀꃅꄷꈁꐥꊐꌠꇬꊈꑼꉼꆏꁧꎁꌤꏲꅉꁆꄻꉆ。
ꊯꇖꏢꌠ ꄈꅿꍏꑷꌋꆀꌜ、ꊨꏦꏱꅉꐎ、ꎂꏲꏃꊈꑼꉼꆏꏮꆫꄹꏦꃄꌬ,ꋍꈭꌠꃅꎁꃅꊬꌠꈐꇬ,ꈀꏱꄻꌠꃅꄷ、ꌤꏲꅉ、ꎆꏂꑘꌤꃅꅉꄈꎀꍹꌌꁊꈴꃅꏮꆫꌠꃅꇫꑟ。
ꍏꑷꄚꃆꂮꐥꌠꀯꊈꌋꆀꇩꏤꌤꏲꅉꈧꌠꄈꊤ(ꄈꊈ)ꆏꌤꃅꈉꐨꇬꉜꄉꏮꆫꌠꌤꃅ。
ꄈꅿꏃ(ꄃ、ꍏ、ꃀ)ꌋꆀꑤ(ꏃ、ꐎ、ꐕ)ꊈꑼꉼꆏꏮꆫꍤꄻꄹꏦꄻꄉ。
ꊯꉬꏢꌠ ꄈꅿꈁꐥꊐꌠꇬꏲꂠꌤꏲꅉꆏ,ꐰꊐꌠꎀꍹꃆꂮꐥꌠꌤꀉꒉꀊꂾꑠꐰꏤꄮꇬ,ꑍ꒜ꑍꎃꐚꃅꇬꆏ,ꐰꊐꌠꎀꍹꉜꐨꅲꇫꌶ。 ꐰꊐꌠꎀꍹꁳꁣꀋꐥꃅꊿꊇꌅꅍꌬꎻꌠꄉꀧꌶ。 ꌤꃆꐰꊐꌠꎀꍹꁳꀞꄻꎻꄡꑟꌠꆏ,ꀋꄸꄷꐛꐨꐋꀋꌡꌠꀋꐥꑲꆏ,ꉎꊐꌠꏲꂠꌤꏲꅉꆹꇫꈌꄀꇇꏿꌠꄡꃅ。
ꊰꃘꏢꌠ ꇩꏤꑭꊂꇬꃆꂮꐥꌠꏱꁈꃆꂮꌤꃆꀉꒉꀊꂾꌠꆏ,ꄈꍏꑷꀉꄂꇫꐰꏤꌅꈌꐥ,ꌤꃅꅉꈧꌠ、ꃅꄷꈧꌠꄈꎀꍹꆹꉜꐨꌌꍏꑷꏭꉉꉆ,ꄚꊨꏦꈁꏾꃅꐰꏤꌋꆀꉜꐨꌌꉇꉻꏭꄜꃑꀋꉆ。
ꄈꅿꐰꊐꌠꎀꍹꆏꀋꎪꃅꏟꈯꃅꉎꊐꌠꎀꍹꐰꏤꄉꌠꇬꈴꄉꃄꌬꌶ。 ꀋꄸꄷꐰꊐꌠꎀꍹꉜꇬ,ꉎꊐꌠꎀꍹꐰꏤꄉꌠꂱꑱꃅꄷ、ꂱꑱꌤꃅꅉꃶꐚꐛꐨꌋꆀꐮꄉꀋꄐꇬꆏ,ꄺꀱꄷꌠꇖꉆ; ꀋꄸꄷꉎꊐꌠꎀꍹꆹꂴꐰꏤꄉꌠꌬꇬꎷꄷꑲꆏ,ꐰꊐꌠꎀꍹꆏꀋꎪꃅꄚꍬꄉꃅꌶ,ꄷꀋꁧꄇꄜꋊꄉꉜꐨꐯꀋꌡꌠꄜꃑꀋꉆ,ꄚꀱꉈꑴꉎꋍꊐꌠꎀꍹꏭꄛꇰꌅꈌꐥ。
ꄈꅿꎀꍹꈁꐥꊐꌠꇬꉜꅍꄯꒉꌋꆀꀉꁁꄜꉺꅍꆹ,ꀋꎪꃅꄈꅿꈛꏦ、ꌐꏦ、ꏱꁈꌋꆀꏤꐪꄜꉺꌶ。
ꊰꏁꏢꌠ ꄈꎀꍹꌤꃆꇕꄟꐰꏤꄮꇬꆏ,ꀋꎪꃅꀁꑌꌠꆏꀉꑌꌠꅇꃅꌠꏥꏦꌬ。 ꌤꃆꀋꂿꑘꌠꐰꏤꇬꆏ,ꊨꇽꄉꃅꌶ。 ꊿꀁꑌꈨꉜꐨꐯꀋꌡꌠꆹ,ꎔꎗꃅꌌꉪꏢꄡꑟ。 ꀋꄸꄷꌤꃆꀉꒉꀊꂾꌠꀂꏽꐮꇖꅒꄉ,ꑍꁁꏯꊿꃷꁨꐯꀋꇊꑍꃅꐙꇬꆏ,ꐛꐨꃛꊸꐨꐥꌠꆏꀋꎪꃅꊿꀉꑌꌠꉜꐨꇬꈴꄉꃅꌠꉇꄉꈭꐨ,ꊼꇅꄯꇫꄉꑲꆀꐰꏤ,ꀒꁨꋍꁘꃅꍤꄻꎥꃪ,ꉜꐨꉉꐮꇰꄉ,ꌌꊁꃢꌠꇬꄉꊨꇽꀱꄡꑟ; ꐛꃆꐛꂮꐋꀋꌡꐨꐤꄮꇬꆏ,ꐮꀥꈿꌠꌤꃆꄜꌊꉎꊐꌠꎀꍹꇰꄉ,ꍞꇽꇧꎭꄷꑌꇖꉆ。
ꄈꑼꑴꅉꄈꎀꍹꁧꎁꃅꄉꉜꐨꀋꉬꀋꉆꌠꉉꄜꇬ,ꀋꄸꄷꄈꎀꍹꐰꏤꄉꌠꈍꈐꐂꆹꑲꆏ,ꀋꎪꃅꌌꋍꐉꅉꄈꎀꍹꁳꇕꄟꄉꐰꏤꎻ,ꅀꌌꉎꊐꌠꄈꎀꍹꏭꅱꄻꌶ。 ꄈꑼꑞꂷꉬꄿꂿ,ꄉꅍꀄꊭꀉꒉꄿꂿ,ꐯꇯꊨꏦꋧꁧꃅꌤꃆꀉꒉꀊꂾꌠꐰꏤꀋꉆ; ꀋꄸꄷꐛꐨꃛꊸꌠꊝꇁꄉ,ꊨꏦꁳꀋꎪꃅꐰꏤꎻꄻꅐꇬꑌ,ꃅꄉꈭꐨꆏꐳꃅꄈꎀꍹꏭꄛꇰꌶ。 ꏲꂠꊿꑞꂷꉬꄿꂿꊨꏦꆹꇏꏿꈁꏾꃅꐺꌠꌋꆀꊨꏦꄓꄈꎀꍹꄩꍅꄉꃅꀋꉆ。
ꊰꉆꏢꌠ ꄈꅿꍏꑷ、ꃅꄷꌋꆀꅉꂫꊐꌠꎀꍹꆏ,ꐯꇯꀋꎪꃅꄈꋈꄻꌠꉜꁨꌶ,ꅉꀕꃅꄈꅿꄜꉺꌤꃅꌠ、꒿ꂘꌤꃅꌠ、ꎀꍹꌤꃅꌠ、ꍬꏦꍤꄻꌤꃅꌠ、ꉹꁌꌤꃅꌠ、ꏓꋍꃱꃅꌠꑠꌤꃅꁁꏯꌌꇕꄟ、ꍤꄻ,ꋓꉪꁨꄉꄈꈐꄈꉈꉪꇐꍔꍞꐛꐪꎥꃪ。
ꌕ꒾ꌠ ꄈꅿꍏꑷꎀꍹ
ꊯꈬꏢꌠ ꄈꅿꇩꏤꑭꊂꁧꎁ꒜ꀉꒉꈿꌠꆏꉬꈎꋍꈭꈿ,ꍏꑷꊈꑼꉼꁳꇳꍝꄉꈿꎻ。 ꍏꑷꊈꑼꉼꉜꇬꄻꅐ,ꅀꌜꊐꌠꎀꍹꌕꁧꋊꋍꁧꈋꉐꌠꇖꂟꇬꆏ,ꇩꏤꑭꊂꁧꎁ꒜ꀉꒉꈿꌠꆹꏛꃅꈿꉆ; ꀋꄸꄷꐛꐨꐋꀋꌡꌠꀋꐥꑲꆏ,ꄯꊁꄉꈿꀋꉆ。
ꇩꏤꑭꊂꁧꎁ꒜ꀉꒉꈿꌠꁧꎁꃷꁨꌋꆀꌊꄻꏡꁈꆏ,ꍏꑷꊈꑼꉼꁳꐰꏤꎻ。
ꑍꊏꏢꌠ ꄈꅿꇩꏤꑭꊂꁧꎁ꒜ꀉꒉꈿꅉꇬꌅꅍꆏ:
(ꋍ)ꍏꑷꊈꑼꉼꅇꄜꌠꅱꄻꌋꆀꌌꍤꄻ;
(ꑍ)ꍏꑷꍬꏦꍤꄻꊈꑼꉼꅇꄜꌠꌌꍤꄻ;
(ꌕ)ꄈꇬꌤꃆꀉꒉꀊꂾꌠꇕꄟꄷꀋꁧꌌꏤꄻ;
(ꇖ)ꄈꏦꌌꄺꀱ;
(ꉬ)ꍏꑷꊈꑼꉼꌊꄻ;
(ꃘ)ꍏꑷꍬꏦꍤꄻꊈꑼꉼꌊꄻ。
ꑍꊏꋋꏢꌠ ꄈꅿꇩꏤꑭꊂꁧꎁ꒜ꈿꅉꇬꌅꅍꆏ:ꌤꃆꀉꒉꀊꂾꌠꌌꇕꄟ、ꐰꏤ; ꍏꑷꊈꑼꉼ、ꍏꑷꍬꏦꍤꄻꊈꑼꉼꇬꊿꄹꁆꆥꄻꌋꆀꁦꎆꌋꇬꇯ。 ꆥꄻ、ꁦꎆꌋꇬꇯꌠꍏꑷꊈꑼꌋꆀꄐꇱꍏꑷꊈꑼꃷꁨꆹ,ꄈꅿꇩꏤꑭꊂꁧꎁ꒜ꀉꒉꈿꅉꇬꌊꄻꎼꇁꌠꍏꑷꊈꑼꌋꆀꄐꇱꍏꑷꊈꑼꂱꑱꈁꐥꃷꁨꇬꉬꁧꋊꋍꁧꄩꐂꀋꉆ。
ꑍꊏꑋꏢꌠ ꄈꅿꍏꑷꊈꑼꉼꋍꈭꌠꃄꄮꆏꃅꐎꉬꈎꃅꄉ。 ꇩꏤꑭꊂꁧꎁ꒜ꀉꒉꈿꌠꀋꄸꄷꏛꃅꈿꅀꄯꊁꄉꈿꇬꆏ,ꋍꃄꄮꑌꄚꐊꄉꄺꀱ。 ꍏꑷꊈꑼꉼꊈꑼꌋꆀꄐꇱꊈꑼꆏꀋꎪꃅꄈꇬꃹꉬꈎꈋꉐꐥꀐꌠꉬꌶ。 ꍏꑷꊈꑼꉼꊈꑼꌋꆀꄐꇱꊈꑼꃷꁨꆏ, ꇩꏤꑭꊂꁧꎁ꒜ꀉꒉꈿꅉꇬꁳꏤꄻꎻ。 ꍏꑷꊈꑼꉼꇬꊈꑼꃷꁨꀋꇎꇁꇬꆏ,ꍏꑷꊈꑼꉼꇬꄐꇱꊈꑼꈧꌠꇬꀾꀉꑌꀁꑌꊌꐨꇬꉜꄉ꒾ꁨꃅꄻꇬꇯ。
ꍏꑷꊈꑼꉼꐊꈴ꒜ꈿꌠꆏꍏꑷꍔꍞꏳꇬꁳꇳꍝꄉꈿꎻ,ꋍꈓꇬꀁꑌꐯꀁꑌꇬꑌꋍꃢꈿꌶ。 ꍏꑷꍔꍞꏳꆏꍏꑷꊈꑼꉼꐊꈴ꒜ꈿꅉꏭꌤꃅꅇꄜ,ꇬꁳꍞꊟꎻ。
ꇩꏤꑭꊂꁧꎁ꒜ꀉꒉꀋꈿꄮꇬꆏ,ꍏꑷꊈꑼꉼꆏꇩꏤꑭꊂꁧꎁ꒜ꀉꒉꈿꅉꇬꐰꏤꄉꌠꌬ,ꄈꌤꈁꃅꌠꇬꏲꂠ,ꉇꉻꏭꆏꍏꇩꇭꍣꄈꁧꎁꃅ。
ꑍꊎꌕꏢꌠ ꄈꅿꍏꑷꍔꍞꏳ、ꍏꑷꍔꍞꏳꅉꀕꌤꏲꊈꑼꉼꌋꆀꍏꑷꊈꑼꉼꊝꎻꏹꆏ,ꍏꑷꊈꑼꉼꐊꈴ꒜ꈿꄉꌊꄻꎻ。 ꍏꑷꊈꑼꉼꊝꎻꏹꆏꀋꎪꃅꍏꑷꍔꍞꏳꅉꀕꌤꏲꊈꑼꉼꊈꑼꈬꇬꄉꌊꄻꅐꇁꌶ。
ꍏꑷꍔꍞꏳꌋꆀꋍꅉꀕꌤꏲꊈꑼꉼꆹꍏꑷꊈꑼꉼꐊꈴ꒜ꀋꈿꄮꇬꆏ,ꍏꑷꊈꑼꉼꃤꌅꈌꌬ。
ꍏꑷꎻꏹꍲꆹꍏꑷꍔꍞꏳꌋꆀꋍꅉꀕꌤꏲꊈꑼꉼꇬꌤꀞꅉꉬ; ꊿꄚꐊꌠꆏꍏꑷꍔꍞꏳꅉꀕꌤꏲꊈꑼꉼꁳꂓꄜꄉ,ꍏꑷꊈꑼꉼꐊꈴ꒜ꈿꅉꄉꉌꃹꈴꌶ。
ꍏꑷꊈꑼꉼꊝꎻꏹꆏꍏꑷꍔꍞꏳ꒜ꈿꇬꌋꆀꍏꑷꍔꍞꏳꅉꀕꌤꏲꊈꑼꉼ꒜ꈿꇬꌄꇤꄉꇳꍝꌊꈿ,ꄷꀋꁧꍏꑷꎻꏹꍲꌤꃅꌠꊥꇺ。
ꄈꅿꍏꑷꂽꌤꊈꑼꉼꇬꐊꊿꈧꌠꆏꍏꑷꊈꑼꉼꇬꁳꏤꄻꎻ,ꍏꑷꂽꌤꊈꑼꉼꆏꍗꑮꆽꎍꄹꏦꃄꌬ。
ꍏꑷꊈꑼꉼꋍꈭꋑꀋꋒꌠꇬꌊꄻꅐꇁꌠꍏꑷꏲꂠꅉꌋꆀꍏꑷꇬꏲꌋꈧꌠꆏ,ꊁꈭꌠꇩꏤꑭꊂꁧꎁ꒜ꀉꒉꈿꄮꇬ,ꐪꊛꄉꄈꑍ꒜ꑍꌤꆿꃅꌠꏱꇺ,ꏲꅷꊁꈭꌠꍏꑷꊈꑼꉼꇬꍏꑷꏲꂠꅉꌋꆀꍏꑷꇬꏲꌋꀊꏀꈧꌠꌊꄻꅐꇁꄮꑟ。
ꑍꊎꇖꏢꌠ ꍏꇩꏓꂱꁌꄝꂽꇬꄈꎀꍹꆹ,ꍏꑷꊈꑼꉼꄐꌐꎼꇁꌠꇬꈴꄉꌤꃅ。 ꍏꑷꂽꌤꊈꑼꉼꆹꂽꇬꄈꅿꌤꃅꌠꌋꆀꍔꍞꃆꂮꌤꃅꌠꇬꌄꇤ,ꂽꇬꄈꎀꍹꏦꉻꌋꆀꏲꉻꏤꄻ。
ꇖ꒾ꌠ ꄈꅿꃅꄷꎀꍹ
ꑍꊎꉬꏢꌠ ꄈꅿꌜ、ꊨꏦꏱꅉꐎ、ꎂꏲꏃꇬꁧꎁ꒜ꀉꒉꈿꌠ,ꐎꐛꌠꏃꌋꆀꊨꏦꏱꅉꍏꁧꎁ꒜ꀉꒉꈿꌠ,ꑤ(ꐕ)、ꊨꏦꏱꅉꑤ、ꐎꀋꐛꌠꏃꌋꆀꏃꏲꌠꐎꇬꁧꎁ꒜ꀉꒉꈿꌠꆏ,ꉬꈎꋍꈭꈿ。
ꄈꅿꃅꄷꈁꐥꊐꌠꇬꁧꎁ꒜ꀉꒉꈿꌠꆹꂱꑱꊐꌠꄈꅿꊈꑼꉼꁳꇳꍝꄉꈿꎻ。 ꐛꐨꐋꀋꌡꄮꊝꇬꆏ,ꉎꊐꌠꊈꑼꉼꁳꈌꁧꄉꇈ,ꏛꃅꈿꅀꄯꊁꄉꈿꑌꉆ。
ꄈꅿꃅꄷꈁꐥꊐꌠꇬꁧꎁ꒜ꀉꒉꈿꇬꁧꎁꃷꁨꌋꆀꌊꄻꏡꁈꆏ,ꂱꑱꊐꌠꄈꅿꊈꑼꉼꁳꐰꏤꄉꇈ,ꄜꌊꄈꅿꊈꑼꉼꉎꊐꌠꁳꈌꁧꎻ。
ꑍꊏꃘꏢꌠ ꄈꅿꃅꄷꈁꐥꊐꌠꇬꁧꎁ꒜ꀉꒉꈿꇬꌅꈌꆏ:
(ꋍ)ꂱꑱꊐꌠꊈꑼꉼꅇꄜꌠꅱꄻ、ꍤꄻ;
(ꑍ)ꂱꑱꊐꌠꍬꏦꍤꄻꊈꑼꉼꅇꄜꌠꍤꄻ;
(ꌕ)ꂱꑱꃅꄷꈍꈐꇬꌤꃆꀉꒉꀊꂾꌠꇕꄟꄷꀋꁧꌌꏤꐪꃅ;
(ꇖ)ꂱꑱꊐꌠꄈꅿꊈꑼꉼꌊꄻ,ꂱꑱꊐꌠꄈꅿꍬꏦꍤꄻꊈꑼꉼꌊꄻ。
ꑍꊏꏁꏢꌠ ꄈꅿꌜ、ꊨꏦꏱꅉꐎ、ꎂꏲꏃ、ꐎꐛꌠꏃꌋꆀꊨꏦꏱꅉꍏꊐꌠꊈꑼꉼꆏ,ꋍꈭꌠꉬꈎꏲ。 ꊈꑼꉼꋋꈨꇬꊈꑼꌋꆀꄐꇱꊈꑼꆏꀋꎪꃅꄈꇬꃹꉬꈎꈋꉐꐥꀐꌠꉬꌶ。
ꄈꅿꑤ(ꐕ)、ꊨꏦꏱꅉꑤ、ꐎꀋꐛꌠꏃꌋꆀꏃꏲꌠꐎꇬꊈꑼꉼꆏ,ꋍꈭꌠꉬꈎꏲ。 ꊈꑼꉼꋋꈨꇬꊈꑼꌋꆀꄐꇱꊈꑼꆏꀋꎪꃅꄈꇬꃹꌕꈎꈋꉐꐥꀐꌠꉬꌶ。
ꄈꅿꃅꄷꈁꐥꊐꌠꇬꁧꎁ꒜ꀉꒉꈿꌠꀋꄸꄷꏛꃅꈿꅀꄯꊁꄉꈿꇬꆏ,ꋌꌊꄻꄉꌠꊈꑼꉼꏱꄮꑌꄚꐊꄉꄺꀱ。
ꄈꅿꃅꄷꊈꑼꉼꈁꐥꊐꌠꇬꊈꑼꌋꆀꄐꇱꊈꑼꃷꁨꆏ,ꊈꑼꉼꉎꊐꌠꁳꏡꃏꄉꐰꏤꎻ。 ꄈꅿꃅꄷꈁꐥꊐꌠꇬꊈꑼꉼꇬꊈꑼꃷꁨꀋꇎꇬꆏ,ꄐꇱꊈꑼꈧꌠꇬꀾꀉꑌꀁꑌꊌꐨꇬꉜꄉ꒾ꁨꃅꄻꇬꇯ。
ꄈꅿꃅꄷꈁꐥꊐꌠꊈꑼꉼꐊꈴ꒜ꈿꌠꆏ,ꋍꈓꌠꀁꑌꐯꀁꑌꑌꑍꃢꈿꌶ。
ꄈꅿꃅꄷꈁꐥꊐꌠꊈꑼꉼꁧꎁ꒜ꀉꒉꀋꈿꄮꇬꆏ,ꄈꎀꍹꉎꊐꌠꇬꄐꌐꎼꇁꌠꌋꆀꂱꑱꊐꌠꇬꄈꁧꎁ꒜ꀉꒉꈿꌠꏤꐪꃄꌬ,ꊨꏦꃅꄷꇬꌤꃅꌠꏲꂠ,ꏤꄮꐥꃅꉎꊐꌠꄈꅿꊈꑼꉼꏭꃅꐨꄛꇰ。
ꑍꊏꉆꏢꌠ ꄈꅿꃅꄷꈁꐥꊐꌠꊈꑼꉼꐊꈴꃅ꒜ꈿꇬꆏ,ꅉꀕꌤꏲꊈꑼꉼꌋꆀꎻꏹ、ꃛꎻꏹꌊꄻ,ꄷꀋꁧꄜꌊꉎꊐꌠꄈꅿꊈꑼꉼꁳꈌꁧꎻ。 ꄈꅿꃅꄷꈁꐥꊐꌠꊈꑼꉼꇬꅉꀕꌤꏲꊈꑼꉼꆏ,ꊈꑼꉼꐊꈴꃅ꒜ꀋꈿꄮꇬꆏ,ꊈꑼꉼꌅꅍꌬ; ꊁꈭꌠꁧꎁ꒜ꀉꒉꈿꇰꊬꌠꇬꑌ,ꐪꊛꄉꎃꐚꌤꃅꌠꏱꇺ,ꃅꅷꊁꈭꌠꅉꀕꌤꏲꊈꑼꉼꀊꏀꈧꌠꌋꅐꇁꄮꇬꑟ。
ꄈꅿꃅꄷꈁꐥꊐꌠꊈꑼꉼꇬꅉꀕꌤꏲꊈꑼꉼꆏꏤꄮꐥꃅꊈꑼꉼꐊꈴ꒜ꈿꌠꏭꌤꃅꅇꄜ,ꇬꁳꍞꊟꎻ。
ꑍꊎꈬꏢꌠ ꄈꅿꄃꐎꊈꑼꉼꌋꆀꄃꐎꊈꑼꉼꌋꆀꐯꌟꌠꎀꍹꆏ,ꄈꅿꌜ、ꊨꏦꏱꅉꐎꊈꑼꉼꇬꁆꌌꑤ、ꊨꏦꏲꌠꑤ、ꏃꈍꑋꂷꈍꈐꇬꄉꇫꁧꎁꃅꌤꃅꅉꉬ。 ꋋꆹꌜ、ꊨꏦꏱꅉꐎꊈꑼꉼꏮꇬꁳꄉꌠꌅꈌꇬꈴꄉ,ꂱꑱꃅꄷꌤꃅꌠꏲꂠꌠꉬ。
ꉬ꒾ꌠ ꄈꅿꅉꂫꊐꌠꎀꍹ
ꌕꊰꏢꌠ ꎆꏂꑘ、ꂿꑘꁡꇤ、ꌤꏲꅉ、ꌶꅉ、ꈆꑪꎥꃪꑼꌙ、ꏦꎫꋥꁕ、ꐧꋦꎀꍹ、ꏓꂱꁌꄝꂽꇬꆃꄐꌋꆀꀉꁁꅉꂫꊐꌠꇬꌤꃅꅉ,ꄈꑼꑌꐚꌠꌕꑻꈋꉐꐥꌠꉬꄷꑲꆏ,ꉬꇮꃅꄈꅿꅉꂫꊐꌠꎀꍹꄻꄉꄡꑟ。
ꄈꅿꅉꂫꊐꌠꎀꍹꆏ,ꌤꃅꈉꐨꇬꌋꆀꄈꑼꃷꁨꇬꉜꄉ,ꌌꉎꊐꌠꄈꎀꍹꁳꈌꁧꄉ,ꏡꃏꄉꄈꅿꅉꂫꊐꌠꊈꑼꉼ、ꊝꍝꀯꊈꑼꉼ、ꍝꀯꊈꑼꉼꄻꄉ。 ꅉꂫꊐꌠꊈꑼꉼꆏꄈꑼ꒜ꀉꒉꈿꅉꇬꅀꁧꎁ꒜ꀉꒉꈿꅉꇬꄉꌊꄻꅐꇁ,ꊝꍝꀯꊈꑼꉼꌋꆀꍝꀯꊈꑼꉼꆏꄈꑼ꒜ꀉꒉꈿꅉꇬꄉꌊꄻꅐꇁ,ꊈꑼꌋꂯꄐꄉꌠꂓꄜꎼꇁꌠꆏꀊꐯꈭꃅꄈꑼꌋꆀꉹꁌꉜꐨꅱꄻꌶ。
ꌕꊰꋋꏢꌠ ꄈꅿꅉꂫꊐꌠꊈꑼꉼ、ꊝꍝꀯꊈꑼꉼ、ꍝꀯꊈꑼꉼꋍꈭꃄꄮꆏꌕꈎꅑꉬꈎꉬ。 ꅉꂫꊐꌠꊈꑼꉼ、ꊝꍝꀯꊈꑼꉼ、ꍝꀯꊈꑼꉼꇬꌊꄻꅐꇁꌠꎻꏹ、ꃛꎻꏹꆏ,ꄜꌊꄈꎀꍹꉎꊐꌠꁳꈌꁧꎻꄡꑟ。
ꌕꊰꑋꏢꌠ ꄈꅿꅉꂫꊐꌠꎀꍹꆹꄈꐧꋦꅉꂫꊐꌠꇬꎀꍹꇬꉈꈽꉺꇓꉬ,ꋋꆹꄈꌤꃅꌠꌋꆀꌉꈿꊋꃤꈁꐥꌠꅉ꒜ꉬ。 ꋍꅉꀨꂿꃆꆏ:
(ꋍ)ꄈꅿꈛꏦ、ꌐꏦꌋꆀꏱꁈꄜꉺ、ꃄꌬ,ꄈꍏꑷ、ꉎꊐꌠꎀꍹꌋꆀꂱꑱꊐꌠꎀꍹꏤꐪꄜꉺ、ꃄꌬꄉ,ꋒꐯꋒꃅꄈꑼꂴꅑꌶꀠꂿꄐꇤꅐꇁ,ꏣꀋꑌꃅꂴꀺꉾꅔ,ꄈꈏꉈꇥꀯꌋꆀꉹꁌꏭꋯꑌ、ꊥꇬꄉ,ꊋꇤꄉꂱꑱꌤꃅꅉꇬꂿꃆꈁꐥꌠꃅꇫꑟ。
(ꑍ)ꄈꑼꊥꇬꄉꎔꎗꃅꂷꇻꌦꆺꆀꉪꏦ、꒜꒾ꄏꉪꇐ、ꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠ、ꈆꑪꃅꀻꎆꌠꉜꐨ、ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌶꄻ,“ꑍꌷꋍꄻ”ꌶꄻꉙꂘꌠꅉꀕꐛꈴꄹꏦꐛꈴꌠꄹꎆ,ꄈꈛꏦ、ꌐꏦ、ꏱꁈꌋꆀꏤꐪꌷ, ꄈꅿꅉꀨꌧꇐꌷ,ꈆꑪ、ꁱꀕ、ꏦꃤꌋꆀꃅꑘꌧꇐꌷ。
(ꌕ)ꄈꑼꏭ꒿ꂘ、ꏲꂠ、ꍞꊟꌋꆀꁧꃤꃅ,ꄈꑼꊇꁧꉀꐕ,ꉪꅉꑇꐨꑌꈬ,ꄈꊇꅉꀉꇨꃅꑌꇁꎻ,ꏦꇨꃅꄈꅿꎀꍹꐥꐨꃅ,ꀠꂘꌋꆀꊨꏦꀱꊨꏦꀠꂘꌠꃅ,ꄈꅿꍬꏦꌫꄻꌋꆀꇫꀧꌋꃅ,ꄈꑼꏭꍞꊟꄉꏟꈯꃅꋭꑘꃅꇫꑟꎻ,ꄈꑼꌅꈌꈲꁧꏦꀧꄉꄝꌠꁳꇑꑣꄡꎽ。 ꄈꑼꏮꐺꌠꏭꏲꂠꌠꊋꀥꇱꌋꆀꄻꃪ。
(ꇖ)ꑖꑟꃅꉹꁌꑌꑲ,ꅉꀕꃅꉹꁌꄈꑼ、ꄈꌤꃅꌠꏭꀠꂘꌠꌋꆀꉜꐨꅲꇫ,ꉹꁌꐥꄡꑟꌠꌅꐨꈲꁧꌋꆀꈲꏣꀧꌋꃅ,ꉹꁌꉪꇐꍔꍞꌤꃅꋒꌶ。
(ꉬ)ꋒꐯꋒꃅꄈꑼꌋꆀꉹꁌꏣꀋꑌꐨꀹꄻꐨꋊꇤꅐꇁ,ꊿꊇꇢꊭꇬꊿꌧꅍꄐꅍꐥꑠꌋꅜ、ꁱꂘ、ꌋꁵꎼꇁ,ꊿꊇꏭꊋꊡ、ꊋꁈꄏꄉꄺꀱꁉꃑꌋꆀꐧꋦꉪꏦꐛꏀꈴꋈꄻꅉꇬꄉꊨꏦꌧꐨꂿꄐꅐꌞꎻ。
(ꃘ)ꏣꀋꑌꃅꄈꇬꃹꂿꄷꇖꂟꌠꏭ꒿ꂘ、ꁰꍋ,ꅉꀕꃅꄈꑼꀻꎆꇬꇯꌠꃅꋒꃅꄉ,ꒃꅐ、ꌤꃅꅉꂴꊐꌠꇬꌋꆀꌠꏀꈬꇬꄈꑼꀻꎆꌠꉜꁨꌶ。
(ꏃ)ꄈꑼꇥꀯꌋꆀꀉꁁꌤꃅꊿꈁꐥꌠꏭꍞꊟꄉꏦꇨꃅꇩꏤꏦꃤꏦꇗꇬꍬ,ꏦꇨꃅꇩꏤꏱꎆꎆꏣꏦꇗꌋꆀꊿꌤꄹꏦꇬꍬ,ꇩꏤ、ꋍꉻꌋꆀꉹꁌꈲꏣꇑꍆꀋꉆ。
(ꉆ)ꄈꑼꌋꆀꉹꁌ꒿ꂘꄉꊨꏦꑴꐚꃅꃅꇏꀋꉾꌠꏭꄘꑣ,ꏟꈯꃅꋍꑞꋍꑵꌠꄹꐆꏦꐆꌠꃅꐨꏭꉈꈽ。
ꌕꊯꌕꏢꌠ ꏦꎫ、ꑣ、ꍔꇬꄈꅿꅉꂫꊐꌠꊈꑼꉼꌋꆀꋂ、ꋥꁕꇬꄈꎀꍹꆏ,ꂱꑱꃅꄷꌤꃅꌠꌋꆀꅉꂫꊐꌠꐧꋦꏱꄻꌠꇬꏲꂠ,ꏲꑘꎀꍹ、ꎆꏣꎀꍹꌋꆀꉹꁌꊨꏦꏲꌠꎀꍹꑠꋒꐯꋒꃅꌅꈌꌬꌠꇬꄉꀧ、ꊋꁈꄏ。
ꇩꁨꎆꏂꑘꄈꊈ(ꄈꊤ)ꆏꏲꂠꂿꄐꋊꇤ,ꃅꍜꌭ、ꇴꉻꏲ、ꃅꇫꑟꌠꄉꀧ,ꏤꐪꇬꈴꄉꎆꏂꑘꌤꆿꀉꒉꀊꂾꌠꇕꄟꌋꆀꏤꄻ。 ꇩꁨꎆꏂꑘꌋꆀꋍꉻꎆꏂꑘꇬꄈꅿꅉꂫꊐꌠꎀꍹꆏ,ꎆꏂꑘꒃꅐꀰꏢꌠꇬꆼꒆꄉꌤꃅꌠꍔꆙ。 ꄈꌋꆀꇩꏤꌐꏦ、ꏱꁈꌌꂱꑱꎆꏂꑘꇬꃄꌬꌠꄉꀧ、ꍞꊟ; ꇷꄏꉼ、ꄏꌧꉼ、ꌤꍞꉼꌋꆀꏠꅿ(ꍣꍈ)ꏦꃤꈴꄉꌅꈌꌬꌠꊋꁈꄏ; ꋍ꒜ꁨꀋꑌꉌꂵꄅꀋꑌꃅꇮꃅꌤꃅꊿꋍꏅꌠꉘꇉꄉ,ꇮꃅꌤꃅꊿꁧꎁ꒜ꀉꒉꈿꅉꇬꌤꃅꌠꄏꐓ; ꎆꏂꑘꌤꃆꀉꒉꀊꂾꌠꏤꇽꌠꇬꐊꈽ; ꊋꀥꇱꄉꄈꎀꍹꑴꅉꋈꄻ,ꉪꇐꍔꍞꌤꃅꌠ、ꉌꊈꌧꑳꋈꄻꌠꌋꆀꇪꉼ、ꌠꏀꄨꑠꉹꁌꏓꉻꎀꍹꏲꂠ。
ꉻꁨꏦꀋꉬꌠꎆꏣꎀꍹꇬꄈꅿꅉꂫꊐꌠꎀꍹꆏ,ꄈꅿꌐꏦꏱꁈꌬ,ꎆꏂꑘꄐꂘꌋꆀꍞꊟꌊꇩꏤꏦꃤꏦꇗꍬ,ꇪꉼ、ꌠꏀꄨꑠꉹꁌꏓꉻꎀꍹꏲꂠ,ꌤꃅꇮꃅꊿꉹꁌꏭꋯꑌꃯꉻꄉ,ꋍꑞꋍꁆꏯꇬꏦꊒꌅꈌꈲꁧꀧꌋꃅ,ꎆꏂꑘꉾꃪꃅꀻꎆꆹꌠꊥꎆ。
ꐧꋦꎀꍹꇬꄈꅿꅉꂫꊐꌠꎀꍹꆏ,ꄈꅿꈛꏦ、ꌐꏦ、ꏱꁈꄜꁊꌋꆀꃄꌬ,ꇪꉼ、ꌠꏀꄨꑠꉹꁌꏓꉻꎀꍹꏲꂠ,ꄈꑼꉙꂘꏲꂠ,ꉹꁌꁧꃤꃅꌠꄐꏁ,ꌤꑘꀻꎆꌠꄹꇙ。
ꏲꑘꏲꌋꃅꎁꄹꏦꌬꌠꌤꑘꌤꃅꅉꇬꄈꅿꅉꂫꊐꌠꎀꍹꆏ,ꌉꈿꁿꇓꂿꄐꋊꇤ。 ꄈꊈꏲꂠꌠꇂꃴꄉꏲꑘꏲꌋꃅꎁꄹꏦꌬꌠꌤꑘꌤꃅꅉꇬꄈꅿꅉꂫꊐꌠꎀꍹꆏ,ꌤꃆꀉꒉꀊꂾꌠꃆꂮꇕꄟ、ꐰꏤꌶ,ꋍꈭꐨꏲꑘꏲꌋꁳꋒꐯꋒꃅꂱꑱꌅꈌꌬꎻꌠꑌꄉꀧ。
ꄈꌋꆀꇩꏤꌤꏲꅉꈁꐥꊐꌠꇬꄈꅿꅉꂫꊐꌠꎀꍹꆏ,ꏲꑘꇬꏲꌋꇇꀨꄉꂿꃆꃅꇫꑟ,ꌤꃅꌊꀊꅰꃅꃪꇁꎻ,ꏲꑘꏲꌋꑌꇫꐊꌠꄈꑼꈁꐥꌠꇬꉙꂘ、ꏱꄻ、ꍞꊟ,ꂱꑱꌤꃅꅉꈚꌠꇬꃅꑘꌤꆏꀋꏲ。
ꌕꊯꇖꏢꌠ ꄈꍝꀯꆹꄈꅿꅉꃀꎀꍹꉬ,ꈛꎂꃅꄈꑼꉙꂘ、ꄈꑼꏲꂠ、ꄈꑼꍞꊟꌋꆀꉹꁌꊥꇫ、ꉹꁌꏭꄜꉺ、ꉹꁌꏓꋧ、ꉹꁌꎁꃅꌠꃅꎁꆹꄜ。
ꃘ꒾ꌠ ꄈꅿꇥꀯ
ꌕꊯꉬꏢꌠ ꄈꅿꇥꀯꆹꄈꅿꌤꑘꇬꈯꌬꉬ,ꏓꂱꋍꏅꌠꊩꌺꉬ,ꀋꎪꌃꎴꊪꃅꌠꃅꇫꑟ。 ꄈꆹꑌꇐꌧꇐꐊꐙ、ꑌꇐꌌꀨꇬꄉꌠꏥꏦꇬꈴꄉꇥꀯꌋ,ꀋꎪꃅꃄꇖꄹꊂ、ꄐꐨꉜꄉꊾꌬ,ꌤꑘꌌꀨꄉ、ꊒꆽꀋꎪꌠꌭꈬ,ꐮꉂꐯꏡꌠꇬꉜꄉꊾꌬꑠꏭꆼꁏ,ꊋꇤꄉꇥꀯꁥꌠꁳꇝꂱꈴ、ꀊꏀꈴ、ꌧꇐꈴ、ꌐꑘꈴꎻꌠꃅꇫꑟ。
ꄈꆹꇥꀯ꒿ꂘ、ꁰꍋ、ꌊꄻ、ꍤꎖꌠꌋꆀꍞꊟꌠꉜꁨ,ꈜꀕꇈꇥꀯꀊꏀꉾꃪꌠꁰꍋ、ꌊꄻꑠꉜꁨ。 ꏣꀋꑌꃅꇥꀯꄹꏦꄺꀱꌠꄹꅷꀒꁨꆹ。
ꄈꆹꌋꅪꇥꀯꌋꆀꀁꑌꊿꋅꇥꀯꂘꄻ、ꌊꌬꌠꇬꉜꁨ。
ꌕꊰꃘꏢꌠ ꄈꈁꐥꊐꌠꇬꏲꌋꇥꀯꆏꀋꎪꃅꑇꐨꑌꈬ、ꉹꁌꎁꃅꃅ、ꏲꉔꃅꉔ、ꊪꀬꃅꀬ、ꃅꎃꐙꎴ,ꂴꅑꄉꄈꏦꋌꋐꌕꏢꌠꇬꐰꏤꄉꌠꄈꑼꋭꑘꈧꌠꃅꇫꑟꌶ,ꄷꀋꁧꀋꎪꃅꄚꊁꅉꀨꇎꏦꋋꈨꐥꌶ:
(ꋍ)ꃅꎁꃅꇬꈉꌠꂷꇻꌦꆺꆀꉪꏦ、꒜꒾ꄏꉪꇐ、ꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠ、ꈆꑪꃅꀻꎆꌠꉜꐨꐥ,ꂴꅑꄉꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꃄꌬꇫꑟ,ꊋꇤꄉꂷꇻꌦꉪꏦꉆꈉ、ꉜꐨ、ꏡꁈꌬꄉꌤꃆꃶꐚꌠꎥꃪ、ꂥꀘ,ꏟꈯꃅꌷꌠꉉ、 ꍔꍞꉉ、ꎃꊒꌠꉉꌠꃅꄉ,ꋍꑞꋍꑵꆳꇨꉏꇨꌠꏭꄙꎟꄎ。
(ꑍ)ꇷꁨꉪꏦꎴꒉꌠꉪꅉꌋꆀꍏꇩꐛꐨꐧꋦꉪꏦꉪꉻꏟꈯꀕꌠꐥꄉ,ꏟꈯꃅꄈꅿꈛꏦꅉꀨꌋꆀꌐꏦ、ꏱꁈꋍꑞꋍꑵꑠꌫꄻ,ꎔꃅꄺꀱꁉꃑꉌꊋꑌ,ꐛꏀꈴꌤꑘꇬꑆꊋꅐꌞꄉ,ꐧꋦꉪꏦꋈꄻꅉꇬꄉꎬꅧꃅꑘꀺ,ꍔꏲꃅꐛꉜꐨꎃꊒꌠꑌ,ꃄꄻꅉꇬ、ꏓꂱ、 ꐩꋊꇬꎖꉚꄎꌠꊌꐨꃶꐚꌠꃅꎼꇁꌶ。
(ꌕ)ꏟꈯꃅꉪꇐꁌꄝ,ꑞꉬꌠꑞꃅꄉ,ꃅꋊꐊꄉꁨꆹ,ꄹꀖꏀꀺ,ꎔꃅꍤꄻꎥꃪꄉ,ꄈꅿꌐꏦ、ꏱꁈꌌꂱꑱꃅꄷ、ꂱꑱꌤꃅꅉꃶꐚꐛꐨꇬꌋꆀꏓꐯꇯꎼꇁꄎ,ꊌꐨꈲꁧꐥꃅꌤꃅ,ꅇꃶꐚꌠꉉ,ꌤꃶꐚꌠꀞ,ꈲꁧꃶꐚꌠꎹ。
(ꇖ)ꀉꇨꃅꇝꂱꌤꑘꃄꉈꑌ、ꍔꍞꆽꎍꐨꉪ,ꃄꄻꎖꋪꐥ,ꏲꂠꌤꃅꇬꊥꇫꄐꅍ、ꁱꀕꌧꇐꌋꆀꌐꑘꌧꇐꐥ。
(ꉬ)ꎃꊒꃅꏓꂱꄻꁵꄉꌠꌅꈌꌬ,ꏥꏦꌭꈬ,ꏦꃤꇬꈴꄉꌤꀞ,ꎃꐚꐙꎴ,ꉔꃅꏲꄉꏓꂱꎁꃅꃅ,ꊨꏦꂴꅑꄉꃅ,ꎬꅧꈪꑌꃅꐥ,ꑖꑟꃅꉹꁌꑌꑲ,ꏟꈯꃅꄈꅿꉹꁌꈛꏦꍬ,ꑴꐚꃅꄈꌋꆀꉹꁌꁳꀠꂘ、ꍞꊟꎻ,ꊋꀥꇱꄉꑌꇐꑲꇐꌶꄻ,ꄈꊇꅉꉉ、ꑌꇐꉜꁨ、ꌶꀠꄻ, ꑴꑳꁌꒉ、ꑴꑳꉪꐛ、ꑴꑳꋓꉪꁨ、ꑴꑳꊋꊡꌠꃅꇫꑟ,ꇶꏦꉪꏦ、ꇛꌺꉪꏦ、ꈩꌒꉪꏦꌋꆀꁋꀘꃅꇏꏭꁏ,ꈁꏾꃅꌅꅍꌬ、ꊨꏦꈲꏣꀉꄂꏂꇫꌠꃅꐨꑠꏭꁏ。
(ꃘ)ꏟꈯꃅꄈꅿꋯꁦꏓꁨꄹꏦꌭꈬ、ꀧꌋꃅ,ꋯꁦꃅꇏꐥ,ꃅꇴꄉꉻꐛꉻꉜꐨꐥ,ꐋꀨꇬꋯꑌꄎ,ꐋꀨꊨꏦꌋꆀꉜꐨꐯꀋꐊꌠꑌꋯꑌꌊꐯꇯꄉꌤꃅꌠꑌꄚꐊ。
ꌕꊰꏁꏢꌠ ꄈꑼꇥꀯꆹꃅꇮꄻꇮꃅꇥꀯꄈꑼꀋꉬꌠꌋꆀꐮꐊꄉꌤꃅꇮꌶ,ꊿꊇꉜꒉ,ꆺꀋꒉꃅꊿꊇꉾꃪꐨꌷꌶ。
ꄈꎀꍹꈁꐥꊐꌠꆏꃅꇮꄻꇮꃅꄈꑼꀋꉬꌠꇥꀯꌧꇐꂿꇐꐥꑠꎹꈹꄉꌊꄻꌊꏲꂠꌤꃅꎻ,ꊿꊇꁳꀋꎪꃅꄉꅍꑌꐥꌅꈌꑌꐥꌠꇬꄉꀧꄉ,ꋒꐯꋒꃅꂿꄐꋊꇤꅐꇁ。
ꌕꊰꉆꏢꌠ ꄈꅿꏲꌋꇥꀯꈁꐥꊐꌠ,ꋯꁦꐥꃅꌋꅐꇁꌠꉬꄿꂿ,ꉎꏲꂠꌤꏲꅉꇬꍝꁵꄉꌠꉬꄿꂿ,ꊿꊇꄉꅍꆹꐥꍂꃅꌬꌠꀋꉬ,ꐯꇯꇘꑐꅀꇔꇧꎭꑌꉆꌠꉬ。
ꇥꀯꈎꄜꌋꆀꇭꀧꇷꄙꐨꐛꅹꃅꐪꊛꄉꌤꃅꀋꄐꀐꌠꆏ,ꇩꏤꏤꐪꇬꈴꄉꎞꆏ、ꐞꆏꄡꑟ。
ꏃ꒾ꌠ ꄈꅿꍬꏦ
ꌕꊯꈬꏢꌠ ꄈꅿꍬꏦꆹꄈꎀꍹꈁꐥꊐꌠꌋꆀꄈꑼꈁꐥꌠꀋꎪꃅꇫꍬꇫꈴꌶꌠꏥꏦꏤꐪꉬ,ꋋꆹꄈꋯꑌꋍꃱꃅ、ꄈꂿꃆꃅꇫꑟꌠꄉꀧꅍꉬ。 ꄈꎀꍹꆏꄈꅿꍬꏦꌌꀋꎪꃅꏦꇨꃅꌬꌋꆀꇫꀧꌋꃅꌶ,ꇭꍣꄈꑼꆏꀋꎪꃅꑴꐚꃅꄈꅿꍬꏦꇬꍬꌶ。
ꇖꊰꏢꌠ ꄈꅿꍬꏦꆹꀋꉬꀋꉆꌠꍔꍞꍬꏦ、ꎀꍹꍬꏦ、ꐙꎴꍬꏦ、ꉹꁌꍬꏦ、ꌤꃅꍬꏦ、ꐥꐨꍬꏦꇫꐊ。
ꂴꅓꊂꂘ、ꆅꉃꈭꋏꌠꌭꈬ,ꍬꏦꌬꇬꀋꎪꃅꏦꇨ、ꍬꏦꀜꐆꇬꀋꎪꃅꅑꎹ,ꏛꃅꒃꉇꐭꃅꒃꉇ、ꐭꄵꒉꐛꆹꄡꎽ,ꑽꐪꐛꊈꌋꆀꐛꐪꀊꐎꀉꆈꌠꇬꉜꄉ,ꌌꀠꂘꉙꂘꌠꅑꍬꏦꇬꈴꄉꅓꀞꌠꁵꌠꇬꑟ。 ꍞꊟꍬꏦꌬꌠ“ꐛꄟꇖꑵ”ꌬꄉ,“ꈁꑓꊼꇅꅪ、ꇵꂷꊼꇅꅐ”ꌠꌌꅉꀕꐛꄟꐛ,ꄈꍬꏦꅓꀞ、ꎀꍹꋊꄻꌠꌌꄈꏲꄈꄻꌠꇇꁈꀋꂿꑘꌠꐛ,ꀉꆈꃅꍬꏦꀜꐆ、ꀉꆈꃅꅓꑘꏦꃤꀜꐆꌠꄈꑼꆏꀋꎪꃅꌌꄈꐴꀜꋊꇧꎭ。
ꄈꈏꇓꆏꏦꇨꃅꄈꏦꌋꆀꇩꏤꏦꃤꇬꀋꊒꌠꇇꁈꌌꄈꑼꏭꄉꌠꏢꇋ,ꏦꇨꃅꈠꁏꇇꇩꍈꌠꌋꆀꍍꋉꄸꄀꌠꏢꇋ。 ꏤꄻꄉꋋꈨꀋꈴꌠꎀꍹꅀꊿꏭꆏꀋꎪꃅꄈꅿꍬꏦꌋꆀꇩꏤꏦꃤꇬꈴꄉꇬꏭꅑꑘꎹꌶ。
ꇖꊰꋋꏢꌠ ꄈꑼꏭꍬꏦꇬꑽꃤꅓꁵꌠꆹꉬꑵꐥ:ꅇꈪꊐ、ꀉꆈꃅꅇꈪꊐ、ꄈꈏꇓꌅꈌꇔꇧꎭ、ꄈꂒꉻꊏꇬꄀꄉꉜꉚ、ꄈꐴꇇꉈꋊꇧꎭ。
ꄈꂒꉻꊏꇬꄀꄉꉜꉚꌠꆹꀊꎴꐯꀊꎴꇬꑌꑍꈓꈋꉐꐂꀋꉆ。 ꄈꑼꄈꂒꉻꊏꇬꄀꄉꉜꉚꄮꇬꆏꏤꇽꌅꈌ、ꌊꄻꌅꈌꌋꆀꌌꌊꄻꌠꌅꈌꀋꐥ。 ꄈꑼꄈꂒꉻꊏꇬꄀꄉꉜꉚꈭꐨ,ꃶꐚꃅꑽꐪꄺꀱꑲꆏ,ꋍꄈꑼꌅꈌꀱꐛꅉꐛꄡꑟ; ꑽꐪꌭꄉꄺꀱꀋꅲꌠꆏ,ꄈꐴꇇꉈꋊꇧꎭꄡꑟ。
ꄈꐴꇇꉈꋊꇧꎭꌠꆹꄈꈏꇓꀉꇨꐯꀉꇨꃅꌌꑽꃤꁵꑵꌠꉬ。 ꄈꎀꍹꈁꐥꊐꌠꄈꐴꇇꉈꋊꇧꎭꂿꄷꌠꐰꏤꅀꈌꁧꄮꇬꆏ,ꐊꑷꃅꋋꈨꃆꂮꐥꌠꌬꇐꌋꆀꉜꐨꈧꌠꌌꎥꃪꋒꃅꄉꇈ,ꉪꑌꏡꑌꃅꃅꄡꑟ。
ꇖꊰꑋꏢꌠ ꄈꑼꌌꍬꏦꇬꈴꄉꑽꃤꁵꌠꆏ,ꀋꎪꃅꌌꍝꀯ꒜ꀉꒉꈿꅉꇬꄉꇕꄟꐰꏤꇈ,ꄜꌊꄈꅿꅉꂫꊐꌠꊈꑼꉼꁳꈌꁧꎻꌶ; ꀋꄸꄷꌤꃆꊼꇅꀉꒉꅀꌼꇪꌠ,ꀋꉬꀐꇬꄈꑼꌌꄈꐴꇇꉈꋊꇧꎭꃅꀞꇬꆏ,ꐛꐨꐯꀋꌡꌠꇬꉜꄉ,ꄜꌊꑤꊐꌠꅀꑤꊐꌠꈋꉐꄈꅿꍬꏦꍤꄻꊈꑼꉼꁳꍤꄻꈌꁧꎻꄡꑟ。 ꐛꐨꐋꀋꌡꃆꂮꐥꇬꆏ,ꑤꊐꌠꌋꆀꑤꊐꌠꈋꉐꄈꅿꊈꑼꉼꌋꆀꍬꏦꍤꄻꊈꑼꉼꆏꈛꎂꃅꄈꑼꌌꍬꏦꇬꈴꄉꑽꃤꁵꌠꐰꏤꌅꈌꐥ。
ꄈꅿꍏꑷꊈꑼꉼꊈꑼ、ꊁꇱꊈꑼꏭꆏ,ꌌꅇꈪꊐ、ꀉꆈꃅꅇꈪꊐꃅꅓꀞꌠꆏ,ꍏꑷꍬꏦꍤꄻꊈꑼꉼꎮꃷꊈꑼꉼꁳꍤꇖꎻꈭꐨ,ꄜꌊꄈꍏꑷꁳꈌꁧꎻ。 ꃅꄷꇬꈁꐥꊐꌠꄈꅿꊈꑼꉼꊈꑼ、ꊁꇱꊈꑼ,ꌌꅇꈪꊐ、ꀉꆈꃅꅇꈪꊐꃅꅓꀞꌠꆏ,ꉎꋍꊐꌠꍬꏦꍤꄻꊈꑼꉼꁳꈌꁧꎻ,ꄷꀋꁧꄜꌊꋍꃤꂱꑱꊐꌠꄈꅿꊈꑼꉼꁳꅺꇰꁱꄀꄉꎻꄡꑟ。
ꄈꅿꍏꑷꊈꑼꉼꌋꆀꃅꄷꈁꐥꊐꌠꇬꊈꑼꉼꇬꊈꑼ、ꊁꇱꊈꑼꈧꌠ,ꌌꄈꈏꇓꄉꅍꇔꇧꎭ、ꄈꂒꉻꊏꇬꄀꄉꉜꉚꌠꅀꄈꐴꇇꉈꋊꇧꎭꑽꃤꅓꀞꌠꆏ,ꀋꎪꃅꊨꏦꐤꅉꊈꑼꉼ꒜ꊈꑼꐊꈴꃅꈿꇬꊿꌕꁧꋊꑍꁧꈋꉐꀉꑌꈧꌠꁳꇫꐊꄉꐰꏤꎻ。 ꐊꈴꃀꈿꅉꃀꀋꈿꊬꌠꇬ,ꂴꆏꍏꑷꍔꍞꏳꌋꆀꃅꄷꈁꐥꊐꌠꊈꑼꉼꇬꎮꃷꊈꑼꉼꈧꌠꁳꐰꏤꎼꇁꇈ,ꊁꊈꑼꉼꊈꑼꐊꈴꃅ꒜ꈿꄮꇬꑲꆀꏚꍆꄉꈌꁧꎻꉆ。 ꃅꄷꈁꐥꊐꌠꇬꊈꑼꉼꊈꑼꌋꆀꊁꇱꊈꑼꌌꄚꂴꉉꈧꌠꇬꈴꄉꑽꃤꁵꌠꆏ,ꀋꎪꃅꌌꉎꊐꌠꍬꏦꍤꄻꊈꑼꉼꎮꃷꊈꑼꉼꁳꍤꇖꄉ,ꋋꊐꌠꍬꏦꍤꄻꊈꑼꉼꁳꄜꌊꂱꑱꊐꌠꄈꅿꊈꑼꉼꁳꈌꁧꎻꌶ。
ꍏꑷꊈꑼꉼꊈꑼ、ꊁꇱꊈꑼꀉꆈꃅꅓꑘꑽꃤꐆꌠꆏ,ꍏꑷꍔꍞꏳꁳꐰꏤꄉꋍꄈꐴꇇꉈꋊꇧꎭꎻ; ꃅꄷꈁꐥꊐꌠꇬꊈꑼꉼꊈꑼ、ꊁꇱꊈꑼꀉꆈꃅꅓꑘꑽꃤꐆꌠꆏ,ꂱꑱꊐꌠꊈꑼꉼꎮꃷꊈꑼꉼꁳꐰꏤꄉꋍꄈꐴꇇꉈꋊꇧꎭꎻ。
ꇖꊯꌕꏢꌠ ꄈꎀꍹꄈꑼꌌꑽꃤꅓꁵꂿꄷꐰꏤꇬ,ꑞꉬꌠꑞꃅꄉꑽꐪꈧꌠꍤꄻꄡꑟ。 ꄯꒉꑽꃤꅓꁵꌠꑽꐪꁱꄉꈧꌠꌋꆀꑽꃤꅓꁵꏤꐪꆏꀋꎪꃅꄻꋍꑴꅉꀨꄉ,ꋍꑴꅉꉉꀽꌠꌋꆀꀥꑣꌠꇬꅲꌶ。 ꀋꄸꄷꋍꑴꅉꑽꃤꅓꁵꏤꐪꉌꀋꃹꑲꆏ,ꅇꎹꉆ,ꄚꇬꃆꂮꐥꌠꄈꎀꍹꆏꀋꎪꃅꏲꂠꄉꀞꄻꅀꐳꃅꏭꎭꎼꁧ,ꍅꇫꄉꀋꉆ。 ꇯꍝꃅꉜꐨꆹꑽꌠꏟꈯꃅꌭꄉꇬꎷꌠꌋꆀꇗꅉꀋꐥꃅꇖꂟꐺꌠꆏ,ꌌꀠꂘꉙꂘꌶ。
ꇖꊯꇖꏢꌠ ꄈꎀꍹꀋꄸꄷꄈꍬꏦꀧꌋꃅꁁꏯꃅꅍꀋꃅꇧꎭꌠꆏ,ꀋꎪꃅꌌꅑꎹꌶ。
ꄈꎀꍹꀉꆈꃅꄈꍬꏦꇬꆼꁏꄉꑽꃤꐥꇈ、ꋍꑴꅉꇬꋊꍬꀋꄐꈧꌠꆏ,ꉎꊐꌠꄈꅿꊈꑼꉼꁳꌌꍤꎖꊨꄅꈭꐨ,ꐛꃆꐛꂮꀊꐎꀉꆈꐨꇬꉜꄉ,ꌌꄺꂡꀱꅀꐆꇧꎭꌠꐰꏤꄉ,ꄷꀋꁧꄜꌊꉈꑴꉎꋍꊐꌠꄈꅿꊈꑼꉼꁳꍤꄻꈌꁧꄉ,ꑌꐚꃅꌌꄛꇰꄉꃄꌬꎻ。
ꉆ꒾ꌠ ꄈꅿꍬꏦꍤꄻꌤꏲꅉ
ꇖꊯꉬꏢꌠ ꄈꅿꍏꑷꍬꏦꍤꄻꊈꑼꉼꆹꄈꅿꍏꑷꊈꑼꉼꏲꂠꄉꌠꇂꃴꄉꌤꃅ。 ꄈꅿꃅꄷꈁꐥꊐꌠꇬꍬꏦꍤꄻꊈꑼꉼꌋꆀꅉꂫꊐꌠꍬꏦꍤꄻꊈꑼꉼꆏꂱꑱꊐꌠꇬꄈꅿꊈꑼꉼꌋꆀꉎꊐꌠꍬꏦꍤꄻꊈꑼꉼꑍꄀꃅꏲꂠꌠꇂꃴꄉꌤꃅ。 ꉎꊐꌠꄈꅿꍬꏦꍤꄻꊈꑼꉼꆏꊋꀥꇱꄉꐰꊐꌠꍬꏦꍤꄻꊈꑼꉼꏭꏲꂠ。
ꄈꅿꍬꏦꍤꄻꊈꑼꉼꈁꐥꊐꌠꇬꋍꈭꃄꄮꆹꂱꑱꊐꌠꇬꄈꅿꊈꑼꉼꌋꆀꐯꌟ。
ꄈꅿꍏꑷꍬꏦꍤꄻꊈꑼꉼꊈꑼꐊꈴꃅ꒜ꈿꅉꇬ,ꅉꀕꌤꏲꊈꑼꉼꌋꆀꎻꏹ、ꃛꎻꏹꌊꄻ,ꄷꀋꁧꄜꌊꄈꅿꍏꑷꊈꑼꉼꁳꈌꁧꎻ。 ꄈꅿꃅꄷꈁꐥꊐꌠꇬꍬꏦꍤꄻꊈꑼꉼꊈꑼꐊꈴꃅ꒜ꈿꅉꇬꄉ,ꅉꀕꌤꏲꊈꑼꉼꌋꆀꎻꏹ、ꃛꎻꏹꌊꄻ,ꄷꀋꁧꂱꑱꊐꌠꇬꄈꅿꊈꑼꉼꁳꌌꉌꃹꈴꄉ,ꄜꌊꉎꊐꌠꄈꅿꊈꑼꉼꁳꈌꁧꎻ。 ꄈꅿꅉꂫꊐꌠꊈꑼꉼꆹꍬꏦꍤꄻꊈꑼꉼꂷꄻꅀ,ꍬꏦꍤꄻꊈꑼꂷꄻꌠꆏ,ꋍꉎꊐꌠꄈꎀꍹꁳꐛꐨꇬꉜꄉꐰꏤꎻ。 ꄈꅿꊝꍝꀯꊈꑼꉼꌋꆀꍝꀯꊈꑼꉼꇬꆏꍬꏦꍤꄻꊈꑼꂷꇱꄉꌶ。
ꄈꅿꍏꑷꌋꆀꃅꄷꍬꏦꍤꄻꊈꑼꉼꆏꐊꑷꃅꄈꅿꍬꏦꍤꄻꊤꁆꌌꂱꑱꊐꌠꄈꌋꆀꇩꏤꌤꏲꅉꇬꍆꄉ。 ꍬꏦꍤꄻꊤꊤꍈꆏꈁꍆꄉꌠꌤꏲꅉꇬꄈꅿꏲꂠꎀꍹꇬꄚꃆꂮꐥꌠꃀꈿꅉꇬꐊꈽ。 ꊿꊇꌤꃅꇬꆹꌤꏲꅉꋌꈚꇬꄈꅿꏲꂠꎀꍹꀋꎪꃅꇫꊋꁈꄏꌶ。
ꇖꊰꃘꏢꌠ ꄈꅿꈁꐥꊐꌠꍬꏦꍤꄻꊈꑼꉼꆏꄈꈏꇓꍞꊟꌐꄉꆽꎍꌠꌤꏲꅉꉬ,ꂿꃆꀋꉬꀋꉆꌠꆏ:ꄈꏦꌋꆀꀉꁁꄈꈏꇓꏦꇗꀧꌋꃅ,ꄈꅿꈛꏦ、ꌐꏦ、ꏱꁈꌋꆀꏤꐪꌫꄻꃆꂮꍤꄻ,ꄈꅿꊈꑼꉼꇇꀨꄉꐊꑷꃅꏦꇨꃅꄈꏲꌠꄹꎆ、 ꊋꀥꇱꄉꄈꃅꇏꋈꄻꌠꌋꆀꍹꈔꌠꏭꁏꌠꌤꊥꇫꄉꃅ。
ꄈꅿꈁꐥꊐꌠꍬꏦꍤꄻꊈꑼꉼꃅꎁꆏꍞꊟ、ꍬꏦꌬ、ꅑꎹꌠꉬ,ꅉꀕꃅꄈꑼꏭꍬꏦꍬꐨ꒿ꂘ,ꄈꍬꏦꀧꌋꃅꌠꃆꂮꐰꏤꅐꇁ; ꄈꅿꎀꍹꌋꆀꄈꑼꏲꌋꇥꀯꃅꎁꍬꌬ、ꌅꈌꌫꄻꅉꇬꍞꊟ,ꄈꑼꉹꁌꐴꀖꎼꇁꌠꊪꀞ,ꅇꉉꅇꊪꈎ、ꄡꄉꅇꉉꄯꒉꁱꄉꅲꌠꃅ; ꄈꅿꎀꍹꌋꆀꄈꑼꄈꍬꏦꌋꆀꀉꁁꄈꈏꇓꏦꇗꐆꊼꇅꀉꒉꀊꂾꃆꂮꐥꌠꅀꌼꇪꌠꃣꈌꑠꍤꄻ、ꀞꄻ,ꃣꈌꋋꈨꇬꄈꑼꌌꑽꃤꅓꁵꅀꇔꇧꎭꌠꐰꏤ; ꅑꎹꌠꃅꅀꃅꎁꅑꎹꌠꇖꐨꄜꎼꇁ; ꄈꑼꅇꎹꌋꆀꑗꇖꇁꌠꊪꀞ; ꄈꑼꌅꈌꈲꁧꏦꀧꄉ。
ꈁꐥꊐꌠꍬꏦꍤꄻꊈꑼꉼꆏꀊꅰꃅꃣꈌꀋꂿꑘꐨꐥꌠꅀꌼꇪꌠꀞꄻꇬꌤꃆꌋꆀꀞꄻꐨ,ꌌꂱꑱꊐꌠꇬꄈꅿꊈꑼꉼꏭꄛꇰꌶ。 ꄈꅿꃅꄷꈁꐥꊐꌠꍬꏦꍤꄻꊈꑼꉼꌋꆀꅉꂫꊐꌠꍬꏦꍤꄻꊈꑼꉼꆹꋍꋓꃅꌌꉎꊐꌠꍬꏦꍤꄻꊈꑼꉼꏭꄛꇰꌶ。
ꈁꐥꊐꌠꍬꏦꍤꄻꊈꑼꉼꆏꂱꑱꊐꌠꇬꄈꅿꊈꑼꉼꇬꊈꑼꄈꍬꏦꇬꏦꐆꌠꌋꅜꇬꆏ,ꂴꌌꍤꀱꊨꄅꄉ,ꀋꄸꄷꌌꃆꑘꐘꃅꍤꄻꄻꅐꌠꆏ,ꂱꑱꊐꌠꄈꅿꊈꑼꉼꏭꅇꄜꄮꇬꋍꋓꃅꌌꉎꋍꊐꌠꍬꏦꍤꄻꊈꑼꉼꏭꅇꄜꄡꑟ; ꎮꃷꊈꑼꇬꃆꂮꐥꌠꆏ,ꄜꌊꉎꊐꌠꍬꏦꍤꄻꊈꑼꉼꁵꄉ,ꉎꊐꌠꍬꏦꍤꄻꊈꑼꉼꁳꌌꀑꐱꃅꍤꎖꎻ,ꍤꀞꄻꅐꌠꆏ,ꉎꋍꊐꌠꍬꏦꍤꄻꊈꑼꉼꁳꄜꌊꂱꑱꊐꌠꄈꅿꊈꑼꉼꁳꈌꁧꎻ。
ꇖꊰꏁꏢꌠ ꉎꊐꌠꍬꏦꍤꄻꊈꑼꉼꆏꐰꊐꌠꍬꏦꍤꄻꊈꑼꉼꌤꃅꌠꇬꍤꄻꌅꈌꐥ,ꄷꀋꁧꐰꊐꌠꍬꏦꍤꄻꊈꑼꉼꃣꈌꐰꏤꄉꀐꌠꇬꈌꁧꌠꌋꆀꄺꀱꌠꌅꈌꐥ。 ꀋꄸꄷꐰꊐꌠꍬꏦꍤꄻꊈꑼꉼꐰꏤꄉꌠꌌꄺꀱꂿꄷꌠꆏ,ꋍꃤꂱꑱꊐꌠꇬꄈꅿꊈꑼꉼꈌꁧꄉꀐꌠꆏ,ꑠꃅꄺꀱꄉꋋꈨꀋꎪꃅꌌꋍꉎꊐꌠꇬꄈꅿꊈꑼꉼꁳꈌꁧꎻꌶ。
ꄈꅿꃅꄷꈁꐥꊐꌠꇬꍬꏦꍤꄻꊈꑼꉼꌋꆀꅉꂫꊐꌠꇬꍬꏦꍤꄻꊈꑼꉼꀋꄸꄷꄈꅿꊈꑼꉼꂱꑱꊐꌠꇬꃣꈌꀞꄻꏤꇽꌠꇬꉜꐨꐯꀋꌡꌠꐥꑲꆏ,ꌌꍬꏦꍤꄻꊈꑼꉼꉎꊐꌠꏭꇖꄉꉈꑴꍤꀱꉆ; ꀋꄸꄷꂱꑱꊐꌠꇬꄈꅿꊈꑼꉼꅀꋍꊈꑼꈨꄈꅿꍬꏦꐆꌠꃆꂮꐥꇬ,ꂱꑱꊐꌠꄈꅿꊈꑼꉼꇫꀞꀋꄻꅀꌌꎃꊒꃅꀞꀋꄻꄮꇬꆏ,ꉎꊐꌠꍬꏦꍤꄻꊈꑼꉼꏭꅇꇰꄉ,ꇫꇇꀨꄉꀞꄻꎻꄷꇖꌠꌅꈌꐥ。
ꈬ꒾ꌠ ꄈ ꊤ
ꇖꊰꉆꏢꌠ ꍏꑷꌋꆀꃅꄷꇬꇩꏤꌤꏲꅉ、ꏓꂱꏓꉻ、ꎆꏣꎀꍹ、ꁱꀕꎀꍹꌋꆀꄈꎀꍹꀋꉬꌠꏲꂠꌤꏲꅉꈧꌠꇬꆏ,ꄈꊤꄻꉆ。 ꄈꊤꆏꏲꂠꈯꌬꂿꄐꐥ。 ꄈꊤꂿꃆꆹ,ꀋꉬꀋꉆꌠꆏꄈꅿꈛꏦ、ꌐꏦ、ꏱꁈꌫꄻꇫꑟꌶꌠꏲꂠ; ꊋꀥꇱꄉꂱꑱꌤꃅꅉꇬꄈꋈꄻꌠꏲꂠ,ꐊꑷꃅꏦꇨꃅꄈꏲꌠꃅꎁꃄꌬ; ꂱꑱꌤꃅꅉꇬꌤꃆꀉꒉꀊꂾꌠꇕꄟꌋꆀꐰꏤ; ꇥꀯꏲꂠꌤꃅꋒ; ꅉꂫꊐꌠꄈꎀꍹꄻꌠꋊꄻꌠꌋꆀꄈꑼꊩꃹ、ꄈꑼꅓꀞꑠꌤꀋꉬꀋꉆꌠꇕꄟꌠꌋꆀꐰꏤꌠꃅ; ꇥꀯꌋꆀꉹꁌꄈꑼꀋꉬꌠꃅꋯꑌꌊꄉ,ꄈꌋꆀꇩꏤꏮꄀꇬꁳꌠꂿꃆꃅꇫꑟ; ꌤꏲꅉꇬꌋꆀꈛꎂꃅꏲꌠꌤꃅꅉꇬꄈꎀꍹꌤꃅꌠꇬꏲꂠ。
ꇖꊯꈬꏢꌠ ꄈꊤꇬꐊꈧꌠꆏ,ꄈꊤꄻꄷꇫꈌꁧꈚꌠꇬꄈꎀꍹꁳꐰꏤꎻ。 ꄈꊤꆏꎻꏹꐥꃅꄉ,ꄻꅐꑲꆏꃛꎻꏹꑌꐥꃅꄉꉆ。
ꄈꊤꆏꀋꎪꃅꄈꎀꍹꇫꈌꁧꈚꌠꁳꇫꏲꂠꎻ。
ꉬꊰꏢꌠ ꐰꊐꌠꇩꏤꌤꃅꅉꇬꏓꋍꃱꃅꏲꂠꅉꈧꌠꇬꆏꄈꊈꄻꉆ,ꄈꊈꌋꅐꌠꏡꁈ、ꋍꌅꅍꌋꆀꌤꃅꂿꃆꆏ,ꍏꑷꁳꐚꀕꃅꐰꏤꎻ。
ꊰ꒾ꌠ ꄈꌋꆀꇷꁨꉪꏦꌠꏀꄨꐮꃆꂮ
ꉬꊰꋋꏢꌠ ꍏꇩꇷꁨꉪꏦꌠꏀꄨꆹꍏꇩꇭꍣꄈꏲꂠꄉꌠꌠꏀꂴꅑꌠꉹꁌꁥꏓꎀꍹꂷꉬ,ꋋꆹꌠꏀꋍꏅꌠꃄꄻꅉꇬꈴꄉꍏꇩꐛꐨꐧꋦꉪꏦꌋꆀꇷꁨꉪꏦꌷꌠꌶꅉꂷꉬ,ꄈꇇꀨꌠꌋꆀꊁꄐꂽꁥꑌꉬ。 ꌠꏀꄨꍏꑷꊈꑼꉼꆏꄈꍏꑷꊈꑼꉼꁳꏲꂠꎻ。 ꌠꏀꄨꃅꄷꎀꍹꈁꐥꊐꌠꆏꂱꑱꊐꌠꇬꄈꅿꊈꑼꉼꁳꏲꂠꎻ,ꉈꑴꌠꏀꄨꉎꊐꌠꎀꍹꁳꑌꏲꂠꎻ。
ꉬꊰꑋꏢꌠ ꄈꅿꊈꑼꉼꈁꐥꊐꌠꆏꊋꀥꇱꄉꌠꏀꄨꇬꏲꂠ,ꄨꇥꀯꌊꌬꌠꌋꆀꂘꄻꌠꋓꉪꁨꌶ。 ꄈꆹꏟꈯꃅꌠꏀꄨꇬꌠꏀꋍꏅꌠꐋꀋꌡꐨꌋꆀꈉꐨꇬꈴꄉ,ꊋꑌꍅꁍꀕ、ꀹꄻꐨꐥꃅꌤꃅꌠꊋꁈꄏ,ꋒꐯꋒꃅꄨꐂꂴꅑꄉꃅꁥꌠꂿꄐꌋꆀꌠꏀꋍꏅꑌꑲꌠꈴꋒꂿꄐꋊꇤꅐꇁ。
ꄨꅿꑤꊐꌠꌋꆀꑤꈍꐯꈁꐥꊐꌠꇬꊈꑼꉼꎻꏹ,ꎆꏂꑘꌤꑘꌤꃅꅉꇬꄨꊈꑼꉼꎻꏹꈧꌠ,ꄈꑼꉬꌠꆏ,ꂱꑱꊐꌠꇬꄈꅿꊈꑼꉼꌋꆀꎮꃷꊈꑼꉼ꒜ꈿꅉꇬꈿꈽꉆ。
ꊯꊪ꒾ꌠ ꄈꌐꉻꄈꁈꁧ
ꉬꊯꌕꏢꌠ ꍏꇩꇭꍣꄈꄈꌐꉻꆹꉊꈯꌋꆀꇁꄵꌌꏓꐛꄉꑴꁱꄉꌠꉬ。
ꉬꊯꇖꏢꌠ ꍏꇩꇭꍣꄈꄈꁈꁧꆹꁈꁧꇬꄈꌐꉻꀊꏂꌠꑴꁱꇬꄀꄉꌠꁈꁧꀊꅪꉬ。
ꉬꊯꉬꏢꌠ ꍏꇩꇭꍣꄈꄈꌐꉻꄈꁈꁧꆹꍏꇩꇭꍣꄈꄜꎁꌋꆀꌐꂷꉬ。 ꄈꅿꈁꐥꊐꌠꎀꍹꌋꆀꄈꑼꈁꐥꌠꃅꐯꇯꄈꌐꉻꄈꁈꁧꑊꒉꐨꀧꌋꃅꌶ。 ꏤꐪꇬꈴꄉꄈꌐꉻꄈꁈꁧꄺꌬꌶ。